کنک اسکینڈل، کساناں دا 10 مئی توں ملک گیر احتجاج دا اعلان

لہور(پنجابی میڈیا)کسان اتحاد نے 10 مئی توں ملک گیر احتجاج دا اعلان کردتا اے۔ چیئرمین کسان اتحاد خالد حسین کھوکھر نے آکھیا اے کہ 10 مئی نوں نماز جمعہ دے بعد ملتان توں احتجاج شروع کر کے زراعت دا علامتی جنازہ وی کڈاں گے۔نجی ٹی وی نال گل بات کر دیاں ہویاں اونہاں دا کہنا سی کہ کنک اسکینڈل پاروں کساناں دا400 ارب روپے دا نقصان ہویا اے،کرپشن ذریعے 6کروڑ کساناں نوں ذبح کردتا گیا اے۔اونہاں نے آکھیا کہ کنک دی درآمد اتے اک ارب ڈالر دا زرمبادلہ ضائع کیتا گیا،چیئرمین کسان اتحاد خالد حسین باٹھ نے ایس بارے وزیراعظم نوں وی خط لکھیا اے جس وچ آکھیاگیا اے کہ کسان ایس ویلے مشکل توں دوچار اے تے اگر کسان دی کنک نہ خریدی گئی تے کسان کپاس تے ہوراں فصلاں کاشت نہیں کر پائے گاجماعت اسلامی ولوں وی کساناں دے مطالباں دے حق وچ پنجاب تے سندھ وچ15 توں وَدھ مقاماں اُتے احتجاجی کیمپ جاری نیں، گوجرانوالا، سرگودھا، فیصل آباد،گجرات،جہلم،منڈی بہائوالدین ،راولپنڈی، وچ احتجاجی کیمپ تے مظاہرے کیتے گئے، صوبہ سندھ وچ ڈھر کی، گھوٹکی، میر پور خاص سنے مختلف ضلعیاں وچ احتجاجی کیمپ تے مظاہرے ہوئے۔