تاریخ اہلِ کشمیر دے نال اے

بھارت نے عالمی قوانین نوں پامال کرن دا جیہڑا سلسلہ شروع کر رکھیا اے ایس نوں روکنا
عالمی برادری دی ذمہ داری اے تے ایہہ اقوام متحدہ دی ’’ کریڈیبلٹی‘‘ دا سوال اے

یوسف رضا گیلانی

بھارتی حکومت ولوں اگست 2019 وچ مقبوضہ کشمیر دے انضمام دا فیصلہ جتھے بھارت تے ایس خطے دی تاریخ دا اک سیاہ فیصلہ اے اوتھے ایہہ انتہائی دورس اثرات دا وی حامل اے۔ ایس فیصلے دے ذریعے بھارت نے خود نوں اک مطلق العنان ریاست ثابت کیتا اے جیہڑی کسے قاعدے قانون نوں خاطر وچ نہیں لیاندی۔ مقبوضہ وادی کشمیر دا انضمام بھارت دی نوآبادیاتی سوچ تے استعماری عزائم دا عکاس اے۔ عالمی برادری دا ایہہ قانونی تے اخلاقی فرض اے کہ اوہ مقبوضہ کشمیر دی صورتحال دا نوٹس لیندے ہوئے بھارت دے ایہناں جارحانہ اقدامات نوں روکے جنہاں دی وجہ نال اک پاسے لکھاں کشمیریاں دیاں زندگیاں تے دوجے پاسے ایس پورے خطے دا امن و امان دائو اُتے لگ چکیا اے۔
مینوں اک انج دے دور وچ اسلامی جمہوریہ پاکستان دی وزارت عظمیٰ سنبھالن دا اعزاز حاصل ہویا جدوں پاکستان وچ اک نویں جمہوری دور دا آغاز ہو رہیا سی تے سانوں علاقائی و داخلی سطح اُتے بوہت سارے چیلنجز در پیش سن جنہاں وچ مسئلہ کشمیر نوں مرکزی حیثیت حاصل سی۔ میں اپنی وزارت عظمیٰ دے دور دا آغاز اپنی جماعت دے ایس دیرنہ اصولی موقف دے اعادہ دے نال کیتا سی کہ اہل کشمیر نوں ایہناں دا پیدائشی تے ناقابل تنسیخ حق استصواب رائے تے اپنے مقدر دا خود فیصلہ کرن دا اختیار حاصل اے۔ میرے ساہمنے رہنمائی لئی اوہ اصول موجود سن جیہڑے 1965 وچ ذوالفقار علی بھٹو نے اقوام متحدہ دی سلامتی کونسل نال اپنے خطاب دے دوران پیش کیتے سن۔ میرا عزم سی کہ ہر پاکستانی کشمیر دے نال تہذیب و ثقافت، جغرافیہ تے تاریخ دے رشتے وچ بندھیا ہویا اے۔ میری پالیسی واضح سی کہ پاکستان اپنے کشمیری بھرائواں دی تحریک آزادی دی سفارتی ، قانونی تے اخلاقی مدد جاری رکھے گا۔
اسیں ایس اصولی موقف اُتے قائم آں کہ امن لئی مذاکرات دا عزم اپنی تھاں مسلم لیگ ایہہ امن ساڈے کشمیری بھین بھراواں دی آزادی تے خود مختاری دی قیمت اُتے ہر گز قابل قبول نہیں۔ میں جنوبی ایشیا دے عوام دی بہتری تے بھلائی دے جذبے تے امید دے نال بھارت تے پاکستان دے وچکار سارے تصفیہ طلب امور نوں پرامن طریقے نال حل کرن دی ہمیشہ حمایت کیتی اے۔
ایہو وجہ اے کہ سابق بھارتی وزیراعظم ڈاکٹر منموہن سنگھ مینوں ’’مردِ امن‘‘ کہہ کے مخاطب کیتا کردے سن۔ امن دی ایہہ خواہش پاکستانی قوم دی عظمت دے نال نال اہل کشمیر دیاں امنگاں دی ترجمان وی سی۔ کشمیری عوام دے اصولی موقف دی حمایت اسیں جوش و جذبے تے بصیرت و دانش دے نال کیتی اے پر ایہہ صورتحال انتہائی پریشان کن اے کہ ساڈی موجودہ حکومت نوں ایس اگ دی حدت ہجے تیکر محسوس نہیں ہوئی جیہڑی بھارت نے 5 اگست 2019 نوں بھڑکائی سی۔
کشمیر دے معاملے اُتے ایہہ اعتماد میرے، اندرون و بیرون ملک، جمہوری اقدار تے آزادی اُتے ایمان دی دین اے میں ایس گل نوں یقینی بنایا کہ پاکستان دی خارجہ پالیسی ساڈی پارلیمان طے کرے تے قومی اہمیت دے سارے معاملات ایسے فورم اُتے زیر بحث لیائے جان تاکہ دنیا دے ساہمنے پوری قوم دا اجتماعی فیصلہ رکھیا جا سکے۔ اج مینوں ایہہ ویکھ کے انتہائی دکھ ہوندا اے کہ موجودہ حکومت نہ صرف پارلیمان نوں نظر انداز کر رہی اے بلکہ کشمیر جہے اہم ترین مسئلے اُتے قومی اتفاق رائے پیدا کرن وچ وی یکسر ناکام وکھائی دیندی اے۔
اج سانوں مقبوضہ کشمیر دے حوالے نال نریندر مودی دے جارحانہ اقدامات دا بھرپور تے موثر جواب دین دی لوڑ اے۔ بھارت نے عالمی قوانین نوں پامال کرن دا جیہڑا سلسلہ شروع کر رکھیا اے ایس نوں روکنا عالمی برادری دی ذمہ داری اے تے ایہہ اقوام متحدہ دی ’’ کریڈیبلٹی‘‘ دا سوال اے۔
مقبوضہ کشمیر دے حوالے نال ساڈی حکومت نے جس نااہلی تے غیر ذمہ داری دا مظاہرہ کیتا اے اوہ ایس گل دی غمازی کردا اے کہ ساڈی حکومت نوں ایس مسئلے دی سنگینی دا یکسر احساس نہیں ۔ حکومت دے ایس غیر سنجیدہ رویے نااہل تے غیر جمہوری سوچ دے باوجود اسیں کشمیری عوام دے اہل پاکستان اُتے اعتماد نوں مجروح نہیں ہون دیاں گے۔ اسیں ہر طرح دی سیاست تے مفادات نوں بالائے طاق رکھدے ہوئے کشمیر دے معاملے اُتے موجودہ حکومت دا مکمل ساتھ دین دے عزم اُتے قائم آں کیوں جے اسیں سمجھنے آں کہ قومی تے ملکی معاملات اُتے کسے قسم دی سیاسی پوائنٹ سکورنگ نہیں ہونی چاہیدی۔
کشمیر اُتے بھارت دا غاصبانہ قبضہ تے اہل کشمیر دے بنیادی انسانی حقوق دی پامالی کسے طور بھارت دا اندرونی معاملہ نہیں بلکہ ایہہ پوری عالمی برادری، انسانی اقدار تے آزادی اُتے ایمان تے ایہناں دے تحفظ اُتے یقین رکھن والے ہر بندے لئی باعث تشویش اے تاریخ اہل کشمیر دے نال کھڑی اے تے پاکستانی عوام اپنے کشمیری بھین بھرائواں دے شانہ بشانہ کھڑے نیں تاکہ اوہ اپنی منزل آزادی تیکر نہیں اپڑ جاندے جیہڑا ایہناں دا مقدر اے۔