سردار عبدالقیوم خان نیازی آزاد جموں و کشمیر دے وزیراعظم منتخب، حلف چُک لیا

ظہیر اعظم جرال

آزاد کشمیر دے 13 ویں پارلیمانی انتخابات دا اعصاب شکن مرحلہ پچھلے دن 53 رکنی ایوان وچ 33 ووٹ لے کے کامیاب ہون والے سردار عبدالقیوم نیازی دے بحیثیت وزیراعظم آزاد جموں کشمیر حلف لین دے بعد ابتدائی طور اُتے مکمل ہو گیا۔ آزاد کشمیر وچ الیکشن مہم توں پہلاں ای پی ٹی آئی وچ وزارت عظمیٰ دے منصب لئی غیر معمولی دلچسپی وکھائی دے رہی سی پر 25 جولائی نوں حکومت سازی لئی مطلوبہ اکثریت ملن دے بعد وزارت عظمیٰ لئی کئی ناں قومی میڈیا تے سوشل میڈیا اُتے زیر بحث رہے۔ پی ٹی آئی کشمیر دے صدر سابق وزیراعظم بیرسٹر سلطان محمود چوہدری تے پی ٹی آئی کشمیر الیکشن مہم دے وائس چیئر مین تے مالی طور اُتے مستحکم سردار تنویر الیاس نوں وزارت عظمیٰ دی دوڑ وچ مضبوط امیدوار تصور کیتا جا رہیا سی۔ ایہناں دونواں رہنمائواں نے الیکشن مہم وچ بلاشبہ شاندار کارکردگی وکھائی۔ وزارت عظمیٰ دی دوڑ وچ مالی طور اُتے مستحکم سردار تنویر الیاس نوں اگرچہ مضبوط امیدوار تصور کیتا جا رہیا سی۔ پارٹی دے جنرل سیکرٹری عبدالماجد خان، سینئر سیاستدان خواجہ فاروق احمد، چوہدری اظہر صادق، نثار انصر ابدالی تے دیوان علی خان چغتائی دے ناں وی ایس دوران زیر بحث رہے تاں پی ٹی آئی کشمیر دے صدر سابق وزیراعظم بیرسٹر سلطان محمود چوہدری نوں تجربے دے لحاظ نال ایہناں سب اُتے سبقت حاصل رہی۔ایہناں پارٹی رہنمائواں نوں ایس الیکشن مہم دے دوران ملن والی کامیابی بہرحال آزاد کشمیر دے نومنتخب وزیراعظم دی کامیابی ثابت ہوئی اے۔ آخری مرحلے وچ وزارت عظمیٰ دے امیدوار لئی کیوں جے پارٹی قائد نے ایس دا فیصلہ کرنا سی، ایس لئی وزیراعظم پاکستان عمران خان کجھ نومنتخب ممبران اسمبلی نال ملاقاتاں کر کے آخر کار ایس غیر معمولی انتخاب تیکر اپڑن وچ کامیاب ہو گئے۔
نومنتخب وزیراعظم سردار عبدالقیوم نیازی دے انتخاب دے فیصلے دا جے جائزہ لیا جائے تے وزیراعظم پاکستان عمران خان نے آزاد کشمیر دے پسماندہ ترین علاقے تے کنٹرول لائن نال تعلق رکھن والے اک سیاسی کارکن نوں وزیراعظم نامزد کر کے ایہناں الزامات دی نفی کر دتی کہ پی ٹی آئی وچ پیسہ یا وڈے قبیلے دی بنیاد اُتے اہم منصب ملدا اے۔ کیوں جے وزیراعظم سردار عبدالقیوم خان نیازی دا تعلق، دلی، قبیلہ نال اے جیہڑا آزاد کشمیر وچ اک محدود قبیلہ اے، نومنتخب وزیراعظم نہ تے وڈے سرمایہ دار نیں تے نہ ای اسمبلی وچ ایس قبیلے دا کوئی دوجا رکن اے جس اُتے غیر جانبدار سیاسی حلقیاں دا کہنا اے کہ اک عام سیاسی کارکن نوں آزاد کشمیر دا وزیراعظم نامزد کر کے وزیراعظم عمران خان نے اپنی سیاسی پختگی تے قائدانہ ویژن دا مظاہرہ کیتا اے نومنتخب وزیراعظم سردار عبدالقیوم نیازی نے ایوان وچ پیش کیتی گئی مذمتی قرار داداں اُتے اظہار خیال کردے ہوئے واضح کیتا کہ زیر قبضہ کشمیر دی خصوصی حیثیت ختم کرن دی بھارت دی 5 اگست دی کاروائی دے خلاف ساری جماعتاں متحد نیں۔ آزاد کشمیر دی حیثیت تبدیل نہیں ہو سکدی۔ اپوزیشن نوں ہر مرحلے اُتے اعتماد وچ لیندے رہاں گے۔ ایہناں افواہواں وچ کوئی سچائی نہیں۔ نو منتخب وزیراعظم نے اپنے منصب دا حلف چکن دے بعد گل بات کردے ہوئے کہیا کہ مینوں اسمبلی وچ اپڑن توں کجھ دیر پہلاں اپنی نامزدگی دی خبر ملی، میں اک سیاسی کارکن واں وزیراعظم دے امیدواران نت نویں سوٹ تے شیروانی سوا کے رکھدے نیں پر جیہڑے کپڑے میں اج پا رکھے نیں کسے نے لیا کے دتے، ایہہ میرے اللہ دا کرم تے پارٹی چیئر مین دا ویژن اے کہ میرے جہیا اک عام کارکن وی اج وزارت عظمیٰ دے منصب اُتے فائز ہویا اے۔اوہناں نے کہیا کہ پارٹی چیئر مین وزیراعظم پاکستان عمران خان دے ویژن دے مطابق گڈ گورننس، قانون دی حکمرانی تے کشمیر کاز میری ترجیحات نیں جد کہ متحدہ اپوزیشن وچ قد آور سیاسی شخصیات نوں اپنے لئی مثبت تے مفید علامت سمجھنا واں۔
پی ٹی آئی کشمیر دے صدر بیرسٹر سلطان محمود نے نومنتخب وزیراعظم دے حوالے نال کہیا کہ پارٹی چیئر مین وزیراعظم عمران خان نوں اسیں اختیار دتا سی کہ جس نوں اوہ وزیراعظم نامزد کرن گے اسیں ایہنوں قبول کراں گے تاں میں اپنے پارٹی امیدوار نوں ووٹ دتا اے۔ ایہہ گل اوہناں نے اسمبلی ہال توں روانگی اُتے میڈیا نال گل بات کردے ہوئے کہی۔ بیرسٹر سلطان محمود نومنتخب وزیراعظم دی تقریب حلف برداری وچ باضابطہ دعوت نہ ملن پاروں شریک نہ ہوئے۔ بیرسٹر سلطان محمود دے حقیقی کزن چوہدری ارشد حسین دے متعلق اطلاعات نیں کہ اوہ سردار عبدالقیوم نیازی دی کابینہ وچ شامل ہون گے۔ سال 1969 نوں جنم لین والے نومنتخب وزیراعظم سردار عبدالقیوم خان نیازی دا تعلق کنٹرول لائن اُتے واقع پنڈ درہ شیر خان تتہ پانی نال اے اوہناں نے اپنے سیاسی کیریئر دا آغاز 1982 وچ بطور ڈسٹرکٹ کونسلر کیتا سال 2006 وچ پہلی وار مسلم کانفرنس دے ٹکٹ اُتے ممبر اسمبلی منتخب ہوئے تے اپنی پارلیمانی سیاست دا آغاز کیتا۔ اوہ 2006 توں 2011تیکر وزیر مال، جیل خانہ جات رہے۔ اوہناں نے 2011 دے بعد 2016 دے انتخابات وچ وی حصہ لیا تے حلقہ دی عوام نے بھرپور اعتماد دا اظہار کیتا تاں مسلم لیگ ن دے امیدوار ولوں انتخابی عذرداری وچ مختلف پولنگ اسٹیشن دے مبینہ گھیرائو جلائو دے الزام اُتے ایس حلقہ وچ دوبارہ پولنگ کرائی گئی تے مسلم لیگ ن نے ایہہ نشست جت لئی ۔ اپنی پارٹی قیادت دی الیکشن وچ سرد مہری اُتے کجھ عرصہ ناراض رہن دے بعد اوہ تحریک انصاف آزاد کشمیر دا حصہ بن گئے۔ لائن آف کنٹرول دی وجہ نال آپ دا گھر کئی وار بھارتی گولہ باری نال متاثر ہویا تے آپ بال بال بچے۔ آپ نے ہمیشہ اپنے حلقے دے لوکاں دا ساتھ نبھایا تے فائرنگ دے دوران زخمیاں دی عیادت لئی اپڑدے رہے۔ آپ نے کدی وی اپنا پنڈ نہ چھڈیا کیوں جے اوہ سمجھدے سن کہ ایہناں دا پورا حلقہ ایل او سی اُتے واقع اے ایس لئی جے اوہ پنڈ چھڈ دین گے تے ایہناں دے حلقے دے عوام دا مورال گھٹ ہوئے گا۔ بھارتی توپاں تے گولیاں دے ساہمنے کھڑے رہن والے سرداری عبدالقیوم نیازی نے وزیراعظم عمران خان دی حکومت بن دے ای سب توں پہلا مطالبہ کیتا کہ ایل او سی دے لوکاں نوں بینکر بنا کے دتے جان تے صحت سہولتاں دی مہیا کیتیاں جان۔ چنانچہ پہلی فرصت وچ وفاقی حکومت توں ایل او سی دے لوکاں نوں صحت کارڈ د سہولت فراہم کیتی۔ سردار عبدالقیوم نیازی نے ہمیشہ سارے قبائل نوں نال ملایا تے برادری ازم دی حوصلہ شکنی کیتی تے ایہو وجہ اے کہ اپنے حلقے وچ عددی لحاظ نال تیجے نمبر دی برادری ہون دے باوجود ہمیشہ دیگر قبائل دے ہزاراں ووٹراں دا اعتماد لین وچ کامیاب رہے۔ سردار عبدالقیوم نیازی انتہائی شریف النفس، ہمدرد، صوم و صلوٰۃ دے پابند درویش صفت شخصیت دے مالک نیں۔ آپ دے وڈے بھرا سردار غلام مصطفی 2 وار آزاد کشمیر اسمبلی دے ممبر بن کے وزارت دے منصب اُتے فائز رہے۔ آپ دے اک نکے بھرا سردار حبیب ضیاء، سپریم کورٹ آزاد کشمیر دے منجھے ہوئے وکیل نیں آپ دے تیجے بھرا امریکا وچ مقیم نیں آپ دا اک پتر برطانیہ وچ قونصلر اے۔ آپ نے آزاد کشمیر یونیورسٹی توں گریجویشن کر رکھی اے۔
متحدہ اپوزیشن نے پیپلز پارٹی آزاد کشمیر دے صدر چوہدری لطیف اکبر نوں اپوزیشن لیڈر تے مسلم لیگ ن دے محمد احمد رضا قادری نوں ڈپٹی اپوزیشن لیڈر نامزد کیتا اے۔ سردار تنویر الیاس نے وی سینئر وزیر دی حیثیت نال حلف چکیا۔ نویں قائد ایوان نوں پہلے خطاب کرن دا موقع دین اُتے رخصت ہون والے قائد ایوان راجہ محمد فاروق حیدر نے متحدہ اپوزیشن دے نال اجلاس توں واک آئوٹ کیتا۔ سابق وزیراعظم نے کہیا کہ سپیکر اسمبلی نے مینوں پہلے گل کرن دا موقع نہ دے کے جانبداری ورتی، اسیں الیکشن وچ دھاندلی دے خلاف اسمبلی دے اندر تے باہر وی اواز چکاں گے۔ اپوزیشن دی کیہ حکمت عملی رہندی اے ایہہ تے آن والا ویلا ای دسے گا البتہ ویکھنا ایہہ وے کہ نومنتخب وزیراعظم سردار عبدالقیوم نیازی اپنے ساتھیاں بیرسٹر سلطان محمود سنے دیگر پارلیمانی پارٹی نوں نال رکھدے ہوئے آزاد کشمیر وچ تعمیر و ترقی، گڈ گورننس، صاف شفاف احتساب تے آزاد خطہ نوں تحریک آزادی کشمیر دا حقیقی بیس کیمپ بنان لئی کیہ عملی اقدامات چکدے نیں۔
آزاد جموں و کشمیر قانون ساز اسمبلی وچ سپیشل نشستاں اُتے ہون والے انتخاب وچ علما و مشائخ دی نشست اُتے پی ٹی آئی دے محمد مظہر سعید ، ٹیکنو کریٹ دی نشست اُتے محمد رفیق نیئر تے سمندر پار کشمیریاں دی نشست اُتے محمد اقبال کامیاب قرار دتے گئے نیں ۔ خواتین دی 5 مخصوص نشستاں اُتے امیدواران بلامقابلہ منتخب ہو گئیاں نیں جنہاں وچوں پی ٹی آئی دی تن خواتین محترمہ امتیاز نسیم، محترمہ کوثر تقدیس گیلانی، محترمہ صبیحہ صدیق چوہدری، پاکستان پیپلز پارٹی دی نبیلہ ایوب ایڈووکیٹ تے مسلم لیگ ن دی نثاراں عباسی بلامقابلہ کامیاب قرار پائیاں نیں۔ پی ٹی آئی نوں تن، پیپلز پارٹی تے مسلم لیگ ن نوں خواتین دی اک اک مخصوصی نشست ملی۔ 53 رکنی ایوان وچ حکومت سازی لئی 27 ووٹ درکار نیں۔ تن مزید نشستاں اُتے کامیابی دے بعد پی ٹی آئی نے 32 نشستاں دی واضح اکثریت دے نال حکومت سازی کیتی اے جد کہ پیپلز پارٹی دی 12 تے مسلم لیگ ن دی ایوان وچ 7 نشستاں نیں۔ جموں کشمیر پیپلز پارٹی تے مسلم کانفرنس دے کول اک نشست موجود اے۔ پیپلز پارٹی دی 12 وچوں 2نشستاں چوہدری یاسین نے حاصل کیتی اے۔ چوہدری یاسین اک نشست چھڈاں گے جس اُتے ضمنی الیکشن ہوئے گا۔
