غزل

احسان رانا

گچھی مُچھی ڈور نہیں تے چنگا اے
بو کاٹے دا شور نہیں تے چنگا اے
پیراں ولے ویکھے گا فر روئے گا
پیلاں پاندا مور نہیں تے چنگا اے
مٹی دے اوچھاڑاں بارش منگنی سی
گنبد والی گور نہیں تے چنگا اے
اتھرو اتھرو تسبیح کردا ٹریا اے
جنگل آدم خور نہیں تے چنگا اے
اوہ ملیا تے تیجا جھاتی پاوے گا
بُکل دے وچ چور نہیں تے چنگا اے
چُپ بیٹھاں تے چپ وی گلاں کردی اے
کردا گل تے غور نہیں تے چنگا اے
قسمت تیرے گھر تک رانا آوے گی
کیڑی والی ٹور نہیں تے چنگا اے