ٹیسٹ کرکٹ کھیڈن والے ’’جڑواں بھائی‘‘

پاکستان وچ سگے بھرا تے اکٹھے انٹرنیشنل کرکٹ کھیڈدے رہے پرجڑواں بھراواں دے اکٹھے کھیڈن دی کوئی مثال نہیں ملدی

تحریر : عبدالحفیظ ظفر

ایس مضمون وچ اسیں اپنے معزز قارئین نوں ایہناں جڑواں بھراواں دے بارے وچ دساں گے جیہڑے ٹیسٹ کرکٹ کھیڈ دے رہے نیں ایہہ قدرت دے کمالات نیں کہ ایہناں جڑواں بھراواں نے اپنا کرکٹ کیریئر کامیابی نال مکمل کیتا۔ ایتھے ایس گل دا تذکرہ وی ضروری اے کہ جڑواں بھیناں نے وی ٹیسٹ کرکٹ کھیڈی تے کافی شہرت حاصل کیتی پر ایس مضمون وچ صرف جڑواں بھراواں دا ذکر ہوئے گا جنہاں نے کرکٹ وچ ناں کمایا۔
1-سٹیووا‘ مارک وا
ؔآسٹریلیا نال تعلق رکھن والے و ابرادرا ن نے اک لمبے ورہے تیکر اپنے تیکر دلکش کھیڈ نال کرکٹ شائقین نوں محفوظ کیتا۔ 1991وچ پہلی وار انج ہویا جدوں دو جڑواں بھراواں سٹیووا تے مارک وا نے ٹیسٹ میچ حصہ لیا۔ کہیا جاندا اے کہ سٹیووا اپنے بھرا مارک وا توں پنج منٹ وڈے نیں۔ سٹیووا دا پورا ناں سٹیفن وااے۔ دونواں بھراواں نے جیہڑا اکٹھے پہلا ٹیسٹ کھیڈیا اوہ ویسٹ انڈیز دے خلاف سی جیہڑا 5 اپریل 1991 نوں ٹرینڈڈ وچ شروع ہویا ۔ آسٹریلیا تے ویسٹ انڈیز دے وچکار سیریز دا ایہہ تیجا ٹیسٹ سی جیہڑا بغیر کسے نتیجے دے ختم ہو گیا۔ سٹیووا نے پہی انگز وچ 26 سکور بنائے جد کہ دوجی اننگز وچ ایہناں نوں بلے بازی دا موقع نہ مل سکیا مارک وا نے پہلی اننگز وچ 64 سکور بنائے۔ آسٹریلیا پہلی اننگز وچ 294 سکور بنا کے آئوٹ ہو گیا جد کہ ویسٹ انڈیز ایس دے جواب وچ 227 سکور بنا سکیا ایس طرح آسٹریلیا نوں 67 سکور دی سبقت حاصل ہو گئی۔ دوجی اننگز وچ آسٹریلیا نے تن وکٹاں اُتے 123 سکور بنا کے اننگز ڈیکلیئر کرن دا اعلان کر دتا۔ دونواں بھراواں نے 108 ٹیسٹ میچ اکٹھے کھیڈے۔ سٹیووا نے پہلا ٹیسٹ می 1985 وچ ’’باکسنگ ڈے‘‘ دے موقعے اُتے بھارت دے خلاف کھیڈیا جد کہ مارک وا نے پہلا ٹیسٹ 1991 وچ انگلینڈ دے خلاف اوول وچ کھیڈیا پر دونواں بھراواں نے جیہڑے پہلے ٹیسٹ اکٹھے کھیڈے اوہ 1991 وچ ویسٹ انڈیز دے خلاف سی۔ سٹیووا نے بوہت عرصے تیکر آسٹریلوی ٹیم دی کپتانی کیتی تے ایہناں دا شمار آسٹریلیا دے بہترین کپتاناں وچ ہوندا اے۔ اوہ ایس آسٹریلوی ٹیم دے کپتان سن جس نے 1999 دا ورلڈ کپ جتیا۔
