شوگر مافیا تے پارلیمانی نظام

پاکستان وچ جے صدارتی نظام ہوندا تے ملک وچ مافیاز ایس قدر مضبوط کدی نہ ہوندے

قیوم نظامی

پارلیمانی نظام نے ریاست تے ریاستی اداریاں نوں بے بس کر کے رکھ دتا اے تے پاکستان اُتے مافیاز دا تسلط تے راج قائم ہو چکیا اے۔ ایس دی تازہ گواہی جہانگیر ترین نے پارلیمانی سیاسی چال چل کے دے دتی اے۔ جہانگیر ترین دے کول چونکہ سب توں زیادہ شوگر ملز نیں، ایس لئی ایہناں نوں شوگر مافیا دا سردار یا گرو قرار دتا جاندا اے۔ وزیراعظم عمران خان اپنی سیاسی ساکھ نوں قائم رکھن لئی گاہے بگاہے ایہہ بیان دیندے رہندے نیں کہ اوہ مافیاز دا ڈٹ کے مقابلہ کرن گے تے کسے نوں این اآر او نہیں دین گے۔ ذخیرہ اندوزی تے سٹے بازی دے نتیجے وچ جدوں چینی مارکیٹ وچ مہنگی ہو گئی تے وزیراعظم نے اک کمیشن قائم کیتا تاکہ شوگر مافیا نوں بے نقاب کیتا جا سکے۔ کمیشن دی رپورٹ دے بعد ایس دا فرانزک آڈت وی کرایا گیا سی تاں جے کسے قسم دا ابہام باقی نہ رہوے۔ انکوائری رپورٹ وچ ایہہ انکشاف کیتا گیا کہ شوگر سکینڈل وچ جہانگیر ترین، مونس الٰہی، عمر شہر یار، اومنی گروپ تے شریف گروپ شامل نیں جنہاں نے 110 ارب روپئے دا فراڈ کیتا اے۔ وزیراعظم نے ایس رپورٹ توں بعد ایف آئی اے نوں حکم دتا کہ اوہ ملزمان دے خلاف قانونی کاروائی کرے۔ ایف آئی اے لہور دے ڈائریکٹر محمد رضوان دی سربراہی وچ اک کمیٹی قائم کیتی گئی جس نے دن رات دی محنت توں بعد دستاویزی شہادتاں اکٹھیاں کیتیاں تے تفتیش مکمل ہون توں بعد ملزماں دے خلاف ایف آئی آر درج کرا دتی۔ شوگر مافیا نوں اپنے مفادات خطرے وچ آن لگے تے اوہناں نے بڑی کامیابی دے نال پارلیمانی کارڈ کھیڈیا۔ جہانگیر ترین نے وزیراعظم نوں دبائو وچ لیان لئی 30 اراکین اسمبلی نوں جمع کیتا تے حکومت نوں ایہہ پیغام دے دتا کہ وفاق تے پنجاب دی حکومتاں دونویں ایہناں دے قبضے وچ نیں۔ جے شوگر مافیا نوں دبان دی کوشش کیتی گئی تے تحریک انصاف صوبائی تے مرکزی حکومتاں توں محروم ہو سکدی اے۔پاکستان وچ جے صدارتی نظام ہوندا تے بلیک میلنگ دی ایہہ صورت حال پیدا نہیں ہو سکدی سی کیوں جے صدر براہ راست عوام دا منتخب شدہ ہوندا اے تے اوہ پارلیمنٹ دے بجائے عوام نوں جواب دہ ہوندا اے۔ پارلیمانی نظام دی وجہ نال وزیراعظم عمران خان دبائو وچ آ گئے تے اوہناں نے جہانگیر ترین دے ہم خیال گروپ نوں ملاقات دا ویلا دے دتا۔ ایس ملاقات توں پہلے ایف آئی اے دے ڈائریکٹر محمد رضوان نوں پیغام گھل دتا گیا کہ اوہ شوگر سکینڈل دے سلسلے وچ مزید کاروائی روک دین۔ وزیراعظم عمران خان نے جہانگیر ترین دے ہم خیال گروپ نال ملاقات دے دوران اپنے ووٹ بینک نوں محفوظ رکھن لئی سخت لہجہ اختیار کیتا تے ایہہ کہیا کہ اوہ اقتدار چھڈ سکدے نیں۔ پر کسے توں بلیک میل نہیں ہون گے یا دوجے لفظاں وچ اوہ ایہہ کہہ رہے سن کہ اوہ اپوزیشن سنے اپنے ہم خیال دوستاں نوں وی این آر او نہیں دین گے۔ جہانگیر ترین نے شہزاد اکبر نوں ٹارگٹ کردے ہوئے کہیا سی کہ اوہ کجھ لوکاں دے اشارے اُتے جہانگیر ترین نوں سیاسی انتظام دا نشانہ بنا رہے نیں تاں ایہناں نوں شوگر سکینڈل دی انکوائری توں الگ کر دتا جائے۔ وزیراعظم عمران خان نے ایہناں دا ایہہ مطالبہ وی من لیا تے اپنے معاون خصوصی بیرسٹر علی ظفر نوں ایہہ ذمہ داری دتی اے کہ اوہ شوگر سکینڈل دے سلسلے وچ ساری کاروائی دا جائزہ لے کے وزیراعظم نوں رپورٹ دین کہ کیہ جہانگیر ترین دے تحفظات تے خدشات درست نیں۔
