پنجاب دے جنوبی حصے دے عوام لئی صاف پانی دی فراہمی سنے گورنر پنجاب دا 1400 ملین روپے دے 508 منصوبیاں دا اعلان

آب پاک اتھارٹی دے زیر اہتمام مشکلات دے حل لئی راجہ بشارت دی چیئر مین شپ وچ اک کمیٹی تشکیل، طیب اردگان ہسپتال تے فلٹریشن پلانٹس دا افتتاح

ندیم بسرا

سال ہا سال توں ترقی توں محروم پنجاب دے جنوبی حصیاں ول پاکستان تحریک انصاف نے وسائل دا رخ موڑدے ہوئے وڈے منصوبیاں دا آغاز کر دتا اے۔ دوجے پاسے بجٹ وچ وی وڈی رقماں مختص کردے ہوئے جنوبی پنجاب وچ ترقیاتی کماں توں پورے خطے دی قسمت نوں بدلن دا مصمم ارادہ وی ظاہر کیتا اے،ایس گل توں کسے طور اُتے انکار نہیں کیتا جا سکدا کہ تحریک انصاف دی حکومت نے بجٹاں وچ وڈا حصہ پنجاب دے جنوبی حصے نوں دتا اے تے ایس نال عوام وچ خوشی دی لہر وی موجود اے، وزیر اعظم عمران خان، ایہناں دی کابینہ تے ایہناں دے پنجاب وچ وفاقی نمائندے گورنر پنجاب چودھری محمد سرور تے پنجاب حکومت نے وی اپنی توجہ پنجاب اُتے مرکوز کردے ہوئے ارباں روپئے مختص کردے ہوئے وڈے تے فائدہ مند منصوبیاں دا آغاز کر دتا اے جس نال پنجاب دی عوام دی زندگی وچ آسانی تے یکسر تبدیل وی پیدا ہوئے گی۔ ایس سلسلے وچ وزیراعظم عمران خان نے پنجاب حکومت نوں خصوصی طور اُتے احکامات صادر کیتے سن کہ ایس مالی ورھے دے بجٹ وچ زیادہ تر حصہ پنجاب دے جنوبی حصے نوں دے کے علاقہ دی سطح دی ترقی نوں یقینی بنایا جائے تاکہ عوام وچ پائی جان والی شدید بے چینی تے محرومی نوں دور کیتا جا سکے۔ ایس سلسلے وچ وزیر خارجہ شاہ محمود قریشی نے وی ملتان وچ ڈیرے پاندے ہوئے ہفتے وچ تن دن اپنے علاقے دے مسئلیاں نوں دور کرن لئی بیٹھک لانا شروع کر دتی اے تے بھرپور انداز وچ عوامی مسئلیاں نوں حل وی کر رہے نیں۔ گورنر پنجاب چوہدری محمد سرور نے ملتان دے دوروزہ دورہ دے دوران عوام لئی آب پاک اتھارٹی دے 1400 ملین روپئے توں ودھ لاگت توں 508 منصوبیاں دا اعلان کیتا کیوں جے جنوبی پنجاب نال تعلق رکھن والی عوام چنگی طرح جان دے نیں کہ ایس علاقے وچ صاف پانی دی کنہی لوڑ اے۔ گورنر پنجاب دی آب پاک اتھارٹی نوں متحرک کرن تے ایس دوران آن والی مشکلات نوں حل کرن دے حوالے نال کوششاں کسے توں لُکی نہیں ایس دے پچھے ایہناں دا اک ای مقصد تے ویژن اے تے اوہ پنجاب دے ہر گھر وچ صاف پانی اپڑانا چاہندے نیں تے ایس خواب لئی اوہ اپنے آپ نوں مکمل طور اُتے وقف کیتے ہوئے۔ ایس حوالے نال حال ای وچ اک میٹنگ دے دوران گورنر پنجاب چوہدری محمد سرور نے آب پاک اتھارٹی دے منصوبیاں اُتے عملدرآمد وچ تیزی لیان لئی اک کمیٹی تشکیل دے دتی اے تے وزیر قانون و کوآپریٹو پنجاب راجہ بشارت نوں کمیٹی دا چیئر مین مقرر کر دتا اے تاکہ فی الفور اتھارٹی نوں متحرک کیتا جا سکے۔ ایہہ کمیٹی آب پاک اتھارٹی دے جاری منصوبیاں وچ حائل رکاوٹاں دور کرن دے حوالے نال کم کرے گی تے جیہڑی جیہڑی مشکلاں در پیش ہون گیاں ایہناں نوں دور کردے ہوئے ایہناں دے دیرپا حل تے بہتر نتیجے برآمد کرن وچ اپنا کلیدی کردار ادا کرے گی۔