کرونا دی چوتھی لہر؟ کیوں تے کِنج؟

چودھری خادم حسین

این سی او سی دے سربراہ وفاقی وزیر اسد عمر نے تے باقاعدہ طور اُتے کہہ دتا کہ کرونا دے ایس او پیز دی خلاف ورزیاں دی وجہ نال عیدالاضحی دے موقعے اُتے سمارٹ لاک ڈائون نافذ کیتا جا سکدا اے۔ ایس توں پہلاں آپ وزیراعظم عمران خان نے کہیا کہ کرونا دی چوتھی لہر دا خدشہ اے جے عوام نے احتیاط نہ کیتی تے فیر پابندیاں ول جایا جا سکدا اے۔ وزیراعظم تے وفاقی وزیر دے ارشادات ہوا وچ اڑانا تے درست نہیں پر ایہہ پچھنا تے فرض ہوئے گا کہ حکومت نے جدوں حالات بہتر ہون اُتے پابندیاں وچ نرمی کیتی تے ایس توں پہلے اپنی سرکاری مشینری نوں خبردار کیتا کہ اوہ ہن پہلے توں کدھرے زیادہ دھیان نال خلاف ورزیاں نوں روکن لئی تیار رہن، عوام نال ایہہ شکوہ کہ اوہ ایس او پیز دی پرواہ نہیں کردے تے جے ایہناں دا وطیرہ ایہو رہیا تے فیر لاک ڈائون ول جانا پئے گا۔ ایس صورت وچ زیادہ موثر ہوندا جے حکومت اپنی مشینری نوں تیار کردی کہ بوہت زیادہ احتیا ط نال دیانت داری دے نال ایس او پیز اُتے عمل کرایا جائے پر ایتھے اِنج بالکل نہیں ہویا سب کجھ عوام اُتے چھڈ کے ایہناں توںای توقعات وابستہ کر لئیاں گئیاں نیں حالانکہ ایہہ امر وی بالکل واضح اے کہ عوام وچ شعور دی کمی اے جس دی کئی وجہ نیں۔ کجھ لوک پروپیگنڈے توں متاثر کہ سب جھوٹ اے تے کرونا دے ناں اُتے سیاست ہو رہی اے۔ ایس دا ثبوت اوہ آپ محترم اسد عمر دے ایس بیان نوں دسدے نیں، جیہڑے اوہ ہر انتخاب دے ویلے جاری کردے نیں۔ ایہناں دی درخواست ہوندی اے کہ انتخابی جلسیاں نال کرونا پھیلن دے خدشے نیں، ایس لئی انتخابات ملتوی کر دتے جان۔ انج ای اوہناں نے ہن آزاد کشمیر الیکشن کمیشن نوں کہیا تے لوک ایہو تاثر لے رہے نیں کہ اوہ انتخابات ملتوی کرانا چاہندے نیں ایس لئی مثال خود تحریک انصاف دی دتی جاندی اے جس دے وفاقی وزرا وی جلسے کر رہے نیں تے ہن ایہہ اعلان وی کیتا گیا کہ خود وزیراعظم عمران خان تحریک انصا ف دے چیئر مین دی حیثیت نال تن مختلف انتخابی جلسیاں نال خطاب کرن گے تے ایہہ پروگرام وی جاری کر دتا گیا۔ مسلم لیگ ن دا تے ایہہ کہنا اے کہ وفاقی وزیر نے انتخابات ملتوی کرن دی تجویز ایس ویلے دتی جدوں مریم نواز جلسیاں نال خطاب کرن جا رہیاں سن، نہیں تے گلگت، بلتستان دے انتخابات وی تے ہو گئے سن تے ایہناں دے بعد ای توں کرونا دی حالت بہتر ہوئی، چنانچہ انج دے بیان نوں سیاسی وی بنا دتا گیا۔
میں ایہناں خدشات توں انکار نہیں کراں گا، پر ایہہ عرض کرن دی جسارت ضرور کرنا واں کہ جے ہن چوتھی لہر آئی یا موجودہ حالت وچ بہتری دی بجائے ابتری پیدا ہوئی تے ایس دے ذمہ دار سرکاری اہلکار ہون گے تے ایہناں دی لاپرواہی، غفلت تے فرائض دی عدم ادائیگی دا بوجھ براہ راست صوبائی تے وفاقی حکومتاں اُتے ہوئے گا کہ ایہناں اہلکاراں توں کم کیوں نہیں لیا جا رہیا۔ اعلان تے کیتے جاندے نیں پر عمل کیہ ہوندا اے؟ ایس سلسلے وچ اک مثال عرض کر دینا واں، اوہ ایہہ کہ فیڈر روٹ سپیڈو بس، میٹرو بس تے میٹرو اورنج ٹرین وچ ماسک دے بغیر سفر دی مکمل ممانعت اے۔ بساں تے ٹرین دے باہر وی لکھیا ہویا اے کہ ماسک دے بغیر سفر منع اے۔ ایس دے علاوہ بس تے ٹرین وچ کمپیوٹر دے ذریعے ایہہ وی اعلان کیتا جاندا اے کہ بس یا ٹرین وچ سفر دے دوران ماسک اتارنا منع اے۔ خلاف ورزی اُتے لکھاں روپئے جرمانہ کیتا جا سکدا اے۔ ایس اعلان دی کھلم کھلا خلاف ورزی انج ہوندی اے کہ چار، پنج فی صد مسافر ماسک دے بغیر سوار ہو جاندے نیں ایہناں نوں روکیا نہیں جاندا کہ کنڈکٹر بروقت ان نہیں کردے شاید ایہناں لئی ممکن نہیں۔ بہرحال جدوں اوہ متوجہ ہو کے انج دے مسافر توں ماسک دے بارے وچ دریافت کردے نیں تے اوہ انکار کر دیندے نیںفیر ایس مسافر نوں اتارنا مشکل ترین عمل اے۔ ایسے طرح ماسک والے حضرات باہر توں ماسک پا کے سوار ہوندے تے اندر آ کے اطمینان نال ماسک اتار دیندے نیں تے فیر انج ای سفر ہوندا اے۔ کجھ کنڈکٹر ماسک لئی اصرار کردے نیں تے کجھ مسافر عمل کردے تے اکثر نہیں من دے۔ انج ایہہ پابندی نہیں کیتی جاندی تے فیر مسافراں دی تعداد وی زیادہ ہوندی اے ، خصوصاً مصروف روٹ اُتے بس بھر جاندی ا ے۔
