سرکار کجھ تے دسو؟

امرجلیل

جدوں وی بچے تہاڈے توں سوال پچھن‘ فیر اوہ سوال بھاویں کناں ای چبھن والا کیوں نہ ہووے تسیں بچیاں نوں ٹھیک طرح جواب دیو۔ اوہناں نوں ٹالن تے ٹرخان دی کوشش نہ کرو۔ تسیں جہڑے سوالاں دے جواب دینا مناسب نہیں سمجھدے اوہ سوال کونپلاں وانگوں ہوندے نیں۔ ویکھدیاں ای ویکھدیاں اوہ سوال سنگھنے رُکھاں وچ بدل جاندے نیں۔ ساڈے بچے تناور رُکھاں دے جنگل وچ کھو جاندے نیں۔ انج وی سوال پچھنا‘ یاں فیر کسے مسئلے‘ معاملے‘ واردات تے سوال اٹھانا انسان دی فطرت اے تے ایس فطرت نوں انسان دا مڈھلا حق منیا جاندا اے۔ ایس حق دی نفی معاشرے وچ گھٹن دے احساس نوں ودھا دیندی اے۔ لوکاں نوں سچ دسو‘ اوہناں نوں اصل حقائق بارے دسو۔ جدوں تسیں حقائق نوں تروڑ مروڑ کے پیش کردے او یاں کجھ وی دسن توں انکار کردے او‘ اودوں تسیں ایویں ای افواہواں دا کارن بن دے او۔ افواہواں اینیاں پھٹ پیندیاں نیں کہ ہر افواہ تے سچ دا گمان ہون لگ پیندا اے۔ اج کل اک افواہ سینئر سٹیزنز دے بارے گشت کر رہی اے۔ عام طور تے معاشرے وچ دو طرح دے سینئر سٹیزنز ہوندے نیں۔ اک اوہ جو اپنا کاروبار کردے نیں تے بزرگ ہو جان دے بعد وی اپنے کاروبار نال جڑے رہندے نیں۔ دوجی نوعیت وچ سرکاری تے نیم سرکاری اداریاں توں ریٹائر ہون والے سینئر سٹیزنز آئوندے نیں اوہناں دا گزر بسر پنشن تے ہوندا اے۔ میرا تعلق دوجی قسم دے سینئر سٹیزنز نال اے۔ افواہ گردش وچ اے کہ جے سینئر سٹیزنز نے کرونا توں بچن دا حفاظتی ٹیکہ لگوان توں انکار کر دتا تے اوہناں سینئر سٹیزنز دی پنشن روک دتی جاوے گی۔ میں اک سینئر سٹیزنز ایس سلسلے وچ کجھ جاننا تے سمجھنا چاہنا واں تے کجھ سمجھانا چاہنا واں۔
ایس ویلے پاکستان وچ چار پنج قسم دی ویکسین دے ٹیکے لائے جا رہے نیں۔ اک تے اعلیٰ قسم دی ویکسین دے ٹیکے نیں جہڑے حکام‘ اسمبلی ممبران‘ وزراء‘ دبنگ افسران تے اوہناں دی فیملی نوں لائے جا رہے نیں‘ یاں لگ چکے نیں۔ ایس قسم دی ویکسین دے حفاظتی ٹیکے اسیں عام آدمیاں نوں نہیں لائے جاندے۔ اسیں عام بندیاں نوں مانگے تانگے تے امداد وچ ملن والی ویکسین دے حفاظتی ٹیکے لائے جاندے نیں۔ اک ہور گل جہدی تصدیق میں لازمی سمجھنا واں حکام تے دبنگ افسراں نوں کوالی فائیڈ نرساں ٹیکہ لاندیاں نیں اودوں ڈاکٹر صاحبان بذات خود اوتھے موجود ہوندے نیں۔ سانوں انج وی حکام تے دبنگ افسراں لئی خصوصی ترجیحات تے کوئی اعتراض نہیں۔ جے خصوصی ترجیحات ختم کر دتیاں جان تے فیر ساڈے وچ‘ حاکماں تے دبنگ افسراں وچ کیہ فرق رہ جاوے گا؟ لوکاں نوں کیویں پتہ لگے گا کہ حاکم کون نیں تے محکوم کون نیں۔ تسیں امدادی کیمپ وچ ملن والی ویکسین دا حفاظتی ٹیکہ لا کے امریکہ نہیں جا سکدے۔ جانا دور دی گل اے امریکی تہانوں امریکہ دے نیڑیوں گزرن وی نہیں دین گے۔ ایسے طرح سعودی عرب والے تہانوں سعودی عرب دی ہوا تک لگن نہیں دین گے۔