ملتان دے ایس انتہائی اہم دورے دے دوران چوہدری محمد سرور نے طیب اردگان ہسپتال تے محلہ بلال مظفر گڑھ وچ وی فلٹریشن پلانٹس دا افتتاح کیتا تے ایس موقعے اُتے گل بات کردے ہوئے گورنر پنجاب نے کہیا کہ پنجاب دے سارے ضلعیاں وچ پنجاب آب پاک اتھارٹی دے ذریعے عوام نوں صاف پانی دین دا وعدہ ہر صورت پورا کرن گے۔ ساڈی حکومت دی خواہش اے کہ پورا پنجاب خاص طور تے جنوبی حصے دی عوام نوں صاف پانی ایہناں دی دہلیز اُتے فراہم کیتا جائے تاکہ آلودہ پانی توں پیدا ہون والے مسئلیاں اُتے قابو پاندے ہوئے قومی سطح اُتے صحت دے معیار نوں بہتر بنایا جا سکے۔ اوہناں نے کہیا کہ میں ویکھیا اے شہری صاف پانی توں محروم نیں جد کہ ایہناں دا حق اے کہ ایہناں نوں صاف پانی ہر صورت مہیا کیتا جائے۔ ایس وعدے نوں پور اکرن وچ ایہنوں پارٹی پروگرام دا حصہ سمجھدے ہوئے اپنی ذاتی و قومی حیثیت وچ بھرپور کردار ادا کراں گا۔ اوہناں نے مختار اے شیخ ہسپتال دا دورہ وی کیتا ۔ بیگم گورنر پنجاب چوہدری محمد سرور و چیئر پرسن سرور فائونڈیشن پروین سرور، وزیر توانائی، پنجاب ڈاکٹر اختر ملک، وزیر زراعت حسین جہانیاں گردیزی، احمد حسن ڈینرایم این اے، چیئر مین مختار اے شیخ ہسپتال فیصل مختار، سی ای او فاطمہ گروپ فواد مختار، معروف صنعتکار عارف حبیب، خالد کھوکھر تے عامر نسیم وی ایہناں دے نال سن۔ گورنر چوہدری محمد سرور نے ہسپتال دے مختلف شعبیاں دا وزٹ کیتا تے اپریشن تھیٹرز، وارڈز تے فارمیسی دا معائنہ کیتا۔ دورہ دے موقعے اُتے منعقدہ تقریب نال خطاب کردے ہوئے گورنر پنجاب چوہدری محمد سرور نے کہیا کہ انسانیت دی خدمت عظیم عبادت دا درجہ رکھدی اے۔ اوہناں نے کہیا کہ مختار اے شیخ دا خاندان انسانیت دی خدمت تے ملک دی ترقی وچ اہم کردار ادا کر رہیا اے۔ مختار اے شیخ تے سپرنگ ہسپتال دکھی انسانیت دی خدمت دی اک وڈی مثال نیں۔ گورنر پنجاب نے کہیا کہ مختار اے شیخ دے خاندان نے کرونا وبا نال نبڑن لئی وی حکومت دا ہتھ بٹایا۔ اوہناں نے کہیا کہ اہل ثروت شخصیات ملک دے غریب بندیاں دی مدد وچ اپنا بھرپور کردار ادا کرنا چاہیدا اے۔ گورنر پنجاب چوہدری سرور نوں ایس موقعے اُتے بریفنگ دیندے ہوئے دسیا گیا کہ مختار اے شیخ ہسپتال پنجاب دے جنوبی حصے دا سب توں جدیدہسپتال اے۔ ہسپتال دے ہیڈز دی استعداد نوں مرحلہ وار 500 بستریاں تیکر ودھایا جائے گا۔ بریفنگ وچ دسیا گیا کہ مختار اے شیخ ہسپتال وچ علاج معالجہ دے سارے شعبے قائم کیتے گئے نیں جیہڑے کہ بین الاقوامی معیار دی سہولتاں تے جدید آلات نال آراستہ اے۔ مختار اے شیخ ہسپتال وچ نرسنگ کالج دا اجرا ایسے سال کیتا جا رہیا اے جد کہ دوجے مرحلے وچ میڈیکل کالج وی قائم کیتا جائے گا۔ گورنر چوہدری محمد سرور نے کہیا کہ سرور فائونڈیشن تے مختار اے شیخ ویلفیئر ٹرسٹ مل کے ایس خطے وچ فلاحی کم سرانجام دین گے۔ بریفنگ وچ دسیا گیا کہ مختار اے شیخ ہسپتال وچ بیت المال دے اشتراک نال غریب بندیاں دا وی مفت علاج کیتا جا رہیا اے۔ گورنر پنجاب چوہدری رور نے کہیا کہ حکومت نوں عوام دے مسائل دا حقیقی معنیاں وچ احساس اے کرونا دی تباہ کاریاں نے پوری دنیا دی معیشت نوں وی متاثر کیتا جس نال وطن عزیز وچ وی مہنگائی ودھی ایس کڑے ویلے وچ عام بندے نوں ریلیف دین لئی زراعت تے صنعت سنے کلیدی شعبیاں وچ اصلاحات دا عمل تیزی نال جاری ا ے۔ اوہناں نے کہیا کہ وزیراعظم عمران خان کرپشن سنے ہر معاملے اُتے نوٹس لے کے آخری ایکشن لیندے نیں۔ چاہے ایس کاروائی دی زد وچ ایہناں دی اپنی ٹیم دا حصہ کوئی بندا کیوں نہ آندا ہوئے۔ ماضی وچ انج دی مثال نہیں ملدی جس وچ حکومتی وزرا نوں نیب نے طلب کیتا ہوئے۔ گورنر پنجاب دا کہنا سی کہ شفافیت نوں یقینی بنان لئی نیب سنے کسے ادارے اُتے حکومت دبائو نہیں تاں نیب اپنی پراسیکیوشن ونگ نوں مضبوط کرے تاکہ بلاامتیاز ہر کیس اپنے منطقی انجام تیکر اپڑے۔
گورنر پنجاب نے پچھلے دناں ملتان وچ وومن سنٹر متی تل دا دورہ وی کیتا۔ ایس دوران سنٹر وچ پنجاب ویمن پروٹیکشن اتھارٹی دی ہیلپ لائن 1137 دا وی افتتاح کیتا گیا۔ ایتھے پریس کانفرنس نال خطاب کردے ہوئے گورنر پنجاب نے کہیا ایس خطے دے عوام دا پرانا مطالبہ پورا کراں گے۔ گورنر پنجاب چوہدری محمد سرور نے وومن سنٹر وچ ہیلپ لائن دی افتتاحی تقریب نال خطاب کردے ہوئے کہیا کہ بدقسمتی نال خواتین دے خلاف جرائم نوں ماضی وچ سنجیدہ نہیں لیا گیا۔ یورپ وچ وی ہن تیکر خواتین اپنے حقوق دی جنگ لڑ رہیاں نیں۔ گورنر پنجاب نے کہیا کہ وومن سنٹر دے پلیٹ فارم توں خواتین دے خلاف جرائم روکن دی بھرپور مہم جاری اے۔ ساڈے معاشرے دیاں بیٹیاں تعلیمی سنے ہر میدان وچ کامیابی دے جھنڈے گڈ رہیاں نیں ایہناں نوں تحفظ بھریا ماحول دے کے مزید نتائج دی توقع کیتی جا سکدی اے۔ ایہناں دا کہنا سی کہ حکومت پنجاب نویں وومن سنٹرز دے قیام دے سلسلے وچ سنجیدہ اقدامات کر رہی اے تاکہ پنجاب دے جنوبی حصے وچ بچیاں نوں کسے طور وی عدم تحفظ دا احساس نہ ہون پائے۔ ایس موقعے اُتے چیئر پرسن وومن پراٹیکشن اتھارٹی کنیز فاطمہ چدھڑ نے کہیا کہ وومن سنٹر وچ اک چھت تھلے خواتین نوں تحفظ دے کے کیسز اُتے پیش رفت کیتی جاندی اے۔ ہیلپ لائن 1737 دے ذریعے خواتین نوں ایہناں دی دہلیز اُتے ریسکیو سروسز فراہم کیتیاں جان گیاں۔ وومن سنٹر دے سارے عملے دیاں تنخواہواں تے مراعات دا مسئلہ وی حل کر دتا گیا اے۔
گورنر پنجاب چوہدری محمد سرور نال وکلاء برادری تے ایل پی جی ایسوسی ایشن سنے تحریک انصاف دے وفود نے وی ملاقاتاں کیتیاں۔ ایس موقعے اُتے گل بات دے دوران گورنر پنجاب نے کہیا کہ وزیراعظم عمران خان دی قیادت وچ پاکستان معاشی ترقی سنے ہر شعبے وچ مضبوط ہو رہیا اے تے عوامی فلاح و بہبود دے منصوبیاں اُتے وی تیزی دے نال کم جاری اے۔ اوہناں نے دسیا حالیہ دورہ امریکہ تے پوری دنیا وچ ملاقاتاں دے دوران پاکستان دی حیثیت نال اوہناں نے کشمیر تے فلسطین دا مقدمہ لڑیا اے تے ایس دے دورس نتائج وی برآمد ہوئے نیں۔ اوہناں نے کہیا پاکستان دی ترقی تے خوش حالی دا راز ایس گل وچ پنہاں اے کہ اسیں پورے ملک دی ترقی وچ بغیر کسے تفریق دے سارے وسائل نوں بروئے کار لیاندے ہوئے فوری طور اُتے درست سمت وچ پیر چکدے ہوئے نکلن تاکہ دنیا دے ترقی دی رفتار نال قدم ملایا جا سکے۔ ایس صف وچ کھڑا ہون دلئی سانوں دن رات انتھک محنت کرنی ہوئے گی جس دے بعد قوم بین الاقوامی سطح دے ترقی دی دوڑ وچ شامل ہو جائے گی۔ اوہناں نے کہیا کہ میں اپنی گورنر شپ دا مقصد عوام دی خدمت بنا رکھیا اے تے گورنر ہائوس دے دروازے عوام لئی کھلے نیں ایہناں دے مسائل بروقت حل ہو رہے نیں تے میں اپنا بھرپور انداز وچ ادا کر رہیا واں۔ اوہناں نے کہیا کہ وزیراعظم عمران خان دا ویژن اے کہ اوہ پاکستان تے پاکستانی قوم پوری دنیا لئی مثال بنان تے اسیں ایس سفر اُتے گامزن ہون نوں آں۔ ایس سلسلے وچ ساری توجہ عوام دی خوشحالی اُتے مرکوز کردے ہوئے ارباں روپئے خرچ کیتے جا رہے نیں۔ جد کہ ساڈی حکومت نے سابقہ حکومتاں دی نسبت سادگی اختیار کر کے کارکردگی نوں بہتر بناندے ہوئے مثالاں قائم کیتیاں نیں۔ اوہناں نے کہیا کہ تعلیم دے شعبے وچ سارے مسائل نوں حل کر لیا گیا اے تے ہن مزید بہتری لئی کم کیتا جا رہیا اے جس نال آئندہ ورھیاں وچ تعلیم دا معیار بہتر ہوئے گا تے ایس دے دورس نتائج برآمد ہون گے۔
گورنر پنجاب نے ایس دوران ٹائمز انسٹیٹیوٹ دے زیر اہتمام تقریب وچ وی شرکت کیتی۔ انسٹیٹیوٹ نوں ڈگری ایوارڈ کرن دا درجہ ملن اُتے اوہناں نے طلبا تے انتظامیہ نوں مبارکباد دتی ۔ گورنر پنجاب چوہدری محمد سرور نے کہیا کہ حکومت تعلیمی میدان وچ نجی اداریاں دے کردار نوں بڑی اہمیت دیندی اے کیوں جے تعلیم دے فروغ وچ نجی سیکٹر بڑا اہم کردار ادا کر رہیا اے۔ ایس موقعے اُتے گورنر پنجاب نوں ٹائمز انسٹیٹیوٹ دے ریکٹر سرفراز مظفر نے بریفنگ دتی۔ گورنر پنجاب نے ایتھے انسٹیٹیوٹ دے بورڈ آف گورنرز دے اجلاس دی صدارت وی کیتی۔
اجلاس دے دوران گورنر پنجاب نوں دسیا گیا کہ انسٹیٹیوٹ وچ 7 فیکلٹی تے 21 ڈیپارٹمنٹس وچ کلاسز دا اجرا کیتا جا رہیا اے۔ ہائر ایجوکیشن کمیشن دی منظوری نال ادارہ ہذا وچ بی ایس، ایم فل تے پی ایچ ڈی کلاسز وی شروع کیتیاں جا رہیاں نیں۔ گورنر پنجاب نے واضح کیتا کہ ہائر ایجوکیشن کمیشن وچ لال فیتے دے خاتمے لئی موثر اقدامات کیتے گئے نیں۔ ساری یونیورسٹیاں وچ ایڈہاک سسٹم ختم کر کے مستقل وائس چانسلرز تعینات کیتے گئے نیں تاکہ معاملات وچ بہتری لیائی جا سکے۔ ایس موقعے اُتے گورنر پنجاب تے صوبائی وزیر توانائی ڈاکٹر اختر ملک نوں ا دارے ولوں یادگاری شیلڈز وی پیش کیتی گئی۔ پنجاب دے جنوبی حصے دی قسمت نوں بدلن دی راہ وچ ہن کسے نوں وی حائل نہیں ہون دیاں گے۔ گورنر پنجاب نے کہیا کہ میں ذاتی طور اُتے خواہش رکھنا واں کہ سارے ضلعیاں وچ شہریاں نوں صاف پانی، تعلیم ، صحت تے زندگی دے ہر شعبہ زندگی وچ ساریاں سہولتاں میسر آن تاکہ جنوبی پنجاب دی عوام وی قومی ترقی وچ اپنا حصہ ادا کر سکے۔