فضل الرحمان نے مکس اچار پارٹی دی کرپشن اُتے پردہ پان دی ٹھان لئی : فیاض الحسن چوہان

لہور ( بھلیکھا ٹی وی ) فیاض الحسن چوہان نے آکھیا اے کہ فضل الرحمان نے مکس اچار پارٹی دی کرپشن اُتے پردہ پان دی ٹھان لئی ، ایس کردار نوں بخوبی نبھان اُتے مولانا نوں ‘مولانا نواز شریف زرداری دا لقب ملیا، نواز شریف نوں سکیورٹی رسک قرار دین والے اج اوہناں دا دفاع کررہے نی۔وزیر اطلاعات پنجاب فیاض الحسن چوہان نے اپنے ردعمل وچ آکھیا کہ اک وقت سی جد مولانا فضل الرحمان عورت دی حکمرانی دے خلاف فتوے دیندے سن ، قسمت دی ستم ظریفی ویکھو، اج اوہی مولانا تھالی دے بینگن دی طرح بیگم صفدر اعوان ول لڑھک آئے نیں۔ مولانا فضل الرحمان آل شریف دی کرپشن، منی لانڈرنگ، اقربا پروری تے قوم نال بیوفائی نوں تحفظ دین لئی میدان وچ نکل آئے نیں۔فیاض الحسن چوہان نے آکھیا کہ ن لیگ، پیپلزپارٹی سمیت وڈیاں پارٹیاں دو دن دی کا ل اُتے موچی دروازے، لیاقت باغ تے نشتر پارک وچ لاکھاں دا مجمع اکٹھا کررہیاں سن ۔ اج اوہی پارٹیاں احتساب توں بچن لئی مولانا نواز شریف زرداری دا موڈھا لین اُتے مجبور نیں ، عوام نے2018دے الیکشن وچ وی تے لہور دے پہلے جلسے وچ وی اوہناں نوں مسترد کر کے اوہناں دی حیثیت یاد دلا دتی اے ۔ قانون دے دائرے وچ رہ کہ احتجاج کرن اُتے حکومت ولوںکوئی رکاوٹ کھڑی نہیں کیتی جائے گی، قانون ہتھاں وچ لین یا عدالتی، ریاستی تے جمہوری اداریاں دے خلاف ہرزہ سرائی دی صورت وچ قانون حرکت وچ آئے گا۔