کورونا نے ہور 75بندیاں دی جان لے لئی، وائرس نال 2لکھ 43ہزار 599متاثر

لہور: پاکستان وچ کورونا دے تصدیق شدہ کیساں دی تعداد 2 لکھ 43 ہزار 599 تک اپڑ گئی جد کہ اک دن وچ 75 بندے جاں بحق ہوگئے جہدے بعد موتاں دی تعداد 5 ہزار 58 ہوگئی۔نیشنل کمانڈ اینڈ آپریشن سینٹر دے تازہ ترین اعدادوشمار دے مطابق پچھلے 24 گھنٹیاں دے دوران 2 ہزار 751 نویں کیسز رپورٹ ہوئے، پنجاب وچ 85 ہزار 261، سندھ وچ اک لکھ 900، خیبر پختونخوا وچ 29 ہزار 406، بلوچستان وچ 11 ہزار 99، گلگت بلتستان وچ اک ہزار 619، اسلام آباد وچ 13 ہزار 829 جد کہ آزاد کشمیر وچ اک ہزار 485 کیسز رپورٹ ہوئے۔ملک بھر وچ ہن تک 15 لکھ 14 ہزار 858 بندیاں دے ٹیسٹ کیتے گئے، پچھلے 24 گھنٹیاں دے دوران 23 ہزار 255 نویںٹیسٹ کیتے گئے، ہن تک اک لکھ 49 ہزار 92 مریض صحت یاب ہوچکے نیں جد کہ 2 ہزار 375 مریضاں دی حالت تشویشناک اے۔پاکستان وچ کورونا توں اک دن وچ 75 بندے جاں بحق ہوگئے جہدے بعد وائرس نال مرن والیاں دی تعداد 5 ہزار 58 ہوگئی۔ پنجاب وچ اک ہزار 972، سندھ وچ اک ہزار 677، خیبر پختونخوا وچ اک ہزار 63، اسلام آباد وچ 146، بلوچستان وچ 125، گلگت بلتستان وچ 34 تے آزاد کشمیر وچ 41 مریض جان توں ہتھ دھو بیٹھے۔