سید ابراہیم رئیسی دی حیاتی

شبیر احمد شگری

سب توں پہلے اسیں سید ابراہیم رئیسی نوں بھاری اکثریت نال کامیابی حاصل کرن اُتے آپ ایہناں نوں، ایران دے سپریم لیڈر آیت اللہ العظمیٰ سید علی خامنہ ای تے پوری ملت ایران نوں مبارکباد پیش کرنے آں۔ وزیراعظم عمران خان وی سید ابراہیم رئیسی نوں مبارکباد دین دے علاوہ دونواں ملکاں دے تعلقات وچ مزید بہتری خطے وچ امن لئی نیک خواہشاں دا اظہار کر چکے نیں۔ امید اے کہ سید ابراہیم رئیسی دی قیادت وچ ایران دے پاکستان دے نال مزید بہتر تعلقات ساہمنے آن گے۔ ایران ساڈا برادر اسلامی ملک اے جس دے نال ساڈے پرانے تے مضبوط ثقافتی ، مذہبی، تجارتی، سیاحتی تے علمی رشتیاں دی گہری جڑاں موجود نیں۔
اج دی تحریر وچ انقلاب اسلامی ایران دے بعد اہم عہدیاں اُتے خدمات انجام دین والے سید ابراہیم رئیسی دی زندگی اُتے نظر پاواں گے ایران دے حالیہ صدارتی انتخابات نے اک وار فیر دنیا نوں ثابت کر دتا کہ چار عشرے لنگھن دے باوجود ایرانی ملت انقلاب اسلامی تے نظام اسلامی اُتے ثابت قدمی نال قائم اےتے دنیا جھوٹے پروپیگنڈیاں، سازشاں تے پابندیاں دے باوجود ایران دا کجھ نہیں وگاڑ پائی۔ کیوں جے ایس انتخابات وچ عوام نے بھاری اکثریت نال اک انج دے بندے دا انتخاب کیتا اے جیہڑا نہ صرف بانی انقلاب اسلامی امام خمینیؒ دا سپاہی اے بلکہ رہبر انقلاب اسلامی آیت اللہ خامنہ ای دا وی قریبی ساتھی اے۔ حجت الاسلام و لمسلمین سید ابراہیم رئیسی نوں ملن والے بھاری ووٹاں نال جتھے اک پاسے عوام دی رہبر معظم انقلاب اسلامی تے ایہناں دے ساتھی نال محبت ثابت ہوندی اے تے دوجے پاسے باقی صدارتی نمائندیاں دے بوہت گھٹ تعداد وچ ووٹ حاصل کرن اُتے اغیار دے جھوٹے دعویاں دی قلعی کھل گئی اے۔ عوامی رائے دہی دے واضح فرق نال کجھ بین الاقوامی میڈیا دے جھوٹے پروپیگنڈیاں تے غلط کوریج دی وی بُری طرح حوصلہ شکنی ہوئی اے پر سانوں ایہہ ویکھنا اے کہ اینی بھاری اکثریت حاصل کرن والی شخصیت عوام وچ ایس قدر مقبول کیوں اے ایس لئی سانوں ایہناں دی کم عمری تے انقلاب اسلامی توں لے کے ہن تیکر دی خدمات نوں ویکھنا ہوئے گا۔
60سالہ سید ابراہیم رئیسی ایران دی انج دی اہم شخصیت نیں جنہاں نوں ایران دے سپریم لیڈر آیت اللہ علی خامنہ ای دے ممکنہ جانشین دے طور اُتے وی ویکھیا جاندا رہیااے۔ سید ابراہیم رئیسی حسینی سادات وچ نیں تے دونواں پاسے توں امام زین العابدین نال وابستہ نیں۔ پنج سال دی عمر وچ اوہناں نے سایہ پدری نوں کھو دتا تے یتیم ہو گئے۔
سید ابراہیم رئیسی نے 1983 وچ 23 سال دی عمر وچ آیت اللہ سید احمد علم الہدی دی وڈی دھی ڈاکٹر جمیلہ سادات علم الہدی نال شادی کیتی۔ ڈاکٹر علم الہدی ، تہران دی شہید بہشتی یونیورسٹی وچ فلسفہ برائے تعلیمی علوم وچ ایسوسی ایٹ پروفیسر نیں، ہیومینٹیز ریسرچ انسٹیٹیوٹ دے سابقہ ڈائریکٹر تے ثقافتی انقلاب دی سپریم کونسل دے تعلیمی کمیشن دے چیئر مین نیں۔ سید ابراہیم رئیسی تے ڈاکٹر علم الہدی دی دو دھیاں نیں۔
