یوم آزادی اُتے تاریخ دی وڈی شجرکاری مہم دا آغاز

وزیراعظم دے ٹریلین ٹری ویژن دے بینر ہیٹھ
’’صاف سرسبز پاکستان ‘‘ راہیں سبز انقلاب لئی امید دی کرن پھُٹدی وکھائی دین لگ پئی اے

ندیم بسرا، اظہار الحق

عالمی سطح اُتے وڈی تے مضبوط اکانومی دے حامل ایس ویلے دنیا وچ ماحول نوں انساناں لئی ساز گار بنان دے واسطے آئے دن وڈے وڈے مشاورتی اجلاس منعقد کر رہے نیں جنہاں وچ ایہناں ملکاں دے حکمران اپنے اپنے ملکاں ولوں وڈے بجٹ دے حامل منصوبیاں دے اعلان دے نال نال پچھلے مہینیاں وچ چکے جان والے اقدامات اُتے گل کردے ہوئے وکھائی دیندے نیں۔ اجلاس وچ سب توں اہم تے یک نکاتی ایجنڈا صرف اور صرف ایہہ ہوندا اے کہ ایس زمین نوں بنی نوع انسان تے چرند پرند لئی نامساعد حالات تے شدت والے ماحول توں کنج بچایا جائے۔تاں جے کر ارض اُتے انسان نوں سارے موسماں دا حامل صاف ماحول دستیاب ہو سکے۔ ایس مقصد لئی امریکہ، کینیڈا، جرمنی، برطانیہ سنے دیگر ملکاں نے خصوصی اجلاس منعقد کیتے نیں جنہاں دے خاطر خواہ نتائج وی برآمد ہوئے نیں۔ ایس ساری دوڑ وچ پاکستان نے اپنے واضح اہداف دنیا نوں دسدے ہوئے اک بڑی حیرت وچ مبتلا کرکے رکھ دتا اے۔ موجودہ حکومت صاف ماحول دے نال نال قدرتی ماحول دی فراہمی نوں انساناں دا بنیادی حق قرار دے رہی اے۔ جس لئی تاریخ دی سب توں وڈی شجر کاری مہم دا آغاز پاکستان دی آزادی دے دن نال ہو رہیا اے۔ ایس شجر کاری دی مہم وچ وزیراعظم عمران خان نے خصوصی طور اُتے اپنی توجہ مرکوز کردے ہوئے اپنے ویژن دے مطابق ٹریلین ٹری نامی مہم دے بینر تلے صاف سرسبز پاکستان، دا نعرہ بلند کیتا اے جس نال پاکستان وچ سبز انقلاب دی اک امید دی کرن پھُٹدی ہوئی وکھائی دے رہی اے۔ وزیراعظم عمران خان دے ویژن وچ اک گل بڑی کھل کے عیاں ہو چکی اے کہ پاکستان نوں ماحول دوست تے شہریاں نوں موسمیاتی شدت توں بچان لئی خاطر خواہ اقدامات کرنے نیں تے ایہناں اقدامات دی بدولت پاکستان دی کاوشاں نوں عالمی سطح اُتے سراہیا جا رہیا اے۔
دنیا وچ سبز انقلاب لئی حکومتاں اپنی وڈی رقم خرچ کر رہیاں نیں تاں اپنی پالیسیاں وچ واضح طور اُتے اقدامات نہیں چُک رہیاں تے اوتھوں کوئلہ سنے دیگر کاناں توں نکلن والی معدنیات، پہاڑاں دی غیر معتدل کٹائی، گڈیاں تے پٹرول و ڈیزل سنے دیگر مصنوعات دی صفائی دے کارخانیاں توں نکلن والی گیساں سنے کیمکلز تے کاربن دا وڈی مقدار وچ اخراج ماحول لئی قاتل ثابت ہو رہیا اے۔ جس نال دن بدن موسمی تبدیلیاں رونما ہو رہیاں نیں۔ گلیشیئرز پگل کے سمندراں وچ ڈگ رہے نیں جس نال برفانی جانوراں دیاں نسلاں دے معدوم ہون دے خدشے دے نال نال سمندراں دے پانی دی سطح وچ مسلسل کمی بیشی ہو رہی اے جس پاروں پوری دنیا دے ماحول نوں مدنظر رکھن والے سائنسدان پریشانی دا شکار ہو رہے نیں۔ ایہہ سائنسدان مختلف ملکاں دی حکومتاں نوں انتباہ وی جاری کر رہے نیں کہ جے کاربن سنے دیگر گیساں دے اخراج اُتے قابو نہیں پایا گیا تے زمین یقینا موجودہ حالات دی گرفت توں نکل کے موسمی شدت نال ٹکراندے ہوئے انسانی تاریخ دے بدترین ادوار وچ داخل ہو جائے گی جتھے موسمی شدت دا مقابلہ کرنا ناممکن ہو جائے گا۔ پچھلے کئی ہفتیاں توں جرمنی سنے دیگر ملکاں وچ آن والے سیلاب تے شدید برفباری جد کہ آسٹریلیا وچ شدید گرمی نال سڑکاں دے پگلن تے ہزاراں میل اُتے پھیلے جنگلاں وچ اگ بھڑکن، اسلام آباد وچ پچھلے دناں بدلاں دے پھٹن پاروں شدید بارش تے سیلابی کیفیت دے واقعات وی موسمیاتی حالات وچ غیر ضروری تے غیر متعدل تبدیلیاں دے نتائج دا باعث بن رہے نیں۔
موسمیاتی تبدیلیاں نے ایس کرئہ ارض نوں جھنجھوڑ کے رکھ دتا اے تے ایس دے نتیجے وچ سخت موسم، جنگلی طوفان، جنگلاں وچ لگن والی اگ، زمین اُتے پین والے وڈے وڈے شگاف، لینڈ سلائیڈنگ، زلزلے، ہیٹ ویوز، فصلاں دی گھٹ پیداوار، جانوراں دی نسلاں دی معدومیت ، قدرتی ماحول دی خرابی پاروں زہریلے پودیاں دی بہتات صرف تے صرف ایہناں غیر ضروری تے زہریلی گیساں دے اخراج پاروں ہوئی اے تے انج گرین ہائوس ایفکیٹ پاروں گلوبل وارمنگ وچ وادھا ہو رہیا اے۔
ایہناں حالات وچ وزیراعظم عمران خان نے اپنے ویژن دے مطابق پاکستان نوں بطور لیڈر پیش کیتا اے جس وچ ایہناں دی حکومت دے پچھلے تن ورھیاں وچ ریکارڈ پودے لائے گئے نیں تے ایس ورہے وی حکومت نے تاریخ دی سب توں وڈی مون سون شجر کاری مہم دا آغاز کر دتا اے۔ مہم دے آغاز دی تقریب نال خطاب کردے ہوئے وزیراعظم عمران خان نے عوام نوں کہیا کہ اوہ ملک دے جنگلات دا رقبہ ودھائے جان لئی درختاں دی شجر کاری مہم وچ بھرپور حصہ لین۔ اوہناں نے کہیا کہ ایہہ بدقسمتی اے کہ علاقائی ملکاں دے مقابلے وچ ساڈے جنگلات دا رقبہ گھٹ اے کیوں جے ماضی وچ ایس معاملے نوں نظر انداز کیتا جاندا رہیا اے۔ ایہناں دا کہنا سی کہ سانوں گلوبل وارمنگ نال لڑن تے آلودگی دے اثرات نوں ختم کرن لئی پاکستان نوں سرسبز بنانا ہوئے گا۔ وزیراعظم عمران خان کہندے نیں کہ جے اگلے تن ہفتیاں دے دوران ہر بندا گھٹ توں گھٹ اک پودا لائے تے بوہت وڈا انقلاب برپا ہو سکدا اے۔ ایہناں دا کہنا سی کہ اوہناں نے کمشنرز تے ڈپٹی کمشنرز نوں وی ہدایت کیتی اے کہ اوہ شہراں وچ خالی تھاں تے ویران تھاواں اُتے پودے لان دے عمل نوں یقینی بنان۔ اوہناں نے کہیا کہ ساڈا مقصد آن والیاں نسلاں لئی بہتر پاکستان چھڈنا اے۔ عمران خان دا کہنا سی کہ 10 ارب درختاں دے سونامی منصوبے دے نال نال خیبر پختونخواہ وچ منصوبے وچ اک ارب درخت لان دے منصوبے دی پوری دنیا وچ وسیع پیمانے اُتے تعریف کیتی گئی اے۔ اوہناں نے کہیا کہ پاکستان نوں ہن اک سر کردہ ملک دے طور اُتے تسلیم کیتا گیا اے جیہڑا کاربن دے اخراج نوں گھٹ ترین کرن لئی اقدامات کر رہیا اے۔ قبل ازیں وزیراعظم عمران خان نے اسلام آباد دے سیکٹر ایف 9 وچ فاطمہ جناح پارک وچ پودا لایا تاکہ عوام نوں درختاں دی شجر کاری مہم وچ مکمل طور اُتے حصہ لین دی ترغیب ملے۔ آئندہ کجھ ہفتیاں وچ سی ڈی اے اسلام آباد وچ 5 لکھ درخت لائے گی۔ ایہہ مہم ماحولیات دی تبدیلی دی وزارت دے زیر اہتمام 10 ارب درخت سونامی دا حصہ اے، جس وچ ملک گیر سطح اُتے سرگرمی دے نال مون سون بارشاں دے موسم وچ مکمل کیتا جا ئے گا۔ ایس حوالے نال تحریک انصاف دی نوجواناں دی ذیلی تنظیم ٹائیگر فورس دے زیر انتظام شہراں دے مختلف علاقیاں وچ پروگرامز منعقد کر کے عام شہریاں نوں پودیاں دی اہمیت تے نویں پودے لان بارے ترغیب دتی جا رہی اے۔ جس نال عام شہری وی وزیراعظم عمران خان دے ویژن نوں اگے ودھاندے ہوئے مضبوط پاکستان دا روشن چہرہ اجاگر کرن گے۔ شہریاں تے ٹائیگر فورس دے ارکان نے اپنے اپنے ناں نال منسوب پودے لا کے سماجی رابطے دی ویب سائٹس نوں خصوصی اہمیت دا حامل بنا دتا اے جس نال وڈے پیمانے اُتے شہریاں وچ اپنے اپنے ناں نال منسوب پودے لان دے جذبہ فروغ پا رہیا اے۔
حکومت نے پچھلے ورہے وی 9 اگست نوں پورے ملک وچ ٹائیگر فورس دا دن منایا جس وچ 10 بلین ٹری سونامی پروگرام دے تحت 10 لکھ توں ودھ رضا کاراں دے ناںنال پودے لائے گئے۔ منصوبے دے تحت خیبر پختونخوا وچ 20 لکھ، پنجاب وچ 11 لکھ 90 ہزار، سندھ وچ 3 لکھ، آزاد جموں و کشمیر وچ 57 ہزار، بلوچستان وچ 15 ہزار تے گلگت بلتستان وچ 11 ہزار پنج سو پودے لائے گئے۔ پورے ملک وچ اک دن وچ ریکارڈ 35 لکھ پودے لان دا ریکارڈ وی قائم کیتا گیا۔ ایسے حوالے نال بلوچستان وچ ضلعی سطح اُتے مختلف مقامات اُتے سینکڑوں پودے لائے گئے۔ مہم دے دوران ضلعی دفاتر، پکنک پوائنٹ، پبلک مقامات سنے مختلف علاقیاں وچ درخت لائے جان گے وزیراعظم عمران خان دی سرسبز پاکستان مہم وچ ہرطبقہ فکر دے لوک ودھ چڑ ھ کے حصہ لے رہے نیں ایہہ امر واقع اے کہ پاکستان دی تاریخ وچ مون سون دی سب توں وڈی شجرکاری مہم جاری اے تاکہ عوام اپنے گھراں، گوانڈھ تے گلیاں وچ پودے لان تے ایس شجر کاری مہم وچ ودھ چڑھ کے حصہ لین۔
گورنر پنجاب چودھری محمد سرور نے وزیراعظم عمران خان دے ویژن دے مطابق گورنر ہائوس لہور وچ پودا لا کے مون سون شجر کاری مہم دا آغاز کیتا تے ایس موقعے اُتے صوبائی کابینہ دے ارکان وی ایہناں دے نال سن۔ گورنر پنجاب دا کہنا سی کہ خیبر پختونخوا وچ اک بلین ٹری منصوبے نال شروع ہون والے سونامی نوں ہن 10 بلین ٹری منصوبے تیکر ودھا رہے نیں۔ اوہناں نے کہیا کہ عمران خان دے کلین اینڈ گرین پاکستان ویژن دے تحت پورے پاکستان وچ شجر کاری مہم شروع کیتی گئی اے جس دے تحت سارے محکمیاں نے اپنی اپنی استعداد دے مطابق شجر کاری کیتی اے۔ پورے ملک وچ شروع کیتی گئی ایس شجر کاری مہم دے ماحولیاتی تبدیلی اُتے بڑے چنگے تے مثبت اثرات مرتب ہو رہے نیں۔ بلین ٹری منصوبے دی وجہ نال ماحول اُتے پین والے چنگے اثرات پاروں حکومتی اقدامات نوں پوری دنیا وچ سراہیا جا رہیا اے تے اوہناں نے ایس عزم دا اظہار کیتا کہ 10 بلین ٹری منصوبے نوں ہر صورت مکمل کر کے پاکستان نوں اگے لے جان گے۔