سیاسی لوٹے

اخلاق عاطف

نہ رہن آر ایہ لوٹے نہ جاسن پار ایہ لوٹے
کہ ڈب جانے سیاسی نہر دے وچکار ایہ لوٹے
سیاست نوں تجارت وانگ جہڑے ڈیل کردے نیں
اوہناں دی اقتداری سوچ دے شہکار ایہ لوٹے
ایہ جت کے سائیکل تے جا وڑے شیراں دے پنجرے چ
عوامی رائے دے قاتل نیں‘ کھجل خوار ایہ لوٹے
کہانی چھانگے مانگے دی ایہناں دہرا کے دسیا اے
مفاداتی کھڈونے نیں‘ بڑے عیار ایہ لوٹے
جلاوطنی چ جو‘ مالا اصولاں دی رہے جپدے
اوہناں ورگے نیں سگویں صاحب کردار ایہ لوٹے
ایہناں دی سوچ چنگی اے نہ ای اپروچ چنگی اے
حقیقت اے کہ ذہنی طور ہن بیمار ایہ لوٹے
مدینے مکّے جا کے وی جو ڈھڈوں پاک نہیں ہوئے
بتا لِتے نیں اوہناں فیر اج غم خوار ایہ لوٹے
جہناں نے سکھیا ای گند پانا‘ گند کرنا اے
اوہناں استنجیاں لئی کر لئے تیار ایہ لوٹے
عوامی رائے نوں رَد کے ایہناں جو روند ماری اے
عوامی ٹھڈے کھاون نوں رہن تیار ایہ لوٹے
ایہ دشمن بے نظیراں دے ایہ تاجر ضمیراں دے
کسے دے ہو نہیں سکدے کدی وی یار ایہ لوٹے
ایہناں کلیاں نہیں ڈبنا الیکشن دے سمے عاطف
شریفاں نوں وی لے ڈبن گے ادھ وچکار ایہ لوٹے