سید ابراہیم رئیسی صرف 20 سال دی عمر وچ ضلع کرج تے فیر ہمدان صوبے لئی پراسکیوٹر مقرر ہوئے ایس دے بعد ایہناں نوں تہران دے نائب پراسیکیوٹر دی حیثیت نال ترقی دتی گئی ایس دے بعد 1989 وچ تہران دے چیف پراسیکیوٹر بنے تے فیر 2004 وچ عدلیہ دے نائب سربراہ دے عہدے اُتے 10 سال تیکر فائز رہے تے 2019 توں ہن تیکر عدلیہ دے سربراہ دی حیثیت نال خدمات انجام دیندے رہے۔
سید ابراہیم رئیس الساداتی ،جیہڑے رئیسی دے ناں توں جانے جاندے نیں، 14 دسمبر 1960 نوں مشہد دے اک محلے نوغان وچ پیدا ہوئے۔ اوہناں نے اپنی ابتدائی تعلیم جوادیہ اسکول وچ مکمل کیتی تے ثانوی تعلیم دا آغاز نواب اسکول تے فیر آیت اللہ موسوی نژاد اسکول توں کیتا۔ 1975 وچ ، اوہ اپنی تعلیم جاری رکھن لئی قم دے آیت اللہ برجردی دے مدرسے وچ داخل ہوئے۔
حوزہ دی سطح دا کورس مکمل کرن دے بعد، اوہناں نے قانون وچ ماسٹر ڈگری کورس کیتا۔ ابراہیم رئیسی نے 2001 دے تعلیمی سال وچ وارثاں دے بغیر وراثت دے عنوان توں اپنے مقالے دا دفاع کیتا تے فیر مدرسہ شہید مطہری توں پی ایچ ڈی کر کے فقہ تے نجی قانون دے شعبے وچ اپنی تعلیم جاری رکھی۔ فقہ تے قانون دے میدان وچ اپنی تحقیق مکمل کر کے ، اوہ عالمی ترین سطح دے میدان وچ اعلیٰ درجے دی تعلیم حاصل کرن وچ کامیاب ہوئے، تے آخر کار فقہ تے قانون وچ تنازعہ دے اصول تے ظاہر دے عنوان توں اپنے ڈاکٹریٹ دے مقالے دا دفاع کیتا۔
سید ابراہیم رئیسی نے 1980 وچ کرج شہر دے جوڈیشل مینجمنٹ دے میدان وچ پیر رکھیا تے کجھ ای مہینیاں دے بعد، کل انقلاب دے اٹارنی جنرل شہید آیت اللہ قدوسی دے حکم اُتے اٹارنی جنرل بن گئے۔ کرج دے پراسیکیوٹر دے طور اُتے ایس شہر دی پیچیدہ صورتحال نوں منظم کرن وچ ایہناں دی کامیابی دا سبب ایہہ ہویا کہ 1982 وچ، بیک وقت کرج پراسیکیوٹر دے دفتر دے نال ایہناں نوں ہمدان سٹی پراسیکیوٹر دے دفتر دی ذمہ داری دتی گئی۔
تن توں چار مہینے تیکر ایہناں دونواں ذمہ داریاں وچ ایہناں دی بیک وقت موجودگی جاری رہی تے 1982 توں 1984 تیکر، اوہناں نے ہمدان صوبہ دے پراسکیوٹر دی حیثیت نال خدمات انجام دتیاں۔ 1985 وچ ، ابراہیم رئیسی تہران وچ انقلاب دے نائب پراسیکیوٹر بن گئے۔
امام خمینی دے انتقال دے بعد، رئیسی ہوراںنوں آیت اللہ یزدی دے فرمان دے ذریعہ تہران دا پراسیکیو ٹر مقرر کیتا گیا سی، تے اوہ 1989 توں 1994 تیکر پنج سال تیکر ایس عہدے اُتے فائز رہے۔ فیر، 1994 وچ، اوہ ملک دے جنرل انسپیکشن آرگنائزیشن دے سربراہ مقرر ہوئے تے 2004تیکر ایس عہدے دے انچارج رہے۔
رئیس رئیسی هہوری2004 توں 2014 تیکر 10 سال عدلیہ دے سربراہ رہے۔ مارچ 2016 وچ، ایہناں نوں ایران دے اعلیٰ قائد نے آستان قدس رضوی دی سربراہی لئی مقرر کیتا۔ آستان قدس توں پہلے، اوہ صالح امامزادہ دے ولی سن۔
ابراہیم رئیس نوں 14 اگست 2017 نوں سپریم لیڈر آیت اللہ خامنہ ای نے پنج سال لئی ایکسپیڈیسی کونسل دا ممبر مقرر فرمایا، تے ایہناں ای دے حکم نال اوہ 10 سال تیکر امام دے ایگزیکٹو ہیڈ کوارٹر دے بورڈ آف ٹرسٹی دے ممبر وی رہے۔