پاکستان دے عوام کمزور تے مایوس ضرور نیں البتہ ایہہ جان دے نیں کہ جہانگیر ترین کلے نہیں بلکہ ایہناں نوں شوگر مافیا دے سارے گروپاں دی حمایت حاصل اے۔ نویں سال دے قومی بجٹ دی وجہ نال حکومت پہلے ای دبائو وچ اے تے ایس اندیشے وچ مبتلا اے کہ ایس موقعے اُتے اپوزیشن تحریک انصاف دی حکومت نوں ڈیگن لئی مختلف ہتھکنڈے استعمال کر سکدی اے۔ ایہناں حالات وچ جہانگیر ترین نے پارلیمانی سیاسی چال چل کے وزیراعظم عمران خان نوں مزید پریشان کر دتا اے۔ پاکستان وچ جے صدارتی نظام ہوندا تے ملک وچ مافیاز ایس قدر مضبوط کدی نہ ہوندے۔ ایہناں مافیاز نے پارلیمنٹ نوں یرغمال بنا رکھیا اے۔ شوگر ملز چلان والے خاندان پارلیمنٹ وچ بیٹھے نیں تے پارلیمانی طاقت ایہناں دے ہتھ وچ اے، اوہ جدوں چاہن جس ویلے چاہن حکومتاں نوں ڈیگ سکدے نیں۔ پارلیمانی نظام دی بنا اُتے جس طرح حکومتاں نوں بلیک میل کیتا جا رہیا اے ایس دا پورا ریکارڈ سرکاری فائلاں وچ موجود اے۔پارلیمانی نظام وچ عوام لاوارث ہو چکے نیں تے ایہناں نوں بنیادی حقوق حاصل نہیں۔ پاکستان دے بانی قائداعظم محمد علی جناح پارلیمانی نظام دے خلاف سن تے پاکستان لئی صدارتی نظام نوں مناسب تے موزوں سمجھدے سن۔ گورنر جنرل پاکستان دی حیثیت نال اوہناں نے جس طرح حکومت چلائی اوہ وی پارلیمانی نہیں بلکہ صدارتی نظام وانگوں سی جد کہ ہندوستان وچ وزیراعظم نہرو نے پارلیمانی نظام چلایا البتہ ایس نے ہندوستان وچ زرعی اصلاحات نافذ کر کے پارلیمانی جمہوریت دے رستے وچ سب توں وڈی رکاوٹ نوں ختم کر دتا۔ پاکستان دی وفاقی کابینہ نے قائداعظم نوں باضابطہ طور اُتے تحریری اختیار دتا سی کہ اوہ فادر آف نیشن ہون دی حیثیت نال ریاست دے امور نوں گورنر جنرل دی حیثیت وچ صدارتی نظام وانگوں چلا سکدے نیں۔ جے قائداعظم پارلیمانی نظا م دے حق وچ ہوندے تے اوہ خود پاکستان دے وزیراعظم بن جاندے یا پاکستان دے پہلے وزیراعظم لیاقت علی خان نوں ریاست دے مکمل اختیارات استعمال کر دیندے۔ قیام پاکستان توں بعد جے قائداعظم پاکستان نوں صدارتی نظام دی طرح نہ چلاندے تے بھارت خدانخواستہ پاکستان نوں دوبارہ ہندوستان دا حصہ بنان وچ کامیاب ہو سکدا سی۔ آزادی دے بعد پاکستان نوں اک مضبوط، باوقار تے قابل اعتماد قائد دی لوڑ سی جیہڑا قائداعظم دے علاوہ ہور کوئی نہیں ہو سکدا سی۔ حقیقت ایہہ وے کہ پارلیمانی نظام دی وجہ نال ریاست دا گورننس سسٹم ای مفلوج ہو چکیا اے، پاکستان وچ مسکڈ اکانومی دا نظام رائج کرنا پئے گا تاں جے معاشی توازن قائم رہے تے مافیا اجارہ داری تے بالادستی حاصل نہ کر سکے۔ مکسڈاکانومی دے بغیر پاکستان دے عوامی دے مفاد دا تحفظ نہیں کیتا جا سکدا۔ جے اج پاکستان دی ادھی شوگر ملاں ریاست دے کنٹرول وچ ہوندیاں تے موجودہ سیاسی تے معاشی بحران کدی پیدا نہ ہوندا تے عوام نوں مناسب ریٹ اُتے چینی وافر مقدار وچ دستیاب ہوندی۔