سجرے پُھل

عارف شاہ پروہنا

آ جا دنیا نویں وسائیے
مڑ مڑ پچھے کاہنوں جائیے
بھل کے سب پرانیاں گلاں
چھڈ دیئے دہرانیاں گلاں
پیار دے سجرے پھل اگائیے
جنگاں کولوں رہیے بچ کے
رسیا یار منائیے نچ کے
ہر دم گیت امن دے گائیے
ہر پاسے خوشحالی ہووے
چہریاں اُتے لالی ہووے
دکھ درداں نوں دور نسائیے
نہ کوئی چھوٹا نہ کوئی وڈا
مک جاوے فیر سارا پھڈا
ہس ہس سب نوں سینے لائیے
آ جا دنیا نویں وسائیے
ہر کوئی بولے پیار دی بولی
ہیر نہ بیٹھے کھیڑے دی ڈولی
ہیر تے رانجھے دا میل کرائیے
غیر بنن کیوں ساڈے راکھے
لگیے نہ سامراج دے آکھے
اپنی گل اسیں آپ منائیے
ہر بندہ ہے آدم جایا
سب نیں اپنے کوئی نہیں پرایا
اک دوجے دا بھار ونڈائیے
دھرتی دا رب بش نہیں لوکو
جس تے کوئی وی خش نہیں لوکو
اوس توں جگ دی جان چھڈائیے
آئو دنیا نویں وسائیے