ڈسکہ توں موہنجوداڑو تک

لكهت:مطلوب وڑائچ

ڈسہ شہر این اے 75 توں پچھلے تن الیکشناں دا رزلٹ ویکھن توں ایہ پتہ لگدا اے کہ ڈسکہ مسلم لیگ (ن) دا لاڑکانہ اے۔ میاں نوازشریف دے امیدوار نوں ہر واری ڈسکہ شہر توں ستر فیصد توں ودھ ووٹ پئے ایہدی بنیادی وجہ ڈسکہ شہر دا صنعتی بیک گرائونڈ اے۔ سمال بزنس انڈسٹریز نال جڑے تاجراں دی اکثریت مذہبی رجحان رکھدے ہوئے پی ایم ایل نوں ووٹ دیندی اے جد کہ اوہناں دے کول دوجا چوائس جماعت اسلامی دا امیدوار ہوندا ے جہنوں مقامی مغل برادری وی سپورٹ کردی اے جد کہ ڈسکہ دے دو سو توں ودھ نیڑلے پنڈاں تے قصبیاں دی جٹ برادری دی اکثریت دے نال نال دوجے سیاسی پارٹیاں وچ تقسیم ہو جاندے نیں۔ ہن آئونے آں کہ ڈسکہ نوں موہنجوداڑو کیوں بنایا جا رہیا اے؟ اوہ کہڑے عوامل نیں جہناں پاروں ڈسکہ دے لوکاں نوں وڈی سزا دین دا ارادہ کر لیا گیا اے۔
ڈسکہ دے شہریاں وچ اک ایہ تاثر وی پایا جا رہیا اے کہ ڈھائیاں جان والیاں دکاناں تے کاروبار اک دو اوہناں مخصوص برادریا ںدے تاجراں دیاں سن جہناں دی نسبت شریف خاندا ن نال ملدی اے تے ایس گل دا پورا یقین سی کہ آزادکشمیر دے انتخابات تے کمپین عروج اُتے اے تے سیالکوٹ‘ ڈسکہ تے لاگے وچ کشمیری ووٹراں دی اک وڈی گنتی رہندی اے تے عموماً ایس حلقے توں مسلم لیگ ن دا میدوار کامیاب ہوند ا اے ایس لئی لیگی ووٹراں تے سپورٹراں دا دھیان آزادکشمیر تے ضمنی الیکشن توں ہٹانا اے یعنی اک تیر نال دو شکار۔ اصل وچ مقابلہ خواجہ آصف تے ڈار برادران وچ اقتدار دی کشمکش لئی اے تے ٹھیک اوہناں دیہاڑیاں جدوں ڈسکہ دے جڑے حلقے وچ مسلم لیگ ن دے سابق وزیر جیل خانہ جات تے ایم پی اے خوش اختر سبحانی دے انتقال پاروں ویہلی ہون والی سیٹ تے الیکشن ہون جا رہیا اے تے عوامی سروے تے تجزیہ نگاراں دیاں رپورٹاں دے مطابق لیگی امیدوار دی جت یقینی اے تے حکومتی حلقے جو اجے ڈسکہ دے شاک چوں مکمل باہر نہیں نکلے حکومتی مقتدر حلقیاں نے ترقیاتی سکیماں تے من پسند تبادلیاں تے خوف و ہراس پھیلا رکھیا اے تے حلقے دے ووٹراں نوں ڈسکہ وچ تجاوزات دے ناں تے سیاسی مخالفین تے تاجر سپورٹراں نوں ایہ پیغام دتا جا رہیا اے کہ جے ڈسکہ ورگی غلطی دہرائو گے تے فیر ایہدا انجام یاد رکھو۔ تہاڈا بزنس‘ تہاڈا کاروبار‘ تہاڈیاں دکاناں سب تورابورا تے موہنجوداڑو ورگیاں بنا دتیاں جان گئیاں۔
دوستو! میرے کجھ دوستاں نے مینوں سمبڑیال روڈ ڈسکہ دی فوٹیج تے فوٹواں گھلیاں نیں جہناں نوں ویکھ کے مینوں یقین نہیں آ رہیا کہ ایہ کدی ڈسکہ ؟ یاں ایہ فوٹواں امریکی بمباری نال تباہ ہون والے عراق‘ شام‘ لیبیا تے افغانستان دے کسے شہر دیاں نیں۔ اک اطلاع موجب حال ای وچ من پسند انتظامی افسراں دے تبادلے کیتے گئے سن جد کہ موجودہ اسسٹنٹ کمشنر ڈسکہ دی تعیناتی ایسے سلسلے دی کڑی اے موصوف نے ریاست دا ملازم ہون دی بجائے حکومت دا غلام ہون نوں ترجیح دتی اے۔ دوستو! تجاوزات یقینا ناقابل معافی نیں جہدے لئی عدالتاں موجود نیں پر ضمنی الیکشن دا شیڈول انائونس ہون پاروں جدوں انتخابی کمپین عروج تے ہووے ایس قسم دے ہتھکنڈے لوکاں دیاں نظراں توں لکے نہیں رہ سکدے تے اج دے ترقی یافتہ دور وچ شعور رکھن والے لوکاں دی نظر وچ جگ ہنسائی تے حکومتی سبکی دا کارن وی بنے گا میری الیکشن کمشنر تے ارباب اختیار اگے درخواست اے کہ پاکستان پہلے ای اندرونی تے بیرونی خلفشار وچ پھسیا اے اجہے اقدامات نال پاکستان نوں گرے لسٹ وچ رکھن والیاں قوتاں نوں اللہ نہ کرے ہور موقع ملے گا۔
پاکستان دی سیاست دی ایہ مستحکم و مضبوط روایت رہی اے کہ جس وی پارٹی یاں مخالف قوت نوں جناں دبایا گیا اوہ اوناں ای بھری اے۔ ایہدیاں مثالاں تہاڈے سامنے پیپلزپارٹی دی صورت وچ چٹے دن وانگوں موجو دنیں۔ جنرل ضیاء الحق نے پیپلزپارٹی نوں ختم کرن وچ کوئی حربہ تے ہتھکنڈا نہیں سی چھڈیا پر پیپلزپارٹی اینی ابھری کہ ذوالفقارعلی بھٹو دی شہادت دے بعد فیر اقتدار وچ آئی۔ پیپلزپارٹی نوں کسے نے ڈھایا تے مقبولیت نوں اسمان دی بلندی توں زمین دی پستیاں تک اپڑایا تے اوہ اوہدی قیادت اے جو اج پرچی لیڈر اوہناں دے ہتھ آئی ہوئی اے۔ دوجی مثال ایم کیو ایم دی‘ اج اوہ قائد متحدہ دے ہتھوں رسوا ہو گئی اے۔ تحریک انصاف حکومت نوں میں کہواں گا کہ اوہنے ڈسکہ تے سیالکوٹ وچ الیکشن جتنے نیں تے ن لیگ نوں ووٹ دین والیاں نوں پریشان کرن دی تھاں اوہناں دے مسئلے حل کرو اوہناں نوں ریلیف دیو۔ ایہ کلیہ آزما کے ویکھو تہانوں کایا پلٹ نتیجے ملن گے۔ ن لیگ بطور پارٹی اپنی بربادی دا سامان آپ کر لوے گی۔٭٭