مولانا فضل الرحمان نے اے پی سی نوں وی مذاق تے اپنی چھیڑ بنا لیا: فیاض الحسن

لہور: وزیر اطلاعات پنجاب فیاض الحسن چوہان آکھیا اے مولانا فضل الرحمان نے اے پی سی نوں وی مذاق تے اپنی چھیڑ بنا لیا اے، میرا مشورہ اے کہ مولانا مصلے وچھا کے اگلے تن سال اپنے سیاسی و مالی گناہواں تے توجہ استغفار کرن۔ مولانا فضل الرحمان دی پریس کانفرنس تے فیاض الحسن چوہان نے ردعمل دیندیاں آکھیا مولانا فضل الرحمان پاکستان دی سیاست نوں اپنی بدبو توں تعفن زدہ کرن والا اک ٹُٹیا ہویا انڈہ اے، فضل الرحمان نے ہمیشہ اصول دے ناں تے وصول دی سیاست کیتی اے، 2018 دے الیکشن دی ہار دی وجہ توں کووڈ 19وی مولانا نوں کووڈ 18محسوس ہو رہیا اے۔ فیاض الحسن چوہان دا کہنا سی ہر اے پی سی دے بعد شکست و ریخت، رسوائی تے جگ ہنسائی ای مولانا فضل الرحمان دے کھاتے وچ آندی اے۔ مولانا فضل الرحمان 73دے آئین دے تناظر وچ کرپشن دے 74رنگ تے ڈھنگ کڈھن وچ ماہر نیں، وزیراعظم عمران خان دی قیادت وچ پی ٹی آئی اپنی آئینی مدت پوری کرے گی۔