عید ضرور منائو پر دوجیاں نوں وی منان دیو

لكهت:وسعت اللہ خان

جدوں محلے دی مسجد دے امام صاحب سنت ابراہیمی دا پس منظر‘ روحانی مقصد‘ قربانی دے جانور دی جسمانی اہلیت دیاں شرطاں‘ گوشت دے حصے کرن دے مسنون طریقے تے اوس گوشت تے غریباں تے مسکیناں دے حقوق تے قربانی دی کھل دے مستحقین بارے ہر ورھے تفصیل نال عام مسلماناں نوں سمجھا سکدے نیں تے ایسے تربیتی و علمی گل بات وچ ایہناں دو چار سطراں دا وادھا کیوں نہیں کر سکدے کہ اے ایمان والیو جدوں تسیں اللہ دی راہ وچ قربان کرن لئی جانور خریدو تے جنی احتیاط تسیں اوس جانور دی عمر تے دند چیک کرن وچ ورتدے او اونی ای احتیاط نال اوہنوں گھر لیان دے بعد وی کریا کرو۔ یعنی جانور نوں اجہی تھاں بنھیا جاوے جتھوں لنگھن والیاں نوں تکلیف نہ ہووے تے اوس جانور دے بول و براز توں راہیاں دے کپڑے محفوظ رہن۔ جانور نوں کھڈونا سمجھ کے تھکان توں پرہیز کیتا جاوے تے اوہدی بھکھ پیاس دا خیال رکھیا جاوے۔ سب توں اہم ایہہ وے کہ سڑک یاں گلی وچ ذبح کرن دی تھاں گھر دے صحن یاں لان وچ تے جے صحن دی سہولت نہیں تے کسے کھلے میدان وچ کیتا جاوے تاں جے سڑکاں تے گلیاں خون نال آلودہ و سرخ تے آلائش دے کھلار پاروں وحشت ناک نظارہ نہ پیش کرن تے ایس خون و آلائش تے بیٹھن والے مچھر و مکھی‘ کتے بلیاں وغیرہ ایس آلائش نوں ہور کھلار کے بیماریاں دا کارن نہ بنن۔
قربانی جنی ضروری اے اوناں ای ایس عمل دی تکمیل دوران صحت و صفائی تے اہل محلہ دی سہولت دا خیال تے ایس خیال دی عام مسلماناں نوں مسلسل تعلیم وی ضروری اے پر میرا مشاہدہ اے کہ سو وچوں شاید اک یاں دو علماء یاں امام صحت و صفائی بارے قربانی دے پہلو تے ایناں زور دیندے ہون جناں کہ قربانی دی روحانی اہمیت تے۔ ایس لئی سب توں سوکھا کم ایہہ وے کہ صحت و صفائی دے معاملیاں وچ ورتی جان والی عمومی غفلت دا نزلہ سرکار تے سٹیا جاندا رہوے۔ ہر ورھے گلی دے وچکار ذبح کرن والیاں توں لے کے میڈیا دے کیمریاں تک سارے ای شکوہ کردے نیں کہ حکومت نے ایس واری وی صحت و صفائی دا غیرتسلی بخش انتظام کیتا اے۔ کوئی نہیں دسدا کہ حکومت یاں مقامی بلدیہ نے تے جانوراں دیاں آلائشاں نوں اکٹھا کرن لئی تھاواں ہفتہ بھر پہلاں ای مختص کر دتیاں سن تے ایہ وی درخواست کیتی سی کہ قربانی گلی وچ اپنے بوہے دے اگے کرن دی تھاں نزدیکی میدان وچ کیتی جاوے پر ساڈے وچوں ہر کوئی چاہندا اے کہ کوئی وی سانوں من مانی تے ٹوکے وی نہ سگوں قربانی اسیں کریئے تے سرکاری کارندے ساڈیاں پھیلائیاں آلائشاں نوں در در آ کے صاف کرن ایہ ساڈا پیدائشی حق تے حکومت دا پیدائشی فرض اے۔ اسیں کردے تے اپنی مرضی آں تے مثالاں خلیجی ملکاں دیاں دینے آں کہ اوتھے کوئی وی گلی یاں سڑک تے قربانی دا جانور پچھاڑن دی ہمت نہیں کر سکدا۔ یاں تے تسیں مخصوص تھاواں تے قربانی کرو گے جتھے سرکار نے پانی‘ قصائی تے آلائشاں دی صفائی دا پیشگی انتظام کر رکھیا اے یاں فیر کسے ادارے یاں تنظیم نوں پیسے دے دیو گے تاں جے اوہ تہاڈے ولوں مشینی مذبح خانے وچ قربانی کرکے گوشت تہاڈے تک اپڑا دیوے۔ ایہناں وچوں کسے وی ضابطے دی خلاف ورزی دا مطلب سزا یاں بھاری جرمانہ اے۔
