کڑی الکڑیات

مسعود منور

توں گجھے بھیتاں دی گڈی
کلا کبوتر بن کے اڈی
تیرا عشق شرابوں چنگا
تیرا عطر گلابوں چنگا
تیرا ناں ، مِٹی دی خشبو
تیرا رنگ شہابوں چنگا
تیرے تن ، پوشاک دھنک دی
سینے زور ، چنابوں چنگا
توں دل دے محلاں دی رانی
توں پریاں ، حوراں دی ہانی
تیریاں بلھیاں چن دا نخرا
تیری اکھ دا موسم وکھرا
تیرا پنڈا کنک دا سونا
میں سونے دا ہار پرونا
موتیے دے پھلاں دی ٹاہنی
توں امبیاں دے باغ دی رانی
زلفاں وچوں تیریاں گلھاں
کالے ہڑ وچ ، رت دیاں چھلاں
جوڑے دا پھل، رات دی رانی
لکھے روز،پریت کہانی
تیری وینی دے وچ ونگاں
رب کولوں میں ہور کیہ منگاں
ونگاں چھن چھن چھنکی جاون
لنگھیا ویلا یاد کراون
ہائے ہائے گلھاں دے وچ ٹوئیاں
تیری نتھ تے صدقے ہوئیاں
تیرا روپ سروپ غضب دا
ایہہ کرتا، میرے تن تے تگدا
تیرا پھل ، مینوں مِٹھا لگدا
ایہہ میوہ کِتے ڈِٹھا لگدا
تیرے اجڑ دا میں چھیڑو
تیری گادھی دا میں گیڑو
توں کڑی الکڑیات ہیں میری
توں سدھراں دی رات ہیں میری