اپوزیشن وزیراعظم دے خلاف کجھ وی نہیں کر سکدی، عمران خان مدت پوری کرن گے: شیخ رشید

لہور: شیخ رشید آکھیا اے اپوزیشن وزیراعظم دے خلاف کجھ وی نہیں کر سکدی، عمران خان 5ورھے دی مدت پوری کرن گے، چیف جسٹس دے فیصلے دے بعد جھاڑو پھرن جا رہیا اے۔ وفاقی وزیر ریلوے شیخ رشید نے پریس کانفرنس کردیاں آکھیا شہباز شریف میری پارٹی دا بندہ اے، جیویں کہواں گا انج کرے گا، سپریم کورٹ دا 120احتساب عدالتاں دے قیام دا فیصلہ تریخی اے، کل جہڑا فیصلہ آیا اے میری سیاسی زندگی وچ کدی نہیں آیا، میری سیاسی زندگی وچ ایہ پاناما توں وڈا فیصلہ اے، چیف جسٹس نے جناں وڈا فیصلہ کیتا اے اوہناں نوں سلام پیش کرنا آں، عدالتی فیصلے توں جھاڑو پھر جائے گا تے آئندہ دا انتخاب شفاف ہووے گا، 14وزارتاں چلائیاں پر مینوں اک ٹکا نہیں ملیا۔ شیخ رشید دا کہنا سی ریلوے اہم ترین سال وچ داخل ہون جا رہی اے، ایم ایل ون ریلوے نوں نویں زندگی دیوے گا، حادثیاں دی کمی لئی ایم ایل ون اہمیت دا حامل اے، ایم ایل ون منصوبے دی ایکنک منظوری دیوے گی، ایم ایل ون ای ریلوے دا واحد حل اے۔ اوہناںآکھیا پرسوں تک نالہ لئی دا مسئلہ وی حل ہو جائے گا۔