دلکش مزدور عورتاں

لکھت:صوفیہ بیدار

بندے کتھے بندیاں نال لڑدے نیں اوہ تے مفادات ہوندے نیں جو ٹکراندے نیں 9/11 وی اک تہذیب نال دوجی دے ٹکران دا ناں سی پچھلے کجھ ورھیاں توں میرا جسم میری مرضی دا نعرہ لان والیاں تے مشرقی تہذیب بچان والیاں وچ ٹھن گئی اے دلچسپ گل ایہہ وے کہ ہر دو طبقہ فکر اپنے موقف نوں اپنے اوس امیج نوں بچان لئی ورت رہے نیں جو اوہناں دے مالی استحکام دا کارن اے۔ مغربی تہذیب تے روشن خیالی ویچن والے ودھ توں ودھ گالھاں کھاندے نیں تے ودھ توں ودھ ڈالر کماندے نیں مشرق نوں ویچن والے گردے ویچن توں لے کے بابل دے گیت تک ویچ رہے نیں اوہناں دی ذاتی زندگیاں ول نظر ماریئے تے حیرت ہوندی اے کہ ایہ برصغیر دی تہذیب نوں بچان دے داعی نیں۔ مشرقی کہانیاں ویچن دا معاملہ اے یاں مسلم تہذیب و تمدن نال وی اوہناں دا کوئی لاحقہ اے مسلم تہذیب عربی ترکی فارسی لباس و طعام دا ناں اے یاں اوہدی کوئی روح وی اے باغ پارٹی دے بالمقابل مشرق دے داعیاں دے کول وی کوئی فلسفہ نہیں۔
اک گل جہڑی دوہاں دھڑیاں وچ سانجھی اے مالی مفاد توں علاوہ دوویں ای کم علم تے نظریہ وچ واضح نہیں کس تہذیب نوں مشرقی کہندے نیں مشرق وچ تے جاپانی تہذیب وی آ جاندی اے چائنیز وی سب چینلاں تے بیٹھن تے پروگرام دا پارہ ایس حد تک ودھان دے حیلے نیں تاں جے ایہناں دوہاں پارٹیاں دا مول وی ودھے تے پروگراماں وچ وی برابر سدیا جاوے حالاں کہ جس طرح دیاں گالھاں تہذیب دی خوبصورتی نوں بچان والے کردے نیں اپنی مثال آپ اے ایسے طرح میرا جسم والیاں عورتاں بال بچیاں دی پروا کیتے بناں انج انج دیاں گالھاں کھاندیاں نیں کہ دوہاں تہذیباں توں نفرت ہو جاندی اے مینوں لگدا اے ہر بندہ اپنی تہذیب دا آپ ای داعی اے پر کجھ چیزاں سانجھیاں نیں جیویں منافقت ماشاء اللہ خاتون اداکارہ جہڑی ادھورے لباس وچ شوز وچ رقص کردیاں نیں پہلی بیوی نوں فارغ کرا کے آپ مشرقی بیوی بن جاندی اے تے شوہر دیاں جتیاں پالش کرن دیاں گلاں کردیاں نیں تے ایہدے وچ حیرت دی کہڑی گل اے اوہ خاتون بالکل انج ای اے جیویں عورت ایتھوں دا مرد چاہندا اے اوہدے حقیقی کردار نال کسے دا کیہ لینا دینا اہم ایہہ وے کہ ناچ گانے توں ویہلی ہو کے شوہر پرستی دا بیان دیوے پورا مشرق خوش ہو جاندا اے کہ تہذیب تے زبانی کلامی مہر لگ گئی۔
کوئی سچا بندہ ایہ سسٹم بچا سکدا اے؟ ایس منافقت بھرے ماحول وچ ایہو بیویاں ضرورت بن چکیاں نیں زبانی بیان دیندیاں رہیاں اج کل کجھ ہور ماڈرن اداکاراں ٹی وی تے اپنے شوہر دے گن گاندیاں تے جو کجھ وی ہون میاں دی وجہ نال ہون کہندیاں وکھائی دیندیاں نیں یعنی ایہ سب ناچ گانا ایہناں پاروں اے کہ اوہناں دی طلب بس اک مشرقی تہذیب والا بیان اے جہدے توں ثابت ہووے کہ بیوی باغی نہیں ہوئی کنٹرول وچ اے۔ فلمی تے اوہناں دے پس منظر والے طبقے نے ایہ مسئلہ انج حل کیتا کہ فلم لئی تیار ہون والی اداکارہ دا کم سنی وچ اک نکاح کسے سازندے نال کرا دتا اوہدے بعد عورت دے باغی ہون دی یعنی محبت وچ نس جان دیاں راہواں گھٹ گئیاں کہ ویاہی عورت نوں نسانا زیادہ وڈا قنونی پاپ اے۔اجہی دوغلی عورت کیوں جنم لیندی اے؟ ڈیمانڈ اینڈ سپلائی دے رول دے مطابق اودوں تک تخلیق نہیں جنم لیندی جدوں تک اوہدی ضرورت جنم نہ لوے۔
