پنجاب دی ترجمان۔۔۔ ثمن رائے

اوہ بوہت چنگے ڈھنگ نال حکومتی اقدامات تے کارکردگی نوں عوام دے ساہمنے لیارہیاں نیں

حسن جلیل

پاکستان وچ روز دی بنیاد اُتے کئی نویں واقعے رونما ہو رہے نیں، اک ویلا سی کہ قومی ٹی وی اُتے اک پروگرام ’’ویکلی ریوو‘‘ دے ناں توں چلیا کردا سی پر ہن حالات و واقعات کجھ اِنج دے نیں کہ ہر روز وکھو وکھ خبراں ملدیاں نیں ، ایس وچ اک بوہت وڈا کردار سوشل میڈیا دا اے، پہلے جیہڑے واقعے لُک جاندے سن یا فیر دبا دِتے جاندے سن ہن موجودہ دور وچ سوشل میڈیا دا اک ٹرینڈ ایہناں نوں پوری دنیا دے ساہمنے لے آندا اے۔ ہن ایہناں معاملات نوں سنبھالنا کوئی اسان کم ہر گز نہیں۔ جتھے چینلز لئی ایہناں خبراں نوں چلانا تے کس خبر نوں کنہی اہمیت دینی اے ایہہ مشکل ہوندا جا رہیا اے اوتھے اج دے دور وچ حکومتاں لئی وی آزاد میڈیا تے ایس دے نال جڑیا ہویا ایہہ بے ہنگم سوشل میڈیا ایس نوں کنٹرول کرنا بوہت مشکل اے۔ اک ویلا سی کہ لوک ڈردے سن کہ جے کسے ’’وَڈے ‘‘ دے خلاف گل کیتی تے کوئی نہ کوئی ضرور چُک کے لے جائے گا پر اج تسیں عام او یا خاص، تسیں وڈے او یا نکے، بھانویں تسیں کجھ وی او تے سمجھو تسیں کجھ وی کر سکدے او، امریکہ دے صدر توں لے کے جتھوں تیکر تہاڈا وَس چلے تسیں کجھ وی کہہ سکدے او کجھ وی پوسٹ کر دیندے او۔ پر ایس طرح دی فضول تے جھوٹی خبراں پاروں پوری دنیا وچ نہ صرف امن عامہ دے بوہت سارے مسئلے جنم لے رہے نیں بلکہ معاشرے وچ بوہت زیادہ وگاڑ پیدا ہو رہیا اے۔ ہجے موجودہ وقت وچ جتھے کرونا وبا نوں لے کے بوہت ساری غلط فہمیاں تے افواہواں نے جنم لیا تے ایس دا مرکز بنیادی طور اُتے ایہو سوشل میڈیا سی۔ ہن اج دے دن ای پاکستان، چین، افغانستان نوں لے کے بھارت نے اپنا اک بھرپور پروپیگنڈہ شروع کر رکھیا اے،جس دا بنیادی مقصد پاکستان وچ بدامنی پیدا کرنا اے تے ایس دے نال پاکستان تے افغانستان دے تعلقات نوں خراب کرنا اے، اوتھے ا ج 9انجینئرز دی ہلاکت دے معاملے نوں جویں بھارت اُچھالن دی کوشش کر رہیا اے تے اِنج واضح ہو جاندا اے کہ جدوں دشمن انج دے حالات پیدا کرن دی کوشش کر رہیا ہوئے تے اگوں اک مضبوط دفاع تے بہتر جوابی کاروائی کرنی وی بن دی اے۔
پنجاب جیہڑا کہ پاکستان دا آبادی تے وسائل دے اعتبار نال وڈا صوبہ اے ایس نوں ’’منیج‘‘ کرنا اینا آسان کم نہیں تے اینے وڈے صوبے وچ جتھے ہر طرح دے فنکار لوک بیٹھے ہوئے نیں انج ایتھے حالات دے حساب نال عوام تیکر حکومت دی صحیح ترجمانی کرنا تے سارے حکومتی امور توں بہتر طور اُتے عوام نوں آگاہ کرنا، لوکاں نوں نویں حکومتی اقدامات دے بارے بروقت معلومات فراہم کرنا ، ایہہ اک بوہت ای مشکل امر اے پر پنجاب جہے وڈے صوبے وچ ایہہ ذمہ داری اک بوہت ای حوصلہ مند، جرات والی تے باوقار افسر ثمن رائے دے ہتھ وچ اے۔ اوہ پچھلے کئی ورھیاں توں محکمہ اطلاعات و ثقافت دے نال جڑیاں نیں تے پنجاب دے فن و ثقافت تے زبان دی ترویج لئی کوشاں نیں۔ پنجاب دی پہلی ثقافتی پالیسی بنان دا سہرا وی ایہناں دے ای سر اے۔ جدوں بطور ڈائریکٹر جنرل پلاک تعیناتی ہوئی تے مینوں خود ایہناں دے نال کم کرن دا موقع ملیا، صبح توں شام تیکر کم ای کم، ہر کم وچ راہنمائی فراہم کرنا تے بوہت گھٹ ویلا ہوندا سی کہ جدوں اوہ اپنے دفتر وچ بیٹھیا کردیاں سن۔ پلاک توں گئے ہوئے ایہناں نوں اک سال توں ودھ دا عرصہ ہو چکیا اے پر ہن وی کجھ نہ کجھ نواں کرن دا ایہناں دا عزم اُنج دا ای اے، جیہڑا اوہ ساڈے نال شیئر کردیاں رہندیاں نیں۔ہن جد کہ اوہ ڈی جی پی آر دے عہدے اُتے نیں تے ہن ایہناں دے آن دے بعد کیتے جان والے اقدامات نظر آن لگے نیں، ہر ضلع دا انفارمیشن افسر ہن جتھے اپنے باقی کم کردا اے اوتھے اوہ حکومتی اقدامات دے بارے وچ مکمل رپورٹ سوشل میڈیا اُتے وی دیندا اے۔جیہڑا عام بندے لئی خبر نوں حاصل کرن دا اک معتبر ذریعہ بن دا جا رہیا اے۔اوہ بوہت بہتر طریقے نال حکومتی اقدامات تے کارکردگی نوں عوام دے ساہمنے لیان وچ کوشاں نیں۔ میڈیا دے نال ایہناں دا رشتہ ایتھے آن توں پہلے دا اے ایس لئی اوہ ایس منصب نوں بہتر طور اُتے چلا رہیاں نیں ایس دے نال نال اوہ ہمیشہ توں خواتین نوں معاشرے وچ مضبوط کرن تے ایہناں نوں اگے لیان وچ اپنا کردار ادا کردیاں رہیاں نیں تے ہن مینوں امید اے کہ بطور ڈی جی پی آر اوہ پنجاب بھر دی خواتین نوں بہتر موقعے فراہم کرن لئی میڈیا دا بوہت استعمال کر کے خواتین لئی بوہت کجھ کر سکن گیاں۔ موسیقی نال ایہناں دا لگائو بوہت زیادہ اے تے ایس لئی اوہناں نے نہ صرف پنجابی تے اردو زبان بلکہ پورے ملک دی ساری نکی وڈی زباناں وچ انج دے نغمے تیار کرائے نیں کہ جیہڑے پورے ملک نوں یک جان کرن دی اک سعی اے، ایہناں دی اک کاوش ’’ہو جمالو‘‘ اے جیہڑا کہ پنجابی، سندھی، بلوچی، پشتو، بلتی، کشمیری تے ساری زباناں وچ گایاگیا اے۔ ایہہ اپنے آپ وچ کمال اے۔ اسیں امید کرنے آں کہ ثمن رائے جیہڑی کہ پنجاب دی حقیقی ترجمان نیں آئندہ وی پنجاب دھرتی دے فن و ثقافت تے ایس دی زباناں دی ترویج لئی کوشاں رہن گیاں ۔ اِنج دے ہونہار تے قابل افسراں دے ہوندے ہوئے جنہاں وچ افسر شاہی دی دور دور تیکر کوئی جھلک نہیں ویکھن نوں ملدی اسیں یقین نال کہہ سکنے آں کہ حکومت تے عوام دے وچکار رائے عامہ ہموار رکھن وچ اوہ اہم کردار ادا کرن گیاں۔ اللہ ایہناں نوں ہور کامیابی عطا کرے۔ (آمین)