2 جون 1965 نوں آسٹریلیا وچ پیدا ہون والے سٹیووا نے 168 ٹیسٹ تے 325 اک روزہ میچز کھیڈے۔ ٹیسٹ میچز وچ اوہناں نے 1.51 سکور دی اوسط نال 10927 سکور بنائے جد کہ اک روزہ میچز وچ اوہنا ں نے 9.32 سکور دی اوسط نال 7569 سکور اپنے ناں کیتے۔ ایس توں ثابت ہوندا اے کہ سٹیووا دا ٹیسٹ ریکارڈ اک روزہ میچز دے ریکارڈ توں خاصا بہتر اے۔ اوہناں نے کائونٹی کرکٹ وی کھیڈی۔ ٹیسٹ کرکٹ وچ اوہناں نے 32 سنچریاں تے 50 نصب سنچریاں بنائیاں جد کہ اک روزہ میچز وچ ایہناں دی سنچریاں دی تعداد تن سی۔ اوہناں نے 45 نصف سنچریاں وی اپنے ناں کیتیاں۔ اک ٹیسٹ اننگز وچ ایہناں دا زیادہ توں زیادہ انفرادی سکور 200رہیا جد کہ اک روزہ میچز وچ ایہہ سکور 120 ناٹ آئوٹ سی۔ سٹیووا میڈیم پیس بائولنگ وی کراندے رہے۔ٹیسٹ وچ ایہناں دی وکٹاں دی تعداد 92 سی تے اک روزہ میچز وچ ایہہ تعداد 195 رہی۔1987 دے ریلائنس ورلڈ کپ وچ اوہ آسٹریلوی ٹیم دا حصہ سن تے ایہناں نوں آل رائونڈر دی حیثیت نال شامل کیتا گیا سی۔ سیمی فائنل وچ جس آسٹریلوی ٹیم نے پاکستان نوں ہرایا، سٹیووا ایس وچ شامل سن۔ پاکستان دی ایس غیر متوقع شکست نے پورے ملک نوں سوگوار کر دتا۔ پاکستان ایس ٹورنامنٹ دی فیورٹ ٹیم سی بہرحال ایس میچ وچ وی سٹیووا بلے بازی دے نال بائولنگ وی کردے نظر آئے۔ البتہ بائولنگ وچ ایہناں دی اوسط کوئی اینی قابل رشک نہیں رہی۔ اوہناں نے ٹیسٹ میچز وچ 44.37 تے اک روزہ میچز وچ 67.34 سکور دی اوسط نال وکٹاں حاصل کیتیاں۔
سٹیووا بڑے مضبوط اعصاب دے مالک سن۔ ایس دا سب توں وڈا ثبوت 1999 دا ورلڈ کپ سیمی فائنل سی جیہڑا آسٹریلیا دے خلاف کھیڈیا گیا۔ آسٹریلوی ٹیم صرف 213 سکور بنا کے آئوٹ ہو گئی۔ جنوبی افریقہ لئی ایہہ ہدف حاصل کرنا کوئی مشکل نہیں سی پر آسٹریلوی بائولرز تے کپتان ہمت تے حوصلے دی چٹان بن گئے۔ سٹیووا نے آہنی اعصاب دا مظاہرہ کیتا تے ایہہ میچ ٹائی ہو گیا۔ ایس ویلے دے برق رفتار بائولرز نوں وی اوہ بڑے حوصلے تے اعتماد دے نال کھیڈدے سن البتہ ایس حقیقت توں کوئی انکار نہیں کر سکدا کہ شعیب اختر دے خلاف کھیڈدے ہوئے اوہ گھبرا جاندے سن۔ اونج تے شعیب اختر نوں کھیڈدے ہوئے ایس ویلے دے سارے ورلڈ کلاس بلے باز خوف دا شکار ہو جاندے سن۔ میتھیو ہیڈن تے ہرشل گبز دا کہنا اے کہ شعیب اختر اک ہیبت ناک بائولر سی۔ سٹیووا نے مسلسل 16 ٹیسٹ میچز جت کے ورلڈ ریکارڈ وی قائم کیتا۔