میں اپنی حیاتی وچ جنیاں مضبوط عورتاں ویکھیاں اوہ اپنے لئی باکردار سن مردانہ رشتیاں دے شملے اچے کرن لئی نہیں جے ایس ذاتی پاکبازی نال باپ بھائیاں یاں شوہر دے شملے وی اچے ہو جان تے کوئی حرج نہیں پر شرافت‘ نیکی‘ کردار کسے دی وجہ نال یاں کسے نوں وکھان لئی نہیں ہونا چاہیدا مرد تے عورت وچ کوئی اک صنف اکلی گنہگار نہیں ہو سکدی ایہ کاروبار دوہاں دے تعاون نال چلدا اے۔ جیویں ایکٹرس مشرقی بیوی دا ناٹک کر رہی سی انج ای طاہرہ عبداللہ وی خبردار خبردار دا اجیہا الارم وجا رہیاں سن کہ سکیاں دی جھنکار دی سمجھ ای نہیں آئی کہ کس پاسے شمار کراں سکے جہڑے ہر موقعے تے اچھلدے نیں عقیقے ہون ناچ گانے یاں معتبر محفلاں نوٹاں دیاں واٹاں لگ جاندیاں نیں۔
بھیا لگے رہو اپنے اپنے کم تے منافع ترین سماج نوں ہر پاسے دوہاں پاسے منافقین ای ملن گے جس طرح خبیث مرداں نوں خبیث عورتاں ملن دا اشارا اے ایتھے سب توں بھیڑی عورت اوہ ہو ندی اے جو اپنے موقف دے نال جیوندی اے۔ صاحب الرائے ہوندی اے کماندی اے مزدور ہوندی اے پڑھی لکھی ہوندی اے وڈے وڈے دانشور بیوی دے روپ وچ اوہنوں برداشت نہیں کردے اوہناں نوں سارا غلغلہ دے نال پبلک وچ منافقانہ بیان دین والیاں بیویاں چاہیدیاں نیں کہ اوہناں دی انا اینی چھوٹی پے چکی اے جو تھوڑی جہی خودمختاری نال زخمی ہو جاندی اے موجودہ سارے تہذیبی منظر وچ میں تے میرے ورگیاں ان گنت مزدور عورتاں دی کوئی تھاں نہیں ایہ جو دو پارٹیاں لڑ رہیاں نیں اسیں ایہناں وچوں کدھرے فال نہیں کردے والدہ ن صرت ادیب ہاشمی دا اک شعر اے:
کردار کو خود وقت ہی کردیتا ہے عریاں
میں نے تو کسی شخص کو پرکھا نہیں ابتک
راہ بڑا اوکھا اے بہت سارے خیرخواہ نسوانی رشتیاں نے کہیا وی اپنی سوچ دے ہتھیار سٹ دیو ایس مردہ سماج وچ بناں محنت دے عیش کرو ضروری ہدف دی مالا جیومن مرضی کرو پر ساڈی من مرضی ای کجھ ہور سی۔ سانوں تے حقیقی سچی عورتاں دے موقف دی جدوجہد نوں اگے ودھانا سی ریلے ریس وچ جو سٹک والدہ نے ساڈے ہتھ وچ دتی سی اوہنوں اپنی دھی نوں تھمانا سی۔ پتہ نہیں ایہ کہڑا نشہ اے پتہ نہیں کیہ سرور اے اینیاں رکاوٹاں اجہیاں مخالفتاں تے دشمنیاں پار کرکے اپنے پیراں تے کھڑے رہنا ای حقیقی آزادی اے۔ آزادی دا مطلب آزادی فکر تے فیصلہ سازی دی طاقت اے نہیں تے ملن والیاں آسائشاں پسندیدہ پٹ جانور دے اگے آسائشاں و مہنگے کھان پان والی گل اے ہتھاں وچ وڈیاں گٹھلیاں پنڈلیاں دی تھکاوٹ سنو لائے ہوئے سٹالاں تے کھڑے چہرے ڈیوٹیاں کردیاں عورتاں‘ مہنگے پارلرز چوں نکلن والی بیگمات توں کدھرے ودھ دلکش لگدیاں نیں۔ یااللہ مینوں ایہناں مزدور عورتاں وچوں اٹھانا۔٭٭