پارلیمنٹ دے ایوان صدر وچ، اوہناں نے سیکرٹریٹ دے ایگزیکٹو حصے دی ذمہ داری سنبھالی تے ایس دے علاوہ، ایہناں نوں تہران دے دفتر دی ذمہ داری وی دتی گئی، جیہڑے مختلف اداریاں تے تنظیماں تے ماہرین نال گل بات کرن دی ذمہ دار اے۔
ماہرین اسمبلی دے پنجویں دور و چ، اوہ بھاری اکثریت نال ووٹ حاصل کر کے دوجی وار جنوبی خراسان دے عوام دے نمائندے دے طور اُتے منتخب ہوئے تے ماہرین اسمبلی دے ایوان صدر وچ ایہناں دی رکنیت برقرار رہی۔رئیس رئیسی 2019 توں ہن تیکر عدلیہ دے سربراہ دی حیثیت نال خدمات انجام دیندے رہے تے ہن بھاری اکثریت نال جت کے اسلامی جمہوریہ ایران دے صدر بنن دا اعزاز حاصل کر چکے نیں۔
سید ابراہیم رئیسی نہ صرف ایران دے سپریم لیڈر آیت اللہ خامنہ ای دے قریبی ساتھیاں وچوں نیں بلکہ انقلاب دے آغاز توں ای اوہ سرگرم عمل رہے نیں ایس لئی اوہ انقلاب جنہوں ناکام کرن لئی دنیا اپنی پوری طاقت صرف کر چکی تے ہر قسم دے حربے استعمال کر چکی پر 42 سال لنگھن دے باوجود ایس انقلاب دا وال وی بیکا نہیں کر سکی تے علامہ اقبال دے ایس شعر دے مطابق :
تندی باد مخالف سے نہ گھبرا اے عقاب
یہ تو چلتی ہے تجھے اُونچا اڑانے کے لئے
ایران نے دنیا دی پابندیاں تے مخالفتاں نوں مثبت انداز وچ لیندے ہوئے ہر میدان حتیٰ کہ سائنس تے ٹیکنالوجی تیکر وچ بیش بہا ترقی کر لئی اے تے ایہہ سب رہبر انقلاب دی سرپرستی تے انقلاب تے اسلامی اصولاں اُتے درست انداز وچ عمل پیرا ہون دی وجہ نال ممکن ہویا اے ایسے طرح سید ابراہیمی وی دو ٹوک موقف رکھدے نیں۔ ایرانی چیف جسٹس دی حیثیت نال اوہناں نے مغربی ملکاں ولوں ایران وچ انسانی حقوق دے بارے کیتے جھوٹے دعویاں اُتے شدید تنقید کردے ہوئے کہیا کہ اسیں انسانی حقوق دے دعویداراں اُتے اپنی جیلاں دے دروازے کھولن نوں تیار آں تاکہ اوہ جس قیدی نال چاہن ملاقات کرن شرط ایہہ وے کہ اوہ وی سانوں اپنے ملکاں وچ کسے وی قیدی نال ملاقات کرن دین تے انج واضح ہو جائے گا کہ کس ملک وچ انسانی حقوق دا زیادہ خیال رکھیا جاندا اے۔ اوہناں نے مغربی ملکاں نوں مخاطب کردے ہوئے کہیا کہ دعوے بوہت ہو چکے ، جے تسیں گلاں توں ودھ کے عمل کرنا وی جاندے او تے بسم اللہ …
صدارتی انتخابات وچ کامیابی دے بعد ایہناں دا کہنا سی کہ امریکا ایران اُتے عائد ساری امریکی پابندیاں چکن دا پابند اے خارجہ پالیسی جوہری معاہدے تیکر محدود نہیں ہوئے گی ایرانی عوام دیاں امنگاں نوں جوہری ڈیل نال نہیں جوڑ سکدے۔ اوہناں نے امریکی ہم منصب نال ملاقات، میزائل پروگرام تے خطے دے عسکری گروپاں دی حمایت ترک کرن دے معاملے اُتے مذاکرات توں صاف انکار کر دتا۔ ایہناں گلاں توں واضح ہوندا اے کہ نویں ایرانی صدر ایہناں معاملات وچ کوئی لچک وکھان دی پوزیشن وچ ہر گز نہیں بلکہ اپنے موقف اُتے سختی نال ڈٹے رہن گے۔
