خبر تے اخبار

حمید احمد سیٹھی

اک سکول دے فنکشن وچ تقریراں دے بعد اک طالب علم نوں اظہارخیال لئی موقع دتا گیا۔ دسویں کلاس دے اوس طالب علم نے صدر مجلس توں اجازت لئی کہ اوہ پارلیمنٹ دے بارے ایہ سوچ کے کہ بھاویں اوہدے استاد روزانہ طالب علماں نوں لفظی شرافت‘ اخلاق‘ نیکی‘ خوش اسلوبی‘ مراتب خوش کلامی‘ لڑائی مار کٹائی توں گریز تے اپنا نقطہ نظر شریفانہ انداز وچ دوجیاں تک اپڑان دی تلقین کردے نیں جد کہ ہر خاص و عام دے نمائندے گالھاں توں علاوہ اک دوجے دے خلاف زبان درازی ٹیلی ویژن راہیں ساری قوم تے دنیا نوں دکھاندے پائے جاندے نیں جو اک طرح نال قومی خصلت دا نمونہ ہوندا اے۔ طالب علم نے آکھیا کہ قوم دے منتخب نمائندے ہر خاص و عام خاص طور تے پڑھ رہے بچیاں لئی باعث تقلید ہونے چاہیدے نیں پر کجھ بندیاں دی قومی تے صوبائی اسمبلیاں دے محترم ممبر جہناں دی ذمے واری ملک لئی سیاسی‘ معاشی‘ اخلاقی‘ دینی‘ قنونی‘ ترقیاتی‘ تعلیمی‘ ملکی سلامتی تے انصاف لئی قنون سازی کرنا ای نہیں اوہناں سارے شعبیاں دی نگرانی وی لازم اے۔ اسمبلی ہال دے اندر ای بدزبانی‘ بدکلامی دے مرتکب ہون دے بعد ہتھی پین توں وی گریز نہیں کردے۔ ٹیلی ویژن دے ناظرین نے مخالف دھڑیاں نوں کھلے عام اک دوجے نوں بازاری گالھاں کڈھیاں تے جتیاں وی ماردے ویکھیا۔
اوس طالب علم دی گل اجے مکمل نہیں سی ہوئی کہ اک ہور طالب علم ہتھ اُچا کرکے صدر مجلس نال گل کرن داخواہش مند ہویا یعنی اجازت دا منگی۔ صدر مجلس کیوں جے ہیڈماسٹر سن ایس لئی اوہناں نے مسکرا کے اجازت دے دتی تے مقرر نوں آکھیا کہ خطاب مختصر ہونا چاہیدا اے۔ مقرر نے کہیا‘ جناب سویرے اخبار آ جاندا اے اوہدے توں ملکی حالات ناشتے توں وی پہلاں پتہ لگ جاندے نیں۔ اج اخبار دی ہیڈلائن سی کہ قومی اسمبلی میدان جنگ بن گئی۔ ایہ اسمبلی وچ بجٹ پیش کرن دا دوجا دن سی۔ ایس میدان جنگ دی لائیو کوریج جو ساری دنیا وچ ویکھی گئی گھٹیا تے جہالت دا نمونہ سی۔ طالب علم نے اینی ای تقریر کیتی سی کہ صدر مجلس نے اوہنوں آکھیا کہ ساڈا ملک نہ صرف ایٹمی طاقت سگوں اک اجہے بندے دی جدوجہد نال وجود وچ آیا اے جہنوں اسیں قائداعظم کہنے آں تے ملک بھاویں سست رفتاری نال پر ترقی ول گامزن اے۔
بھاویں ایس محفل وچ بہت سارے سینئز تجزیہ کار موجود سن پر اک ہور طالب علم نے اپنی کرسی توں اٹھ کے ہتھ کھڑا کرکے کجھ فقرے ادا کرن دی اجازت منگ کے کہیا کہ ساڈا ملک کدی کنک‘ چینی‘ گھیو‘ کپاہ تے دوجیاں کئی شیواں وچ خودکفیل ہون توں علاوہ برآمد وچ وی بہت اگے سی تے ایس ویلے ایہ شیواں باہروں خرید کے اوہناں نوں ایناں مہنگا کرکے غریباں دی ای نہیں ملازمت پیشہ لوکاں دیاں چیکاں کڈھ رہیا اے۔ اک بزرگ نے صاحب صدر اگے اٹھ کے اعتراض کیتا کہ حیرت دی گل اے کہ تجربہ کار معیشت داناں دی موجودگی وچ گل بات لئی تجزیہ کاراں نوں وقت دین دی تھاں اناڑی سکول طالب علماں نوں اظہارخیال لئی سارا وقت دتا جا رہیا اے جہدے تے اک طالب علم نے اجازت لے کے کہیا کہ اسیں ایتھے حاضر ہو کے سیاست کرن دی تھاں سچ کہن دی کوشش کر رہے آں۔ اسیں تے صرف حقیقت حال تے اظہار خیال کرن لئی گروپ بنا کے اکٹھے ہوئے آں۔
ہن اک نہیں تن چار طالب علم اکٹھے ہتھ کھڑے کرکے اٹھ کھلوتے جہدے تے صاحب صدر نے کہیا انج لگدا اے کہ اج طلباء دا ای دیہاڑ رہوے گا۔ اک طالب علم نے کہیا جو کرپٹ حکمران ڈھڈ بھرن توں ودھ کھاندے نیں اوہ اپنے چمچیاں نوں وی کھلاندے پلاندے نیں دوجے طالب علم نے اک ہور اخبار دی ہیڈلائن پڑھی جہڑی ایس طرح سی کہ حکمران کرپٹ ہون تے ملک دیوالیہ ہو جاندے نیں۔ اک طالب علم نے اخبار لہرا کے حمزہ شہباز دا بیان سنایا عمران دی سونامی نے ملک تباہ کر دتا اک ہور طالب علم نے شہبازشریف دا اخباری بیان سنایا لوکاں دی جیب خالی بجٹ جعلی۔ اک طالب علم نے اخبار لہرایا تے چیف جسٹس دا بیان پڑھ کے سنایا۔ کراچی خلاف وڈی سازش ہوئی شہر تباہ کر دتا گیا۔ اخبار دا تے کم ای چنگی ہووے یاں بھیڑی خبر قارئین تک اپڑانا اے پر جس قسم دی حکومت تے حزب مخالف ساڈے ملک وچ ایس ویلے موجود اے اوہناں دا تے کم ای اک دوجے نوں وڈھ کھانا اے۔ اتفاق نال عدالت وچ زیرسماعت ایون فیلڈ تے العزیزیہ مقدمے جہناں وچ نوازشریف نوں دس تے ست ورھے دی سزا ہوئی اوہناں خلاف فیصلہ آ گیا اے۔ دوویں اپیلاں خارج تے سزاواں بحال یعنی نوازشریف تے اوہدے حواریاں لئی اجے بھیڑا ویلا اے۔(بشکریہ ایکسپریس)