کشمیر وچ بھارتی مظالم اُتے عمران و جنرل باجوہ دے اقدامات

فیصل ادریس بٹ

مقبوضہ جموں کشمیر نوں دنیا دی سب توں وڈی جیل بنے ہوئے تیجا سال شروع ہو چکیا اے 5 اگست 2019 نوں بھارت نے سارے عالمی قوانین تے اقوام متحدہ دی قرار داداں دی خلاف ورزی کردے ہوئے جموں کشمیر نوں علیحدہ کر کے لداخ نوں ہڑپ کر لیا۔ بھارتی انتہا پسند حکومت نے ایہہ سمجھیا کہ کشمیری عوام وچ مزاحمت دم توڑ چکی اے تے عالمی رائے عامہ نوں اوہ ایس حد تیکر ہموار کر چکیا اے کہ عالمی قوانین نوں پامال کرن اُتے کسے پاسے توں کوئی مزاحمت نہیں ہوئے گی بھارت نے اپنی ایسے غلط فہمی وچ اپنے آئین دے آرٹیکل 370 تے 35 اے وچ تبدیلی کر کے سارے متنازع علاقیاں نوں بھارت دا حصہ قرار دے دتا دنیا دی وڈی طاقتاں نے تے ایس دی ایس مذموم حرکت دی روایتی مذمت دے سوا کجھ نہ کیتا پر کشمیری عوام دا جذبہ حریت فیر توں تازہ ہو گیا اوہناں نے بھارت دے ایس اقدام نوں تسلیم کرن توں انکار کردے ہوئے مزید مزاحمت دی راہ اپنائی جس وچ ویلا لنگھن دے نال نال تیزی آندی گئی۔ کشمیریاں دے جذبہ حریت دی اخلاقی سفارتی تے سیاسی بھرپور پشت پناہی پاکستان دے عوام تے حکومت نے کیتی چین نے وی لداخ دے معاملے وچ بھارت دے ایس اقدام نوں تسلیم کرن توں انکار کیتا تے بھارت نوں اپنے اقدام دا خمیازہ سرحدی علاقیاں توںپسپائی دی صورت وچ بھگتنا پیا۔ بھارتی فوجیاں نوں ذلت آمیز پسپائی اختیار کرنی پئی اوہ اپنی ساری عسکری تے سفارتی کوششاں دے باوجود چین نوں اپنے موقف تے پیش قدمی توں اک انچ وی پچھے نہیں ہٹا سکیا پاکستان نے وی عالمی سطح اُتے بھارت دی زیادتیاں نوں عالمی قوانین دی خلاف ورزیاں نوں چکن وچ کوئی کسر نہیں چھڈی بھارتی فوجاں نے مقبوضہ علاقیاں وچ کشمیری عوام اُتے ہر طرح دا ظلم ڈھایا دو ورہے دے دوران سینکڑے لوکاں نوں شہید کیتا گیا خواتین دی عصمت دری کیتی گئی ناکے لائے گئے سکول کالج یونیورسٹیاں بند کر دتیاں گئیاں کشمیری عوام اُتے زندگی مشکل توں مشکل تر کر دتی گئی۔ پاکستان دیاں کوششاں نال عالمی برادری نے ہن بھارت دے اقدامات اُتے کڑی تنقید شروع کر دتی اے خاص طور تے وزیراعظم عمرا ن خان دی اقوام متحدہ دی جنرل اسمبلی وچ خطاب اُتے اک پاسے تے بھارت خوب تلملایا دوجے پاسے عالمی برادری نے وزیراعظم عمران خان دے چکے گئے سوالاں نوں انتہائی سنجیدگی نال لیا ایہو وجہ اے کہ سلامتی کونسل وچ ایہہ مسئلہ ڈسکس ہویا دوجے پاسے یورپی یونین دے ارکان نے یورپی یونین دے صدر نوں خط لکھیا اے کہ بھارت وچ ہون والی انسانی حقوق دی خلاف ورزیاں نوں روکیا جائے خط وچ یورپی پارلیمنٹ دے ارکان نے ایہہ تسلیم کیتا اے کہ بھارت دی انتہا پسندی مودی حکومت بھارت وچ وسن والی اقلیتاں اُتے زندگی تنگ کر رکھی اے خصوصی طور اُتے مسلماناں تے کشمیر وچ ہون والے ظلم و ستم دا وی ذکر کیتا گیا اے۔ ایہہ سب وزیراعظم عمران خان دی ہر فورم اُتے مسئلہ کشمیر نوں چکن تے عالمی برادری توں نوٹس لین دی اپیل دا نتیجہ اے پاکستان نے اقوام متحدہ دے رہنماواں نوں وی اک خط لکھیا اے جس وچ اقوام متحدہ دی سلامتی کونسل دے صدر تے سیکرٹری جنرل نوں متوجہ کیتا گیا کہ بھارت مقبوضہ علاقے نوں دو حصیاں وچ تقسیم کرن تے آبادی دے تناسب نوں تبدیل کرن سنے غیر قانونی تے یکطرفہ اقدامات دے نفاذ اُتے غور کر رہیا اے۔
پاکستان دی حکومت دا مطالبہ اے کہ اقوام متحدہ اپنی قرار داداں اُتے عملدرآمد کرائے کشمیر وچ مظالم رکوائے تے بھارت نوں کشمیر وچ کیتے جان والی فوجی مہم جوئی دے خاتمے اُتے مجبور کرے پاکستان دا ایہہ موقف وی اے کہ بھارت 1951 توں ہن تیکر سارے غیر قانونی کاروائیاں بشمول 5 اگست 2019 تے ایس دے بعد دے اقدامات واپس کر لوے۔ بھارت ولوں اپنے ایہناں یکطرفہ اقدامات نوں تحفظ دین لئی ایس نے بار بار کنٹرول لائن دی خلاف ورزیاں کیتیاں نیں جنہاں دا پاکستان دی مسلح فوج نے منہ توڑ جواب دتا اے۔ پاکستان ہمیشہ توں کشمیری عوام دے نال کھڑا سی تے کھڑا رہوے گا۔ بھارت دی ساری اشتعال انگیزیاں دے باوجود پاکستان نے ہجے تیکر خطے دے امن نوں متاثر کرن والا کوئی جوابی اقدام نہیں کیتا پر پاکستان دی مسلح فوج جنرل قمر جاوید باجوہ دی قیادت وچ پوری طرح ہر جارحیت دا منہ توڑ جواب دین لئی ہمہ وقت تیاراے دنیا جاندی اے کہ پاکستان اک مضبوط ایٹمی قوت اے بھارت دی ہر شر انگیزی دا جواب دین دی صلاحیت رکھدا اے پر پاکستان دے وزیراعظم عمران خان تے مسلح فوج دے سربراہ جنرل قمر جاوید باجوہ بار بار اپنا موقف دہرا چکے نیں کہ پاکستان خطے وچ امن چاہندا اے پر امن دا دروازہ مسئلہ کشمیر دا حل اے جدوں تیکر مسئلہ کشمیر حل نہیں ہوئے گا خطے وچ پائیدار استحکام ممکن نہیں ایس لئی عالمی طاقتاں نوں چاہیدا اے کہ اوہ دنیا دے امن نوں یقینی بنان لئی مسئلہ کشمیرنوں اقوام متحدہ دی قرار داداں دے مطابق حل کروان۔ جے بھارت دی ایہہ سوچ اے کہ کشمیری عوام دے جذبہ حریت نوں طاقت تے دھونس نال دبا لوے گا تے ایہہ ایس دی غلط فہمی اے پاکستان دی حکومت تے فوج نوںوی ہن سفارتی کوششاں توں اگے ودھ کے کجھ زیادہ اقدامات کرنے چاہیدے نیں۔ اک انج دا ماحول پیدا کرن دی لوڑ اے جس نال عالمی ادارے تے عالمی طاقتاں کشمیر ول متوجہ ہون تے بھارت نوں مذاکرات دی میز اُتے لیان لئی مجبور کرن پاکستان دی سیاسی و عسکری قیادت ایہہ سمجھدی اے کہ جنگ کسے مسئلے دا حل نہیں پر دوجے فریق نوں مذاکرات دی میز اُتے لیان لئی کدی کدی طاقت وکھان دی لوڑ وی پئے سکدی اے۔