ایتھے ایہہ گل قابل ذکر اے کہ امریکا 1988 وچ 5 ہزار توں ودھ سیاسی قیدیاں نوں پھانسی دی سزا دین دے الزام اُتے ابراہیم رئیسی اُتے پابندی عائد کر چکیا اے جدوں اوہ ڈیتھ پینل وچ بطور پراسیکیوٹر شامل سن۔تن ورہے پہلاں آیت اللہ سید ابراہیم رئیسی نوں رہبر انقلاب اسلامی نے عدلیہ دا سربراہ مقرر کیتا جیہڑا حالیہ صدارتی انتخابات توں پہلاں ایہناں دا آخری منصب سی جس دے دوران اوہناں نے عدلیہ دے شعبے وچ نمایاں انقلابی تبدیلیاں کیتیاں جس اُتے رہبر انقلاب اسلامی ایہناں دے اقدامات دی ستائش وی کر چکے نیں۔
ایران وچ رائج شمسی کلینڈر دے مطابق ایران پندرھویں صدی دے آغاز وچ پیر رکھ چکیا اے تے ایران دے سارے امور اک انج دی شخصیت دے ہتھ وچ نیں کہ جنہوں عوام دی واضح اکثریت نے انتخاب کیتا اے کہ جس دا ماضی بے داغ تے اہم امور وچ تحسین آمیز اقدامات دا غماز اے۔
ایس ویلے ایران وچ حالات اک وڈی تے سنجیدہ تبدیلی لئی موافق نیں جیہڑے اسلامی انقلاب دے اعلیٰ اہداف دے حصول وچ مزید سرعت دا باعث بن سکدے نیں۔ تاں جے ایران سنے خطے تے امت مسلمہ دے مفاد دی گل کیتی جائے تے سید ابراہیم رئیسی دا صدر منتخب ہونا عالمی اسلام لئی اک نیک شگون اے ایہناں دا کہنا سی کہ دنیا دے نال باہمی رابطیاں دے خواہا ں نیں ، گوانڈھی ملکاں نال تعلقات وچ بہتری ترجیحات وچ شامل اے تے پوری دنیا نال گل بات کرن گے۔
پاکستان دی متعدد سیاسی تے مذہبی شخصیات نے وی پیغامات وچ ایرانی صدارتی انتخابات وچ سید رئیسی دی فتح اُتے مبارکباد دتی۔ ایسے طرح نویں ایرانی صدر ولوں وی اپنے برادر ملک پاکستان لئی خیر سگالی تے نیک خواہشاں دا اظہار کیتا گیا۔
تہران دے صدارتی انتخابات دے بعد خطے وچ ہون والی سب توں اہم پیش رفت وزیراعظم عمران خان ولوں اک اہم انٹرویو دے دوران امریکہ نوں کیتا جان والا واضح انکار اے۔ ایس طرح عمران خان دوجیاں دی جنگ نہ لڑن تے امریکی پالیسی دے خلاف کھل کے دو ٹوک موقف دا اظہار کر چکے نیں میرے خیال وچ وزیراعظم عمران خان دا امریکہ مخالف بیان تے ایران وچ ابراہیم رئیسی دا اقتدار سنبھالنا پاکستان تے ایران نوں اک دوجے دے نیڑے لیان وچ معاون ثابت ہو سکدا اے کیوں جے برادر اسلامی ملک ایران وی اک عرصے توں ایسے موقف اُتے ڈٹیا ہویا اے تے لازمی طور اُتے پاکستان دے ایس موقف دی تائید کرے گا۔ دوجے پاسے پاکستان وی امریکہ دی مخالفت دی صورت وچ ایران نوں اپنے نال کھڑا ہویا ویکھنا پسند کرے گا، تاں ایہہ صورت حال دونواں برادر اسلامی ملکاں نوں اک دوجے دے ہور نیڑے لیان تے تعلقات دی مضبوطی دے نویں دور دا پیش خیمہ ثابت ہو سکدی اے۔ ایس لحاظ نال وی سید ابراہیم رئیسی دا ایران دا صدر منتخب ہونا پاکستان لئی اہم تے مددگار ثابت ہو سکدا اے۔ ایس دے نال نال چین دی ایران وچ وڈی سرمایہ کاری وی پاکستان دی ترقی وچ براہ راست ممد ود ثابت ہوئے گی۔ دونویں ملکاں دے وچکار نویں سرحدی گزر گاہواں دے کھولے جان تے مزید گزر گاہواں دے کھولن دے پروگرام نال وی پاکستان تے ایران مزید اک دوجے دے نیڑے آ رہے نیں۔ ساڈی دعا اے کہ دونواں برادر اسلامی ملک پاکستان تے ایران دے تعلقات مزید مستحکم ہون تے ایہہ دونویں ملک رل کے خطے دی تقدیر بدلن وچ اپنا کردار ادا کرن۔ انشاء اللہ