تھانہ شاہدرہ لہور وچ زیر حراست شہری دی ہلاکت،پلس اہلکاراں خلاف قتل دا مقدمہ

لہور: حراست وچ شہری دی ہلاکت تے 3پلس اہلکاراں سنے 5بندیاں دے خلاف قتل دا مقدمہ درج کر لیا گیا۔ مقدمے وچ انچارج انویسٹی گیشن شاہدرہ غلام باری، چوکی انچارج سگیاں سرور تے فیکٹری مالک حفیظ چٹھہ نوں نامزد کیتا گیا اے۔ سی سی پی او لہور عمر شیخ نے شہری دی ہلاکت تے نوٹس لیندیاں ہوئیاں ڈی آئی جی انوسٹی گیشن دی سربراہی وچ انکوائری ٹیم تشکیل دے دتی اے تے انکوائری کمیٹی نوں جلدی توں جلدی رپورٹ پیش کرن دی ہدایت کیتی گئی اے۔

عمر شیخ دا کہنا سی پلس ولوں پوسٹ مارٹم کروان دی وی عرضی کر دتی گئی، پوسٹ مارٹم رپورٹ دی روشنی وچ ہور کاروائی دا فیصلہ کیتا جائے گا، واقعے دا جہڑا وی ذمہ دار ہووے گا اوہدے خلاف قنون دے مطابق کاروائی عمل وچ لیائی جائے گی۔ ایف آئی آر دے مطابق مقتول اک فیکٹری وچ نوکری کردا سی جتھے اوہنوں چوری دے شبہ وچ مالکان نے اوہدے تے شدید تشدد دے بعد پلس دے حوالے کر دتا۔ پلس دی حراست وچ وی مقتول نوں بہیمانہ تشدد دا نشانہ بنایا گیا۔