غزل

جان کاشمیری

آپے رَل مِل موجاں مانن دُکھ اے سارا اینی گل دا
مینوں تیرا دشمن جانن دُکھ اے سارا اینی گل دا
ڈُبدے ڈُبدے ڈُب گئے تارے چن دی لَو وی گھٹدی جاوے
میرے گھر نہ ہویا چانن دُکھ اے سارا اینی گل دا
فرش وچھا کے کلیاں دا اوہ مورنی وانگوں پیلاں پاون
عاشق لوکی خاکاں چھانن دُکھ اے سارا اینی گل دا
خوف نہ کائی مرن توں مینوں وِچلی گل مَیں دسّاں تینوں
موت نہ لبھ دی اپنی ہانن دُکھ اے سارا اینی گل دا
ایرا غیرا نتّھو خیرا دنیا ویری اوہناں دی اے
پیار دے جیہڑے تمبو تانن دُکھ اے سارا اینی گل دا
روگ اولّڑا سینے لایا مار کے گجُّھی مار مُکایا
فیر وی مینوں غیر او جانن دُکھ اے سارا اینی گل دا
گل وچ جس دے عشق دی مالا جس دا ناواں میرا حوالہ
اوہدیاں اکھاں کدوں پچھانن دُکھ اے سارا اینی گل دا