آٹے دی مٹھ عزتوں مہنگی

غلام شبیر عاصم

اج کل دی مہنگائی نے تے چِٹے دِن تارے وکھا دِتے نیں۔تے اس چِٹے دن دی لوئے نانی وی یاد کرا دِتی اے،بلکہ نانی والا ویلا یاد آگیا اے۔جدوں لوکاں وچ پیار،محبت،اِک دوجے دا احساس تے بھرا بندی ای زندگی ہندی سی۔کئی شیواں بھرا بندی تے مِلن ورتن وچ اِک دوجے نوں مفت ای مل جاندیاں سن۔آوندے جاندے لوک پیلیاں دِیاں وٹاں اتوں لنگھدیاں جِدی مرضی پیلی وچوں سبزی نال جھولی بھر لیندے تے کماد وچوں گنے توڑ کے چوپ لئیندے سن۔کوئی روکن ٹوکن تے پچھن والا نہیں سی ہندا۔تے ایس عمل پاروں خیال وچ کدی چوری یا بے ایمانی دا خیال وی نہیں سی کھٹکیا۔اندروں ضمیر مطمئن ہندا تے گواہی دے رہیا ہندا سی،ایہ سبزی تے ایہ گنا”گناہ” نہیں تیرا حق اے،توں حلال کھا رہیا ایں۔لگدا سی جِیویں ایہ سارے کھیت،فصلاں سب کچھ اپنا ای ہووے۔کدی ایہ خیال آیا ای نہیں سی،کہ ایہ پیلی،کماد،ساگ تے دوجیاں سبزیاں کِسے دِیاں نیں تے کوئی واج وی مارے گا۔یاں ہتھوں گنا تے جھولی چوں سبزی کڈھوا لئے گا۔خورے اوہدوں فصلاں تے عقلاں نوں محبت تے بھرا بندی دا بور لگدا سی۔خورے کھیتاں دے بنے بنے وٹاں اتے محبت،اپنائیت تے پیار بھرپن دے پھل کِھڑدے سن۔ہر کھیت ہر کسے نوں اپنا اپنا جہیا لگدا سی۔محبت تے ایکتا گھراں دے بنیریاں اتے چِڑیاں طرحاں چہکدی تے پھلاں طرحاں مہکدی سی۔
کِسے دے گھر کوئی پروہنا آوندا سی تے اوہ جِیویں پورے پِنڈ دا ای پروہنا ہندا سی۔پروہنے لئی ددھ،لسی مکھن وغیرہ مفتو مفت ای مِل جاندا سی۔اوہدوں کمینگی،بے اعتباری،بے حیائی تے بے صبری دا کِدھرے ناں نشان نہیں سی ہندا۔مہنگیائی دا لفظ تے کدی “ورتوں” وچ ای نہیں سی آیا۔کنک تے آٹا اوہدوں وی تے اج وی کھان والیاں جِنساں وچوں سب توں خاص تے مڈھلے طور تے ورتوں وچ آون والیاں جِنساں نیں۔ان پانی دی سب توں ضروری تے مڈھلی شے ہون دے باوجود وی آٹے ول کدی دھیان نہیں سی گیا،آٹا گِنن مِتھن وچ ای نہیں سی ہندا،اجکل طرحاں آٹا دکاناں تے وِکن والی شے نہیں سی ہندا۔ہتھ والی،تے بجلی والی چکی تے خراس توں مِل جاندا سی۔گلی محلے وچ برف دے گولے تے قلفیاں وِکن آوندیاں تے گھروں مٹن وچوں آٹا لے کے قلفیاں گولے تے کِھیلاں مرونڈے لے لئی دے سن۔ہور تے ہور آٹا یاں کنک دے کے پھل خرید لئی دا سی۔مِٹی دی بھٹھی تے شاماں ویلے مکئی،چول تے چھولیبھناون جائیدا سی تے اوتھے وی دانیاں دی بھنائی وچ آٹا ای دے کے آئی دا سی۔پر اج کل تے آٹا کِدھرے اسمانیں جا چڑھیا اے۔آٹا مہنگا ہون نال نان 30 روپے تے روٹی 16 روپیاں دی ہوگئی اے۔
2023 دے سال نے آوندیاں ای سانوں مہنگیائی دا تحفہ دِتا اے۔اجے تے پورا سال پیا ہویا اے پتہ نہیں اگوں کِیہ کِیہ وکھت ویکھنے نیں۔اجے تے نویں سال دی خوشی وچ چلائے گئے پٹاکے تے چھرلیاں دی واج وی کناں وچوں نہیں نِکلی تے مہنگیائی نے پھڑ کے غریباں دا جنازہ کڈھ دِتا اے۔آٹا تے ہور شیواں وی اینیاں مہنگیاں نیں کہ اسمانیں چڑھیاں پئیاں نیں۔پر آٹا مہنگا ہون نال غریب حدوں ودھ پریشان ہوگئے نیں۔بلکہ مہنگیائی پاروں گھراں وچ لڑائی جھگڑے تے خودکشی دیاں خبراں وی مِیڈیا تے آرہیاں نیں۔”متحدہ نان روٹی ایسوسی ایشن”دے نائب صدر وحید عباسی نے کہیا اے کہ 80 کِلو آٹے دا تھیلا 12 ہزار روپے دا مِل رہیا اے۔آٹا مہنگا خرید کے اسیں نان روٹی سستی نہیں ویچ سکدے۔