اسیں خواہش کرنے آں کہ جدوں تک خلیجی نظام و ڈسپلن لاگو نہیں ہووے گا اسیں سدھر نہیں سکدے پر کدی کدائیں ایس ڈسپلن دا دس فیصد وی جدوں لاگو کرن دی کوشش کیتی جاندی اے تے رولا پے جاندا اے کہ ایہ ساڈی جدی پشتی روایت اے تے ایہدے وچ مداخلت برداشت نہیں کیتی جاوے گی۔ ایسے دوران اک ادھ مولوی صاحب اجیہا بیان دے کے بلدی تے تیل دا کم کر دیندے نیں کہ حکومت دینی معاملیاں وچ مداخلت توں باز رہوے نہیں تے نتیجیاں دی ذمہ دار وی حکومت ای ہووے گی تے فیر حکام فساد خلق دے ڈر توں تھوڑے بہت کیتے گئے اقدامات تے وی زور دین دی تھاں پچھے ہٹ جاندے نیں۔ ایس طرح بدنظمی و بے ترتیبی دی قومی روایت سینہ تانے اک ورھے ہور ترقی پا جاندی اے۔ منڈے کھنڈے ہمیشہ وانگوں اک موٹرسائیکل تے تن تن آ جا رہے نیں بکرے تے دنبے نوں وی موٹرسائیکل تے سوار کر رکھیا اے لوک کہہ رہے نیں کہ سامنے جو تن چار پولیس والے ہر ویلے کھڑے نیں اوہ کیوں طے شدہ کرونا ضابطہ کار تے عمل نہیں کرواندے؟ ایہناں لوکاں توں جے پرت کے پچھ لیا جاوے کہ تسیں تے اسیں مفاد دی ہر اونچ نیچ‘ چنگا برا چنگی طرح سمجھ لینے آں‘ نہیں سمجھ پاندے تے طے شدہ ضابطہ کار نہیں سمجھ پاندے حالاں کہ ایہ ایناں سوکھا اے کہ اک بچہ وی چاہے تے سمجھ سکدا اے۔ ڈسپلن اوتھے لاگو ہو سکدا اے جتھے لوک وی ڈسپلن اختیار کرن وچ دلچسپی رکھدے ہون۔ چار پنج پولیس والے وی ویہہ پنجی موٹرسائیکلاں تے ٹرپلنگ کرن والیاں نوں تے پھڑ سکدے نیں پر جتھے لونڈیاں دا پورا بریگیڈ سگوں ڈویژن ای سامنے توں آ جا رہیا ہووے اوہناں دا ایہ پولیس والے چھڈو کوئی وی کیہ وگاڑ لوے گا ایس لئی پولیس والے وی اپنا اصل کم چھڈ کے جہدے توں جنے پیسے وٹ سکدے نیں وٹن وچ لگ جاندے نیں۔
اج جے خلیجی ملکاں دی آبادی یاں مغربی ملکاں دے لوک ایہ کہندے ہوئے سڑکاں تے نکل آن کہ اسیں کوئی ضابطہ نہیں مناں گے تے پولیس کیہ فوج وی شہریاں توں قنوناں تے عمل نہیں کروا سکدی۔ ایہدا مطلب ایہ ہویا کہ شہریاں دی اکثریت وی قنون پسند ہووے فیر ای سرکار وی قنون تے عمل کروا سکدی اے۔ کیہ اسیں واقعی دل و دماغ توں قنون پسند آں‘ ایس سوال دا جواب کسے دی تھاں اپنے آپ نوں ای ایمانداری نال دے دیو تے جو وی جواب آوے اوہنوں اپنے تے لاگو کرن دی کوشش کرو تے سمجھ لینا کہ تسیں ایس عید تے جس نیت نال قربانی دتی پہلی واری ایس نیت دا حق ادا ہو گیا ایس لئی عید مبارک۔٭٭