ایہہ تے بس تے ٹرین دا عمومی ماحول اے۔ بازاراں تے رہائشی علاقیاں دی حالت ہور وی خراب اے کہ ایتھے نوے فیصد بندے احتیاط نہیں کردے، حالانکہ پچھلے دناں جدوں پچھ گچھ ہو رہی سی تے اکثریت ماسک دی عادی ہو گئی سی۔ ایہناں وچوں ہن وی وڈی تعداد پابندی کر رہی اے تاں ایہہ حضرات ایہناں نوں نظر آندے نیں آئو ذرا میرے نال چلو، میں تہانوں روزمرہ دے حالات توں آگاہ کراں، میری رہائش مصطفےٰ ٹائون وحدت روڈ اُتے اے سویرے دفتر جان لئی نکلاں تے سب توں پہلے گندگی دے ڈھیراں نال واسطہ پیندا اے۔ فیر جے کوئی سودا لینا ہوئے تے کوئی وی دکاندار ماسک پائے نظر نہیں آندا ایس حالت وچ، میں ماسک دے نال عجیب بندا نظر آنا واں، ایس دے بعد سڑک اُتے سفر کردے ہوئے ایہہ احساس ہوندا اے کہ میں کسے کچی آبادی وچ آ گیا واں، سڑک تے ٹٹ کے گڑھے بن ای گئے نیں پر ساڈے والے تے دوجے بلاکاں دیاں سڑکاں دے کنارے والے گھراں دی گرین بیلٹس، پختہ فرش یا گیراج بن چکے یا بن رہے نیں ایہہ سب ایل ڈی اے دی مہربانی اے۔ ایہناں بلاکاں وچ ای دکاناں نوں فیس یا نذرانہ لے کے کمرشل کر دتا گیا اے چلو ایہنوں ایتھے رہن دیو ، ذرا اگے ودھو تے مرکزی سڑک دے پہلے ای اج کل قربانی لئی لائے گئے جانوراں (بکرے، گائے، اونٹ) دے کئی ریوڑ نظر آ جاندے نیں۔ ایہہ تھاں بکر منڈی دی شکل اختیار کر چکی اے تے ہن تیکر اے۔ ایہناں نوں کوئی روکن والا نہیں تے جو کوئی روکے اوہ ”مٹھی گرم“ کرن لئی انج کردا اے، ایہناں دا کم چلدا رہندا اے۔
مصطفےٰ ٹائون دی مرکزی سڑک دو رویہ اے، ایہناں سڑکاں دے وچکار بوہت چوڑی گرین بیلٹ اے ایس وچ درخت وی نیں پر تھا ں تھاں گنجی ہو چکی جس دی وجہ وی سرکاری اہلکاراں دی لاپرواہی اے کہ ایہہ گرین بیلٹ باقاعدہ چراگاہ بن چکی اے دن دے 10 وجے توں 11 وجے دے دوران ایس وچ 20-25 مویشی جگالی کردے نیں۔ دوپہر دے بعد دوجا گوالہ اپنی مجھاں لے آندا اے تے مغرب توں پہلے واپس لے کے جاندا اے ایس دے علاوہ جھگیاں والے چھترے پالدے نیں تے ایہناں دی خوراک وی ایسے گرین بیلٹ نال پوری ہوندی اے۔ گرین بیلٹ وچ دو تن تھاں باقاعدہ تجاوز کر کے قبضہ کیتا گیا، کدھرے گڈیاں پارک ہوندیاں نیں تے کسے تھاں گارڈ بیٹھدے نظر آندے نیں۔ ایہہ تجاوزات انج دیاں نیں کہ کھلے بنداں ہوئیاں ہور نظر آ رہیاں نیں ایہناں نوں کوئی نہیں پچھدا، ایسے طرح وحدت روڈ دے دونواں کناریاں اُتے تعلیمی اداریاں تے شادی گھراں دی بھرمار اے۔ ایہنا ں سب نے گرین بیلٹ ای نوں پارکنگ بنا رکھیا اے۔ صبح شام گڈیاں نظر آندیاں نیں اج تیکر ایہناں دے خلاف کوئی کاروائی نہیں ہوئی، گرین بیلٹاں دے جنگلے چوری ہو چکے ، کندھاں ڈگ گیاں، محکمے بے خبر نیں۔
کرونا دے حوالے نال ایہہ وی عرض کراں کہ زیادہ تر دینی مدرسیاں دے طالب علم تے آپ مدرس احتیاط نہیں کردے ایسے طرح اکثر پرہیز گار حضرات لاپرواہی، مسیتاں وچ سماجی فاصلہ دی پرواہ وی نہیں کیتی جاندی، نماز جمعہ وچ حالات زیادہ خراب ہوندے نیں۔ ایہہ سب عرض کر دتا تے گزارش ایہہ مقصود اے کہ اعلان نال کم نہیں چلے گا، پابندی کرنا تے کرانا لازم اے، نہیں تے چوتھی کیہ، پنجویں لہر وی آ سکدی اے۔