دکھ والی اِک گل ایہ وی اے کہ ساڈے ملک وچ”چیک اینڈ بیلنس” ویکھن جاچن دا نظام وی نہ ہون دے برابر اے۔پِنڈاں تے چھوٹے شہراں اندر دکاندار مہنگیائی دے لفظ توں کم لیندے ہوئے سِدھے سادے تے غریب لوکاں نوں مل ہور ودھا چڑھا کے آٹا ہور مہنگا کردین گے،ایتھے ہر دکان دا اپنا بھا وی ہوگیا تے کِسے نے کسے نوں کوئی نہیں پچھنا۔ایسے لئی تے دکانداراں دے جھاکے لہہ گئیے تے غریباں دے “کھنے”کھل گئے نیں۔حکومت نے جیہڑا لوکاں نوں سستا آٹا دین دا رچاو رچایا ہویا اے،ایہ الیکشن مہم دے سوا کچھ وی نظرنہیں آرہیا۔لوک سارا سارا دن اک تھیلے آٹے دی خاطر ٹرک مگر لیناں وچ لگے تھک جاندے نیں۔کئی لوک ذلیل ہوکے خالم خالی گھراں نوں آ جاندے نیں۔جنانی مِیڈیا مطابق ایہ سرکاری کوٹے دا آٹا کوئی خاص معیاری تے اصلی نہیں ہیگا۔پوسٹمارٹم کیتے گئے مردے دی طرحاں سارے دل،گردے،پِھپھڑے وغیرہ کڈھن طرحاں ایس آٹے وچوں وی سب کچھ کڈھ کے فیکٹریاں دی رہند کھوند پِیہ کے ڈنگراں دی کھرلی وچ آٹے دی گتھی جھاڑن طرحاں لوکاں وچ آٹا ونڈ کے آوندے الیکشن لئی راہ پدھری کیتی جارہی اے۔
حکمراناں جیکر عوام نوں دِلوں نیتوں فیدا دینا اے تے پھر،پٹرول،گھیو، کھنڈ،گوشت تے سبزیاں وی سستیاں کیتیاں جان۔اِنج تے”آٹا لوکاں دِیاں اکھاں وچ پاون والی گل اے”۔اکِھیں گھٹا پایاں تے ووٹ نہیں لبھنے آٹا اکھیں پایاں روٹی سواد دی پکے نہ پکے ووٹ تے پکے ہون گے۔پاکستان دی تاریخ گواہ اے،ایتھے جیہڑا وی حکمران آیا اے کھیڈن ای آیا اے۔مسیحا یا لیڈر بن کے کوئی نہیں آیا۔آٹا،کھنڈ،گھیو تے دوجیاں ضروری شیواں بناون والیاں فیکٹریاں دے مالک تے اسمبلیاں اندر گھسے ہوئے نیں۔جِدوں جی کردا اے جیہڑی شے مرضی مہنگی کرکے دولت وی کٹھی کردے نیں۔حکومت یاں حکومت مخالف پارٹی لئی تنقید دا محاذ وی کھول کے اپنی سیاسی دشمنی تے مخالفت وی کٹدے نیں۔غریب عوام نال ہر کِسے نے ہر وار ہتھ ای کِیتا اے۔ایہ سیاستدان اِک دوجے دے خلاف تے اپنی حکومت دی واری لئی تاش دے پتیاں تے گیند دی طرحاں ہمیش توں عوام ناک کھیڈدے ای آئے نیں۔بلکہ آپس وچ”نہ کھیڈاں گے نہ کھیڈن دیاں گے” دے چکر وچ عوام نوں چکی وچ پِیہ کے رکھ دیندے نیں۔آٹے تے دوجیاں شیواں دی مہنگیائی نے جیہڑا حال کردِتا اے،جے ایہ اِنج ای رہیا تے پھر مجبوری ہتھوں،ڈِھڈ نچدی بھکھ پاروں مجبور ہوکے قوم دیاں دِھیاں بہناں تے نونہواں گھروں باہر، سڑکاں، چوکاں بازاراں تے بساں دے اڈیاں اندر”اڈے”چلاون تے پیشہ کرن تے مجبور ہوجان گیاں۔ڈرائیوراں تے کنڈیکٹراں دی درندگی ایہناں دی شرمندگی نوں کھا جائے گی۔اِک ویلے دی روٹی خاطر مجبور دِھیاں بہناں نوں گھروں باہر راتاں بھوگنیاں پین گیاں۔مٹھ آٹے دی متھاجی دِھیاں بہناں دیاں عزتاں وِکنے لا دوے گی۔بھکھ دے گملے اندروں بریائی تے نحوست دا زہری تے کنڈیالا چھتر تھوہر اگ آئے گا۔آو ایس چھتر تھوہر دی تھانویں عزتاں شرماں تے شرفاں دے پھل کِھڑائیے،گل تے مٹھ آٹے دی اے ناں؟ مناں مونہی سونے دی تے نہیں ناں۔پر جے رل گئی تے عزت گئی ہتھ نہیں آونی۔دھیاں بہناں تے نونہواں مانواں سب دیاں سانجھیاں ہندیاں نیں۔کچھ سوچو،پانی سروں نہ ٹپ جائے۔آون والی ایس تباہی نوں روکو یارو،کچھ سوچو یارو،گل تے مٹھ آٹے دی اے ناں۔پر اج ایہ آٹا جیویں عِزتوں مہنگا ہوگیا اے۔اج ساڈی عزت جیویں مٹھ آٹے دی مٹھ وچ اے۔ڈِھڈ دی شے آٹے نوں عزتاں لئی ناگ نہ بناو کچھ سوچو پردھانوں۔٭