مارک وا وی اپنے بھرا دے نال 2 جون 1965 نوں پیدا ہوئے۔ ایس ویلے دونویں بھرا 56 ورھے دے ہو چکے نیں۔ اوہ دائیں ہتھ نال بلے بازی تے دائیں ہتھ نال ای کدی کدی آف بریک بائولنگ کراندے سن۔ مارک وا نے 128 ٹیسٹ تے 244 اک روزہ میچز کھیڈے۔ اوہناں نے 1988 توں لے کے 2002 تیکر آسٹریلیا ولوں بین الاقوامی کرکٹ کھیڈی۔ 25 جنوری 1991 نوں اوہناں نے انگلینڈ دے خلاف پہلا ٹیسٹ کھیڈیا۔ ایہناں دا آخری ٹیسٹ 2002 وچ پاکستان دے خلاف سی جیہڑا اوہناں نے 19 اکتوبر نوں کھیڈیا۔ایہناںدا پہلا اک روزہ میچ پاکستان دے خلاف تے آخری میچ جنوبی افریقہ دے خلاف سی۔ مارک وا نے ٹیسٹ میچز وچ 81.41 سکور دی اوسط نال 8029 سکور بنائے جنہاں وچ 20 سنچریاں تے 47 ادھی سنچریاںشامل سن۔ ٹیسٹ وچ اک اننگز وچ ایہناں دا ودھ توں ودھ انفرادی سکور 149 سکور ناٹ آئوٹ سی۔ اوہناں نے اک روزہ میچز وچ 35.39 سکور دی اوسط 8500 سکور بنائے۔ جنہاں وچ 18 سنچریاں تے 50 ادھی سنچریاں شامل نیں۔ اک روزہ میچز وچ ایہناں دا ودھ توں ودھ انفرادی سکور 149 سکور رہیا۔ مارک وا نے ٹیسٹ میچز وچ 59 تے اک روزہ میچز وچ 85 وکٹاں اپنے ناں کیتیاں۔ ٹیسٹ وچ ایہناں دی بہترین بائولنگ 40 سکور دے عوض پنج وکٹاں سن۔ اک روزہ میچز وچ مارک وا دی سب توں چنگی بائولنگ 24 سکور دے عوض 5 وکٹاں دا حصول سی۔ اوہناں نے 368 فسٹ کلاس میچز کھیڈے تے 26855 سکور بنائے۔ اوہ سلپ دے بہترین فیلڈر وی سن۔ ٹیسٹ میچز وچ ایہناں دے کیچز دی تعداد 181 جد کہ اک روزہ میچز وچ ایہہ تعداد 108 اے۔ کرکٹ توں ریٹائرمنٹ دے بعد اوہ تبصرہ نگاری کردے نیں۔
2- ایرک بیڈسر‘ ایلک بیڈسر
ایہناں جڑواں بھراواں دا تعلق انگلینڈ نال سی۔ ایرک بیڈسٹر نے اپنے پورے کیریئر وچ فسٹ کلاس کرکٹ کھیڈی پر ٹیسٹ وچ کوئی نہیں کھیڈیا۔دونواں بھراواں نے فسٹ کلاس کرکٹ تے کھیڈی پر ایلک بیڈسٹر نے ٹیسٹ کرکٹ وچ وی ناں کمایا۔ ایلک بیڈسر دا شمار انگلینڈدی تاریخ دے بہترین میڈیم فاسٹ بائولرز وچ کیتا جاندا اے۔ایہناں دونواں بھراواں نے اکٹھے ٹیسٹ کرکٹ نہیں کھیڈی کیوں جے اک بھرا (ایرک) فسٹ کلاس کرکٹ ای کھیڈدا رہیا۔ ایہناں دونواں بھراواں دوروابرادرز نال بوہت پہلے دا اے۔ وابرادرز نوں ایس لئی اوہ پہلے جڑواں بھرا کہیا جاندا اے جنہاں نے اکٹھے ٹیسٹ کرکٹ کھیڈی۔
