کشمیر تے وڈیاں جماعتاں

بلوچستان، گلگت، بلتستان تے آزاد کشمیر دے شہری ووٹ دیندے ویلے وفاق وچ حکمران جماعت نوں ذہن وچرکھدے نیں تے پوری کوشش کردے نیں کہ وفاق وچ حکمران جماعت دے امیدواراں نوں کامیاب کیتا جائے

تحریر حمیداللہ بھٹی

آزاد کشمیر دا انتخابی میدان سج چکیا اے تے تنے وڈیاں جماعتاں جت لئی ایڑی چوٹی دا زور لا رہیاں نیں راہ گم کردہ مسافر دی طرح ریاست دے شہریاں نوں کجھ اک لوک انتخابی عمل دا بائیکاٹ کرن لئی وی قائل کرن دی تگ دو وچ نیں ہر پاسے جلسیاں دی بھرمار پیپلز پارٹی، مسلم لیگ ن تے تحریک انصاف دی قیادت جلسیاں نال خطاب کردے ہوئے ووٹراں نوںلبھان وچ مصروف نیں خدمت دے دعوے کردے ہوئے مسئلہ کشمیر دے حل لئی اپنی اپنی جماعت دی جت نوں ناگزیر قرار دتا جا رہیا اے۔ بلاول بھٹو نے امریکہ روانگی توں پہلاں کئی اک جلسیاں نال خطاب کیتا تے مودی نوں نواسی دی شادی اُتے بلان، امب و ساڑھیاں دے تبادلیاں اُتے شریف خاندان نوں تنقید دا نشانہ بنایا مقبوضہ کشمیر دی خصوصی حیثیت دے خاتمے اُتے عمران خان ولوں جواب وچ ایہہ کہنا، میں کیا کروں، اُتے نکتہ چینی دی جواب وچ مریم نواز تے دیگر ن لیگی رہنمائواں نے سارک کانفرنس دے دوران اسلام آباد توں کشمیر دے متعلق اشتہار اُتارن دے طعنے دتے مریم نواز نے تے ایتھوں تیکر کہہ دتا کہ عمران خان اپنا نامہ اعمال لے کے کشمیر آن تے ایہہ کہ کشمیر نوں صوبہ نہیں بنن دیاں گے تاکہ پاکستان وچ ہون والی تباہ توں کشمیری محفوظ رہن جد کہ تحریک انصاف والے کتھے پچھے رہندے اوہناں نے وی سابق حکمراناں اُتے تنقید کردے ہوئے بداخلاقی دی ساری حداں پار کیتیاں۔ ایہہ بدزبانی کشمیریاں دی خدمت نہیں بلکہ نمک پاشی دے مترادف اے۔ علی امین گنڈا پور ولوں رقماں ونڈن تے مظاہرین اُتے فائرنگ جہے واقعات نے انتخابی ماحول گندا کر دتا اے۔ مودی دے مظالم نوں بے نقاب کرن دی بجائے اک دوجے نوں غدار تے کشمیر دشمن ثابت کرن اُتے زور اے آزاد کشمیر وچ جاری الیکشن مہم نال انج لگدا اے کہ ملک دی تن وڈی جماعتاں نوں قومی مفاد نال کوئی غرض نہیں سب نوں کشمیریاں نال نہیں اپنی جماعت دی جت نال دلچسپی اے انج دے حالات وچ جدوں ملک وچ سیاستداناں اُتے تنقید کرنا اک فیشن بن گیا اے۔ سیاستداناں ولوں وی اک دوجے اُتے کیچڑ اُچھالنا تنقید دی تصدیق دے مترادف اے پر ایہہ نہ بھلو اظہار خیال وچ ذمہ داری دا مظاہرہ نہ کرن نال سیاسی اشرافیہ دی اپنی ساکھ ای متاثر ہوئے گی۔
