ہڑھ دا پانی

سلیم نجمی

سوھنیا ربا معاف کریں توں
ساتھوں ہوئیاں جو خطاواں
ساڈے کندھاں کوٹھے رُڑھ گئے
لائیاں انج پانی نیں ڈھاواں
مال مویشی رڑھ گئے ساڈے
نالے رُڑھ گئے دھیاں پُت
حاکم ساڈے ہوئے پھردے
اج وی کرسی پچھے دُھت
ہڑھ دے پانی ککھ نئیں چھڈیا
نئیں کجھ چھڈیا سکا گِلا
سدھراں والی چنی رڑھ گئی
نالے رڑھ گیا گوٹا تے تِلا
نکے وڈے بڈھے ٹھیرے
پاندے پئے نیں حال دوہائیاں
ہریاں بھریاں فصلاں دے سنگ
رڑھ گئے دوہراں کھیس تلائیاں
ہڑھ بن کے مینہہ دے پانیا
بس کر ہن نہ اَتّاں چائیں
عرضاں کردا دم دم نجمی
سوہنیا ربا کرم کمائیں