ایرک بیڈسر 4 جولائی 1918 نوں انگلینڈ وچ پیدا ہوئے ۔ اوہ سرے کائونٹی کرکٹ کلب ولوں کھیڈدے رہے۔ اوہ اہلک بیڈسر دے وڈے بھرا سن۔ ایرک اک ومدہ بلے باز تے اک چنگے آف بریک بائولر سن۔ ایرک اپنے جڑواں بھرا ایلک توں 10 منٹ وڈے سن۔ ساری عمر کوئی ایہناں نوں الگ نہیں کر سکیا کیوں جے ایہناں دونواں بھراواں نے شادی نہیں کیتی۔ اکثر اوقات اوہ کپڑے وی اک جہے پاندے سن۔ ایہناں دے والد وی پہلے کرکٹ تے فیر فٹ بال کھیڈدے رہے۔
ایرک نے 457 فسٹ کلاس میچز کھیڈے تے 00.24 دی اوسط 14716 سکور بنائے۔ اوہناں نے 10 سنچریاں تے 61 ادھی سنچریاں بنائیاں۔ اک اننگز وچ ایہناں دا ودھ توں ودھ انفرادی سکور 163 سکور سی۔ اوہناں نے 95.24 سکور دی اوسط نال 833 وکٹاں وی حاصل کیتیاں۔ ایرک بیڈسر نے 24 وار اک اننگز وچ 5 وکٹاں اڑائیاں جد کہ 4 وار اک میچ وچ 10 وکٹاں اپنے ناں کیتیاں۔ ایہناں دی بہترین بائولنگ 33 سکور دے عوض 7 وکٹاں سن۔ ایہناں سب دے علاوہ ایرک بیڈسر نے 236 کیچز وی پھڑے اونج تے ایرک بیڈسر آل رائونڈر سن پر ریکارڈ توں پتہ چلدا اے کہ بلے بازی توں زیادہ اوہناں نے بائولنگ وچ کمالات وکھائے۔ اوہناں نے 23 ورہے تیکر فسٹ کلاس کرکٹ کھیڈی پر انگلینڈ ولوں کوئی ٹیسٹ میچ نہیں کھیڈیا۔ کرکٹ توں ریٹائر ہون دے بعد اوہ اپنے بھرا ایلک بیڈسر دے نال کاروبار کرن لگے۔ایہہ دونویں جڑواں بھرا اک ای گھر وچ رہے جنہوں اوہناں نے اپنے والد دے نال مل کے بنایا سی۔ ایرک بیڈسر دا 87 ورہے دی عمر وچ انتقال ہو گیا ایہناں دے بھرا ایلک بیڈسر دا شمار 20 ویں صدی دے انگلینڈ دے بہترین کرکٹرز وچ کیتا جاندا اے۔ اوہناں نے اپنے بھرا ایرک دے نال مل کے 1939 توں 1960 تیکر سرے کائونٹی ولوں کرکٹ کھیڈی ایہناں دے وڈے بھرا ایرک نے کوئی ٹیسٹ نہیں کھیڈیا پر ایلک نے 51 ٹیسٹ میچز وچ حصہ لیا۔ اوہ بوہت عمدہ میڈیم فاسٹ بائولر سن، اوہناں نے 9.24 سکور دی اوسط نال 236 وکٹاں حاصل کیتیاں۔ ایہناں نوں سر دا خطاب وی دتا گیا اوہناں نے بریڈمین نوں 6 وار آئوٹ کیتا۔
3- ہمیش مارشل‘ جیمزمارشل
ایہناں دونواں جڑواں بھراواں دا تعلق نیوزی لینڈ نال اے۔ ہمیش مارشل نے ہر طرح دی کرکٹ کھیڈی۔ اوہ سجے ہتھ نال بلے بازی کردے سن تے کھبے ہتھ نال ای میڈیم فاسٹ بائولنگ وی کردے سن۔ 15 فروری 1979 نوں پیدا ہون والے ہمیش مارشل نے 7 سال نیوزی لینڈ ولوں انٹرنیشنل کرکٹ کھیڈی۔ اوہناں نے اپنا پہلا ٹیسٹ 8 دسمبر 2013 نوں جنوبی افریقہ دے خلاف کھیڈیا۔ ستویں نمبر اُتے بلے بازی کرن والے ہمیش مارشل نے پہلے ٹیسٹ میچ وچ 40 سکور ناٹ آئوٹ بنائے۔ اوہناں نے 13 ٹیسٹ میچز وچ 35.38 سکور دی اوسط نال 652 سکور بنائے جنہاں وچ 2 سنچریاں تے 2 ادھی سنچریاں شامل نیں۔ ایہناں دا اک اننگز وچ ودھ توں ودھ انفرادی سکور 160 سی۔ ہمیش مارشل نے 66 اک روزہ میچز وی کھیڈے۔ اوہناں نے اک روزہ میچز وچ 1 سنچری تے 12 ادھی سنچریاں اپنے ناں کیتیاں ۔ ایہناں دا ودھ توں ودھ انفرادی سکور 101رنز ناٹ آئوٹ رہیا۔ ہمیش مارسل نے 2006 وچ گلوسٹر شائر ولوں کائونٹی کرکٹ کھیڈنا شروع کیتی تے ایس دے بعد اوہ ہر سیزن وچ باقاعدگی نال کھیڈدے رہے۔ 2011 وچ ہمیش مارشل تے کیون اوبرین بلے بازاں دی اوہ پہلی جوڑی بن گئی جس نے اک T20 میچ وچ سنچریاں بنائیاں تے ایس جوڑی نے ایہہ کارنامہ گلوسٹر شائر کائونٹی ولوں سرانجام دتا۔
جون 2012 وچ ہمیش مارشل نوں گلوسٹر شائر کائونٹی کرکٹ کلب دا ٹی 20 میچز لئی کپتان مقرر کر دتا گیا۔ 2003-04 وچ اوہناں نے پاکستان دے خلاف اک روزہ میچز دی سیریز کھیڈی۔ تیجے میچ وچ اوہناں نے فیصل آباد وچ 101 سکور ناٹ آئوٹ بنائے۔ اوہناں نے 2003-04 وچ نیوزی لینڈ نوں جنوبی افریقہ دے خلاف اک روزہ سیریز وچ فتح دلوان لئی اہم کردار ادا کیتا۔ اوہناں نے اپنا آخری ٹیسٹ وی 2006 وچ جنوبی افریقہ دے خلاف کھیڈیا۔
ہمیش مارشل نے اپنا پہلا اک روزہ میچ 29 نومبر 2003 نوں پاکستان دے کھیڈیا جد کہ ایہناں دا آخری اک روزہ میچ 2007 وچ آئر لینڈ دے خلاف سی۔ ایس طرح اوہناں نے نیوزی لینڈ ولوں ست سال (2000-2007ء ) تیکر بین الاقوامی کرکٹ کھیڈی۔ ہمیش مارشل نے آئی سی ایل ولوں وی کرکٹ کھیڈی۔
ایہناں دے جڑواں بھرا جیمز مارشل سجے ہتھ نال بلے بازی تے کھبے ہتھ نال ای میڈیم فاسٹ بائولنگ کردے سن۔ اوہناں نے نیوزی لینڈ ولوں 3 سال (2005-2008ء) تیکر بین الاقوامی کرکٹ کھیڈی۔ اوہناں نے 7 ٹیسٹ میچز وچ 81.19 سکور دی اوسط نال 218 سکور بنائے جنہاں وچ اک ادھی سنچری شامل اے۔10 اک روزہ میچز وچ جیمز مارشل نے 00.25 سکور دی اوسط نال 250 سکور بنائے جنہاں وچ اک سنچری تے اک ادھی سنچری شامل اے۔ جے ریکارڈ دا جائزہ لیا جائے تے ہمیش مارشل دی کارکردگی اپنے جڑواں بھرا جیمز دی نسبت بوہت بہتر سی۔ بہرحال ایہناں دونواں جڑواں بھراواں نے انٹرنیشنل کرکٹ اکٹھے کھیڈ کے تاریخ وچ اپنا ناں محفوظ کر لیا۔