مقبوضہ کشمیر نوں ظلم و جبر دی بدترین لہر دا ساہمنا اے ست لکھ توں ودھ قابض فوج نے جنت نظیر وادی نوں عملاً جیل بنا کے رکھ دتا اے کوئی دن انج دا نہیں جاندا جدوں بے گناہ کشمیریاں نوں ناکردہ گناہواں دی پاداش وچ رزق خاک نہیں بنایا جاندا گھر گھر چھاپے روز دا معمول نیں تے ایس دوران گرفتار ہون والیاں دے حوصلے توڑن لئی ایہناں نوں ملک دی دور دراز جیلاں وچ بند کیتا جا رہیا اے۔ مزید ستم ایہہ کہ جعلی مقابلیاں وچ شہید ہون والیاں دی تدفین لئی ورثاں نوں لاشاں وی نہیں دتیاں جاندیاں ہن تے کشمیر وچ تعینات بھارتی فوج دی مدد لئی خواتین اہلکاراں نوں وی گھلیا جا رہیا اے تاکہ گھر گھر تلاشی دے دوران کشمیری خواتین نوں بہیمانہ تشدد دا نشانہ بنایا جا سکے۔ ایس توں علاوہ مقبوضہ کشمیر توں مسلم اکثریت نوں اقلیت وچ بدلن لئی لکھاں غیر کشمیری ہندوئواں نوں ڈومیسائل جاری کیتے جا رہے نیں آبادی دے تناسب وچ تبدیلی دی گل ہوئے یا کشمیریاں نوں جعلی مقابلیاں وچ مارن دیاں وارداتاں، دور دراز جیلاں وچ کشمیری قیادت نوں بند کرن دے منصوبے ہون یا خواتین اہلکاراں ولوں تشدد دی نویں لہر دی گل، حیرانگی دی گل ایہہ وے کہ ملک دیاں تناں وڈی جماعتاں جلسیاں نال خطاب دے دوران کشمیریاں نوں درپیش ایہناں مسئلیاں اُتے لب کشائی توں گریزاں نیں تے اک دوجے اُتے الزامات دی بوچھاڑ نوں ای کشمیریاں دی مدد سمجھ رہی اے۔ ایہہ غیر ذمہ داری دی انتہا تے کشمیریاں دا مقدمہ خراب کرن دی دانستہ کوشش اے آزاد کشمیر وچ جاری الیکشن مہم نال انج لگدا اے کہ بھارت دی بجائے پاکستان ای مسئلہ کشمیر دے حل وچ رکاوٹ اے۔ لوڑ ایس امر دی اے کہ وڈی جماعتاں ذمہ داریاں دا ادراک کرن تے قومی مفاد اُتے شخصی مفاد نوں ترجیح دین توں گریز کرن، جے غیر ذمہ دارانہ رویے اُتے نظر ثانی نہ کیتی گئی تے نہ صرف انتخابی نتائج دی شفافیت اُتے سوال اٹھن گے بلکہ بھارت نوں جبر و قہر ڈھان دی شہ ملے گی جس نال کشمیر وچ جاری تحریک دی حوصلہ شکنی ہوئے گی۔
بلوچستان، گلگت، بلتستان تے آزاد کشمیر دے شہری ووٹ دیندے ویلے وفاق وچ حکمران جماعت نوں ذہن وچ رکھدے نیں تے پوری کوشش کردے نیں کہ وفاق وچ حکمران جماعت دے امیدواراں نوں کامیاب کیتا جائے تاکہ وفاق توں ترقیاتی کماں لئی فنڈ ز ملدے رہن جدوں ملک اُتے پیپلز پارٹی حکمران سی تے چوہدری عبدالمجید نے بڑے آرام نال الیکشن جت کے آزاد کشمیر دے وزیراعظم دا منصب حاصل کر لیا مسلم لیگ ن نوں اقتدار ملیا تے راجہ فاروق حیدر بھاری اکثریت نال ریاستی وزیراعظم منتخب ہو گئے۔ گلگت بلتستان وچ وی انج ای ہویا بلوچستان وچ وی انج ای ہوندا اے۔ آزاد کشمیر دے موجودہ انتخابی ماحول وچ جے کوئی بوہت وڈی انہونی نہیں ہوندی تے پی ٹی آئی ولوں آزاد کشمیر دا انتخابی معرکہ جتنا نوشتہ دیوار اے جس دا ثبوت انتخابی مہم توں پہلاں موجودہ اسمبلی توں کئی الیکٹ ایبلز دا پی ٹی آئی وچ شامل ہونا اے۔ ایہہ لوک الیکشن دی ہوا ویکھ کے جماعتاں تبدیل کردے رہندے نیں۔ پی ٹی آئی نے وی اپنے کارکناں دی بجائے الیکشن توںپہلاں شامل ہون والے الیکٹ ایبلز نوں ٹکٹ دین وچ عجلت وکھائی میرے کہن دا مطلب ایہہ وے کہ امیدوار وی ووٹراں دے مزاج آشنا نیں جس دی بنا اُتے وفاق دی حکمران دی جت مشکل وکھائی نہیں دیندی۔
آزاد کشمیر وچ جاری انتخابی مہم اُتے طائرانہ نگاہ پائیے تے ایہہ سمجھن وچ کوئی ابہام نہیں رہندا کہ تحریک انصاف دا پلڑا بھاری اے پر علی امین گنڈا پور جہے لوک حماقتاں نال اپنی جماعت دی خدمت دی بجائے نقصان دا موجب بن سکدے نیں مسلم لیگ ن تے تحریک انصاف نوں ہدف تنقید بنان والے بلاول بھٹو جیہڑے پی پی دی جت دے بعد ریاست وچ حکومت بنان دے دعویدار نیں پر تلخ سچ ایہہ وے کہ پیپلز پارٹی دے سارے ریاستی انتخابی حلقیاں وچ امیدوار ای نہیں بلکہ کجھ امیدواراں نے پارٹی دے ملے ٹکٹ وی واپس کر دتے نیں جد کہ مسلم لیگ ن دا وی کم و بیش انج دا ای حال اے فیر وی جت دے دعوے کس زعم وچ کیتے جا رہے نیں کجھ سمجھ نہیں آندی آزاد کشمیر دے موجودہ انتخابی میدان وچ سب توں زیادہ امیدوار تحریک انصاف دے نیں جنہاں نوں حکومتی وسائل وی حاصل نیں ایہہ امیدوار جلسیاں دے دوران ترقیاتی فنڈز دے اعلان کردے ہوئے ہنے توں روزگار دی یقین دہانیاں کراندے پھردے نیں پر ہجے تیکر علی امین گنڈاپور دے سوا کسے ہور حکومتی بندے دے خلاف الیکشن کمیشن نے کوئی ایکشن نہیں لیا حکومتی مشنری کھلے عام پی ٹی آئی دے امیدواراں دی حمایت کر رہی اے الیکشن کمیشن دی ہدایات دی خلاف ورزی کردے ہوئے ووٹاں دے بھائو تائو طے ہو رہے نیں۔ بلاول بھٹو تے مریم نواز جے بے سروپا الزام تراشی دی بجائے خرابیاں دی نشاندہی تے الیکشن رولز دی خلاف ورزیاں دے ثبوت پیش کرن تے الیکشن کمیشن نوٹس لے سکدا اے جس نال انتخابی عمل صاف شفاف تے غیر جانبدار ہون دا امکان ودھ سکدا اے۔ تے مسلم لیگ ن تے پی پی بہتر پوزیشن اُتے آ سکدی اے نہیں تے نہ بھارتی مظالم دے خلاف اواز بلند کرن دی بجائے اک دوجے تے اداریاں اُتے تنقید نال نہ صرف کشمیریاں دا مقدمہ متاثر ہوئے گا بلکہ کشمیریاں نوں مایوس کرن دا باعث وی بنن گے۔