جلیل شرقپوری نال بدتمیزی دا معاملہ:کارروائی لئی سپیکر نوں درخواست

لہور ( بھلیکھا ٹی وی ) مسلم لیگ نون دے ناراض رکن میاں جلیل احمد شرقپوری دے نال اسمبلی وچ بدتمیزی دے معاملے اُتے پنجاب اسمبلی سیکرٹریٹ نوں میاں جلیل احمد شرقپوری دی قانونی کارروائی لئی تحریری درخواست موصول ہو گئی ۔میاں جلیل شرقپوری نے درخواست وچ میاں عبد الروف ، مرزاجاوید تے ہوراں لیگی ارکاناں دے خلاف کارروائی دا مطالبہ کیتا اے ۔

سپیکر دے نام درخواست وچ آکھیا گیا کہ میاں عبد الروف نے بد تمیزی دی شروعات کیتی ، مرزا جاوید نے وی بعد وچ شامل ہو گئے ، میرے توں زبردستی استعفیٰ لین دی کوشش کیتی گئی۔ میری دستار اُتے لوٹے رکھن دی کوشش کیتی گئی ۔ناراض لیگی رکن جلیل شرقپوری نے تحریری درخواست وچ مطالبہ کیتا کہ ممبر اسمبلی نوں یر غمال بنان تے زبردستی استعفیٰ لین دی کوشش اُتے متعلقہ ارکاناں دے خلاف کارروائی کیتی جائے ۔دستار اُتے لوٹے رکھن دی کوشش اُتے لہور پولیس نوں قانونی کارروائی لئی آگاہ کیتا جائے ۔