ایس وار وزیراعظم دے امیدوار دی نامزدگی دا جے تجزیہ کیتا جائے تے بیرسٹر سلطان محمود چوہدری دے ایس دوڑ و چ پچھے رہ جان دی اک وجہ ایہناں اُتے اپنی ای پارٹی دے امیدواران دا الزام اے۔ حلقہ ایل اے 7 بھمبر، ایل 6 ایل اے 2 چکسواری دے امیدوار نے ایہناں اُتے مخالف امیدواران دی مبینہ حمایت تے ووٹ دلوان دے الزام عائد کیتے۔ جس دی رپورٹ چیئر مین پارٹی وزیراعظم عمران خان نوں وی پیش کیتی گئی۔ نومنتخب سپیکر اسمبلی چوہدری انوار الحق قریبی ذرائع دا کہنا اے کہ اوہناں نے سپیکر دا منصب ای ایس شرط اُتے قبول کیتا سی کہ بیرسٹر سلطان محمود وزیراعظم نامزد نہیں کیتے جان گے۔ چنانچہ نومنتخب سپیکر اسمبلی چوہدری انوارالحق تے سابق ممبر کشمیر کونسل بابر علی ذوالفقرنین ولوں مسلم لیگ ن دے امیدوار چوہدری طارق فاروق دی حمایت دے الزام نے ایہناں نوں وزارت عظمیٰ دے منصب توں دور کر دتا ۔ دوجے پاسے آزاد کشمیر دے انتخابات وچ وزیر امور کشمیر علی امین گنڈا پور جیہڑے الیکشن مہم دے چیئر مین وی سن۔ ایہناں دی بہترین حکمت عملی نے پی ٹی آئی وچ حکومت بنان دی راہ ہموار کیی تے ایہہ مرحلہ خوش اسلوبی نال مکمل ہو گیا۔ خیال کیتا جا رہیا اے کہ وفاقی حکومت آزاد کشمیر وچ 14 ویں ترمیم لیان دے متعلق سوچ بچار کر رہی اے۔ ویکھنے آں کہ اپوزیشن ایس ترمیم اُتے کیہ موقف اپناندی اے۔ پی ٹی آئی مسلم کانفرنس دے سربراہ سردار عتیق احمد خان تے جموں و کشمیر پیپلز پارٹی دے صدر سردار حسن ابراہیم نوں وی اپنے نال رکھے گی۔ سردار حسن ابراہیم نے اپنا ووٹ وی وزیراعظم سردار عبدالقیوم نیازی نوں دتا۔ جد کہ سردار عتیق احمد دے متعلق وی اطلاعات نیں کہ اوہناں نے وی وزیراعظم نوں مکمل تعاون دی یقین دہانی کرائی اے۔ نومنتخب وزیراعظم سردار عبدالقیوم نیازی اپنی مدر پارٹی نال مشاورت وچ نیں۔ آزاد کشمیر دے صدر سردار مسعود خان دا دور صدارت وی تکمیل دے بوہت نیڑے وے صدر آزاد کشمیر دے متعلق اطلاعات نیں کہ کجھ حلقیاں دی کوشش اے کہ پی ٹی آئی حکومت ایہناں نوں برقرار رکھے، پی ٹی آئی دے اندر کجھ حلقیاں دی سوچ اے کہ ریاست جموں کشمیر دی صدارت دا منصب بیرسٹر سلطان نوں دتا جائے جد کہ کجھ سنجیدہ حلقیاں وچ لیفٹیننٹ جنرل (ر) شیر افگن خان دا ناں وی لیا جا رہیا اے۔ پی ٹی آئی پارلیمانی پارٹی دے کجھ اراکین دی خواہش اے کہ سینئر سیاستدان خواجہ فاروق احمد نوں صدارت لئی نامزد کیتا جائے۔ ایس صورت حال وچ صدر آزاد کشمیر دا حتمی فیصلہ وی وزیراعظم پاکستان عمران خان ای نوں کرنا اے ہن ویکھنے آں کہ اوہ کنہوں ایس اہم منصب لئی اگے لیاندے نیں۔