میرا بچگانہ سوال اے کہ ایس ویلے پاکستان وچ کنے قسم دی ویکسین مل رہی اے؟ کسے ملک وچ بنائی گئی ویکسین دا حفاظتی ٹیکہ لگوان دے بعد تہانوں کنے ملکاں وچ آن جان دی اجازت ہووے گی؟ اک سینئر سٹیزن ہون دے ناطے کون طے کرے گا کہ پنج قسم دی دستیاب ویکسین وچوں مینوں کس قسم دی ویکسین دے حفاظتی ٹیکے لگوانے چاہیدے نیں؟ اسیں بڈھے طرح طرح دے روگاں وچ مبتلا ہونے آں۔ حفاظتی ٹیکہ لگوان توں پہلاں کیہ ڈاکٹراں دا اک پینل میرا مکمل چیک اپ کرے گا؟ حفاظتی ٹیکے دے میرے امراض پاروں ری ایکشن ہون نوں نظرانداز نہیں کیتا جا سکدا۔ سنیا اے کہ حفاظتی ٹیکہ لگواندے ہوئے سانوں دسیا جاندا اے غالباً تحریری طور تے کہ ٹیکے دے بھیڑے اثرات دے نتیجے وچ جے تہاڈی موت واقع ہو جاوے یاں تسیں کسے نویں مرض وچ مبتلا ہو جائو ایہدے لئی حکومت پاکستان‘ ویکسین بنان والا ادارہ‘ ٹیکہ لگان والا بندہ ذمہ دار نہیں ہووے گا۔ کیہ ایہ ٹھیک اے؟ اک اہم گل جو اسیں بڈھے سمجھنا چاہنے آں۔ سرکار دے سیانیاں اگے گزارش اے کہ سانوں سمجھائو‘ سر‘ سنیا اے کہ کرونا بیماری دے اسباب اجے تک راز بنے ہوئے نیں تے سر‘ اسیں ایہ وی سنیا اے کہ دنیا دے نامور ڈاکٹر کرونا دے مریضاں لئی موثر علاج ایجاد کرن وچ نکام رہے نیں۔ کیہ ایہ ٹھیک اے؟ تے فیر کھنگن تے وگدی نک والیاں نوں پھڑ کے ہسپتالاں وچ کیوں داخل کیتاجا رہیا اے؟ سنیا اے کہ ایس قسم دے لاوارث مریضاں تے طرح طرح دے نت نویں نسخے تے دوائیاں ازمائیاں جاندیاں نیں؟ ایس نیک کم وچ دنیا بھر دے دوست تے دشمن ملک شامل نیں۔ اسیں کمتر لوک سمجھنے آں کہ ایس واری دوائیاں تے ویکسین چوہے‘ خرگوشاں تے گنی پگز تے ازمان دی تھاں ساڈے ورگے لاوارث لوکاں تے ازمائی جا ریہ اے کیہ ایہ ٹھیک اے؟ باقی رہندے سوال سرکار توں فیر کدی پچھاں گے۔
اج تک کنے لوک پاکستان وچ کرونا دی وجہ نال اللہ نوں پیارے ہو چکے نیں؟ اصل گل کجھ ہور اے سرکار کوئی وجہ تے ہے کہ کٹر دشمن ملک وی کرونا دی وجہ نال اک پیج تے نظرآ رہے نیں۔ جاندے جاندے آخری سوال پچھن دی گستاخی کر رہیا واں۔ تسیں جان دے ہوو گے سرکار‘ ایہ کرونا دی وباء انسان دی ایجاد اے یاں اللہ نے گھلی اے؟۔٭٭