سیاست دا بت شکن

لکھت:مظہر برلاس

عمران خان نے آزادکشمیر وچ سردار عبدالقیوم نیازی نوں وزیراعظم بنا کے ساریاں نوں حیران کر دتا اے اک فیصلے نال وڈے وڈے سیاسی بت ٹُٹ گئے ایس توں پہلاں وی ایہو کجھ گلگت بلتستان وچ ہویا پنجاب تے خیبرپختونخوا وچ وی انج ای ہویا۔ عمران خان سیاسی بتاں نوں توڑنا پسند کردا اے اوہنے پاکستان وچ مضبوط ترین سیاسی بتاں نوں توڑ کے اوہناں نوں بے بسی دی جھولی وچ پا دتا۔ اوہ کم جو پرویزمشرف پوری طاقت نال نہ کر سکیا عمران خان نے ولولے نال کر وکھایا۔ سیاست دے انفرادی بتاں نوں پنجاہ ورھے پہلے بھٹو نے عوامی طاقت نال توڑیا سی پر فیر اوہناں نے پرت کے اینی چھیتی وار کیتا کہ 77ء وچ بھٹو اوہناں دے حصار وچ سی۔ خیر ایہ پرانیاں گلاں نیں حال دی گل کرنے آں تے سب توں پہلاں کشمیر دی گل کرنے آں۔
سردار عبدالقیوم نیازی آزادکشمیر دے تیرھویں وزیراعظم دا حلف اٹھا چکے نیں۔ اوہناں دی نامزدگی توں پہلاں سرگوشیاں ہوئیاں‘ سفارشاں ہوئیاں‘ سفارشاں تے ناپسندیدگی دا اظہار کیتا گیا۔ انٹرویو ہوئے‘ ایس دوران سوشل میڈیا تے طرح طرح دے تبصرے نظر آئے۔ کسے نے لفظ عین دا تذکرہ کیتا تے کہیا کہ آزادکشمیر دے اگلے وزیراعظم دا ناں ع توں ہووے گا کیوں جے ایس توں پہلاں صدر عارف علوی‘ سندھ دے گورنر عمران اسماعیل تے پنجاب دے وزیراعلیٰ عثمان بزدار سنے وزیراعظم دا اپنا ناں وی ع توں شروع ہوندا اے۔ دوستاں دی محفل وچ گل چھڑی تے میں عرض کیتا کہ جے ایس گل نوں من وی لیا جاوے تے ایہدا جواب کون دیوے گا کہ پنجاب وچ عبدالعلیم خان‘ عثمان بزدار توں مضبوط امیدوار سن اوہناں دے ناں وچ ع دو واری آئوندا اے۔ فیر خیبرپختونخوا وچ عاطف خان نوں نظرانداز کرکے محمود خان نوں کیوں وزیراعلیٰ بنایا گیا؟ کے پی وچ شاہ فرمان نوں گورنر بنایا گیا‘ اوتھے علی محمد خان نوں وی بنایا جا کدا سی پنجاب وچ چوہدری سرور دی تھاں کسے عین والے نوں بنا دتا جاندا۔
ایہ فارمولا بلوچستان وچ وی آزمایا جا سکدا سی جے عین ایناں ای ضروری سی تے گلگت بلتستان وچ راجہ جلال نوں گورنر تے خالد رشید نوں وزیراعلیٰ بنان دی کیہ لوڑ سی؟ ایس گل بات دے اک دوست بولیا تے فیر روایات توں ہٹ کے فیصلے کیوں کیتے گئے؟ ایس سلسلے وچ عرض کیتا کہ عمران خان اقتدار نوں پسماندہ علاقیاں وچ لے جانا چاہندا اے ایسے لئی اوہ علاقیاں‘ دھڑیاں تے برادریاں دے بتاں نوں توڑ رہیا اے۔ مثلاً پنجاب دی وزارت اعلیٰ لئی وڈے شہراں توں وڈے دھڑیاں تے برادریاں توں بڑے مضبوط امیدوار سن پر عمران خان نے ساریاں نوں نظرانداز کرکے تونسہ توں عثمان بزدار نوں وزیراعلیٰ بنا دتا۔ خیبرپختونخوا دے لوک سوچ وی نہیں سن سکدے کہ کدی اوہناں دا وزیراعلیٰ سوات توں ہووے گا۔ اوتھوں دے طاقتور سیاسی لوک پشاور ویلی‘ ڈی آئی خان یاں ہزارہ توں نیں تحریک انصاف وچ طاقتور لوکاں دا تعلق وادی پشاور دے ضلعیاں یاں فیر جنوبی ضلعیاں نال اے ایس صوبے وچ وی طاقتوراں نوں نظرانداز کرکے مٹہ سوات توں محمودخان نوں وزیراعلیٰ بنا دتا گیا۔ گلگت بلتستان وچ مضبوط سیاستدان چھڈ کے خالد خورشید نوں وزیراعلیٰ بنایا گیا۔ ضلع استور توں پہلاں وزیراعلیٰ بنیا ایس توں پہلاں استور توں کدی وزیراعلیٰ نہیں سی بنیا۔ خالدخورشید دا تعلق ضلع استور دی تحصیل شونٹر توں اے انج ای آزادکشمیر وچ کیتا گیا اے۔ آزادکشمیر وچ تحریک انصاف وڈی سیاسی جماعت دے طور تے سامنے آئی تے برادریاں‘ تجربے تے دولت دی بنیاد تے اندازے لائے جان لگ پئے۔ کسے نے برادری تے سیاست دی بنیاد تے بیرسٹر سلطان محمود دا ناں لیا کسے نے دولت دی بنیاد تے سردار تنویر الیاس دا ذکر کیتا سیاسی تجربہ کار دے طور تے خواجہ فاروق دا تذکرہ ہویا۔ برادری‘ ووٹ تے فوج وچ رشتے داریاں دی وجہ نال چوہدری انوارالحق دا ناں وی لیا گیا پر وزارت عظمیٰ دا قرعہ سردار عبدالقیوم ن یازی دے ناں نکلیا۔ قیوم نیازی ضلع پونچھ دی تحصیل عباس پور دے اک پنڈ درہ شیرخان دے رہن والے نیں ایہ پنڈ کنٹرول لاین تے واقع اے سردار عبدالقیوم نیازی دا خاندان 1947ء توں پہلے مقبوضہ کشمیر وچ سی۔ایہ خاندان 1947ء توں پہلاں ای مسلم کانفرنس وچ سی ایس لئی 2019ء تک مسلم کانفرنس نال جڑیا رہیا۔ عبدالقیوم نیازی دے وڈے بھائی سردار غلام مصطفی مغل 1985ء وچ وزیرمال سن۔ اوہناں نے 1975ء وچ سنہہ وچ آٹے دی مل بنائی۔
گوجرانوالہ وچ رائس مل‘ فیر ڈیری فارم بنایا۔ ہن اوہناں دا ڈیری فارم دینہ دے کول اے۔ ایہ آزادکشمیر دے لوکاں نوں سستے جانور تے ددھ دیندے نیں۔ آزادکشمیر دے نویں وزیراعظم ماضی وچ سردار عتیق احمد خان دی کابینہ وچ وزیرخوراک سن۔ وزیراعظم عمران خان نوں انٹرویو دوران سردار عبدالقیوم خان نیازی نے دس دتا سی کہ میں عباس پور توں مغل سردار آں۔ میرا تعلق مغلاں دے قبیلے دلی نال اے نیازی میرا تخلص اے میٹرک دا خلہ گھلن ویلے دو منڈیاں دے ناں عبدالقیوم سن‘ میں تخلص دے طور تے ناں دے نال نیازی لکھ دتا۔ عباس پور تے دلی مغلاں دے حوالے نال دسدا جاواں کہ عباس پور دا ناں گوپال پور سی۔ رئیس الاحرار مسلم کانفرنس دے صدر چوہدری غلام عباس دے ناں تے ایہنوں بدلیا گیا۔ ہن ایہ عباس پور ای مشہور اے۔ آزادکشمیر اسمبلی وچ ہمیشہ توں ای مغلاں دیاں چار پنج سیٹاں رہیاں نیں کیوں جے ایتھے مغلاں دے کئی قبیلے آباد نیں۔ مقبوضہ کشمیر وچ وی سری نگر دی ڈل جھیل دے کول نشاط تے شالیمار باغ مغلاں دیاں نشانیاں نیں۔ رہے دلی مغل تے تہانوں پتہ ہونا چاہیدا اے کہ قومی اسمبلی دے سپیکر سردار ایاز صادق دا تعلق وی ایسے قبیلے نال اے۔
آزادکشمیر دے نویں وزیراعظم بڑے محنتی‘ ملنسار تے خدمت گار سیاستدان نیں۔ نماز وزے دے پابند نیں ایہناں دی شرافت پورے علاقے وچ مشہور اے ایہناں دے بیٹے سردار ضرار قیوم سنٹرل لندن توں لیبر پارٹی دے کونسلر نیں ایہ خاندان گھٹو گھٹ 80 ورھیاں توں سیاست کر رہیا اے کہ بقول میرانیس
عمر گزری ہے اس دشت کی سیاحی میں
(بشکریہ روزنامہ جنگ)