عوامی ریلیف دا ناں ‘میاں نوازشریف!

حناپرویزبٹ

سمجھ چوں باہر اے کہ قبضہ گروپ دے کس شعبے دی کارکردگی تے لکھاں تے کس موضوع نوں چھڈ دیواں۔ مجال اے پاکستان دے کسے شعبے وچ وی روشنی دی کوئی اک کرن وی اوہناں نے باقی رہن دتی ہووے۔ حکومت تے ایہنوں بالکل وی نہیں کہہ سکدے پر اک جز وقتی بندوبستی ٹولے نوں ٹھیکے تے ایناں وڈا ملک دے دتا گیا اے دعویٰ کیتا گیا سی کہ 22 ورھے دی جدوجہد دے بعد اقتدار وچ آئے پر اک وی بندہ اجیہا نہیں جو اوہناں دے نال 22 ورھیاں توں جڑیا ہویا اے سگوں اوہناں نے چن چن کے سارے پرانے رہنماواں تے کارکناں نوں کندھ نال لایا تے بے ضابطیاں تے اعتراض کرن والیاں نوں پارٹی چوں کڈھ دتا۔ شعبہ کوئی وی ویکھ لوو ایس ٹولے دی کارکردگی اینی مایوس کن اے کہ دماغ سن ہو جاندا اے۔ عجیب کثیررنگی طبیعت پائی اے کہ پہلے مرحلے وچ معاشی ٹیم دے کھڈاری چن دے رہے نیں فیر اوہناں دی مدح سرائی کردے رہے تے فیر کجھ عرصہ بعد اوہنوں نکام کہہ کے بدترین نتیجے دا سارا ملبہ اوہدے تے پا کے اوہنوں ایناں زچ کردے نیں کہ اوہ آپ ای مستعفی ہو کے اوہناں نوں چھڈ جاندا اے حالاں کہ اوہ اوہناں دی منظور شدہ‘ ن کام تے کنفیوژ پالیسیاں تے صرف ربڑ سٹمپ دا کم ای کردا اے۔ ایس ٹولے دی نام نہاد ماہر ترین معاشی ٹیم اک اک کرکے تتر بتر ہوندی جا رہی اے۔ ادھی توں ودھ ٹرم پوری ہو چکی اے تے معاشی ٹیم دا آخری سنجیدہ دماغ یعنی مشیر وزیراعظم ڈاکٹر عشرت حسین نے استعفیٰ دے دتا اے ایہناں موصوف نوں وزیراعظم دا مشیر برائے ادارہ جاتی اصلاحات مقرر کیتا گیا سی ایہناں دے نال وی اوہو ہویا جو پہلیاں نال کیتا گیا۔ پہلے ایہناں دی خدمات تے تجربے دیاں تعریفاں کردے نہیں سن تھکدے فیر جدوں دل بھر گیا تے اوہناں نوں اپنی کارکردگی بہتر بنان دا پیغام یعنی ہلکاپھلکا شوکاز نوٹس گھل دتا گیا جہدے تے ڈاڈھا ردعمل ظاہر کردے ہوئے ڈاکٹر عشرت حسین نے استعفیٰ گھل دتا۔ بندہ پچھے 80 سالہ انجن وچ ہارس تے ہوندا ای نہیں تے پاور دی گنجائش دا تے سوال ای پیدا نہیں ہوندا اوہناں نوں تے صرف خانہ پری لئی رکھیا گیا سی جدوں دل بھر گیا تے مکھی وانگوں کڈھ باہر کرن دی پرانی ترکیب ورت لئی۔ ایف بی آر والا روشن دماغ تے کدوں دا بیماری دا بہانہ بنا کے نس گیا۔ امید کامل اے کہ چھیتی ای وزارت خزانہ مکمل طور تے مبینہ عالی دماغاں توں خالم خالی ہو جاوے گی۔ فیر شاید وزارت خزانہ وی اوہنوں آپ سانبھنی پے جاوے جو دن رات ملک ملک‘ قریہ قریہ اک ای راگ الاپدا اے کہ فلاں شعبے نوں توں میرے توں ودھ کوئی جان دا ای نہیں۔ اک پیچ ڈاکٹرائن نے اینی سیاسی گرانی پیدا کر دتی اے کہ بے یقینی دے بادل چھیتی چھٹدے وکھائی نہیں دے رہے کہن نوں تے کنٹینر تے کھڑے ہو کے صبح شام نوازشریف نوں امیرالمومنین دے طعنے دین والا حقیقی طور تے بادشاہ بن چکیا اے میں دعا کرنی آں کہ ایہ اپنی ٹرم پوری کرے تاں جے ایہدے بارے تے ایہدے ہمراہیاں بارے لوک تے دوجے حلقیاں دی ہر قسم دی غلط فہمی دور ہو جاوے۔
ایل این جی دے ٹھیکے وچ کمیشن تے ودھ قیمت دا الزام لان والے دا جھوٹھ کھل چکیا اے کہ چور شاہد خاقان عباسی نے سستی ترین ایل این جی جد کہ موجودہ صادق امین نے مہنگی ترین ایل این جی دا ٹھیکہ لے کے قومی خزانے نوں بڑا بھاری نقصان اپڑایا اے پر اک پیچ فلاسفی دے تخلیق کاراں نوں چپ لگی ہوئی اے۔ آزادکشمیر تے سیالکوٹ وچ اک واری فیر فارمولا ورتیا گیا حمایتیاں دے راہیں سوشل تے مین اسٹریم میڈیا تے خوب رولا پایا گیا کہ نوازشریف دا بیانیہ نکام ہو گیا اے سرکاری بھونپو تے بھنڈاں دے راہیں شکست دی ساری ذمہ داری مریم نوازتے پان دی کوشش جاری اے تے کھلم کھلا کہیا جا رہیا اے کہ جے اوہ انج نہ کردیاں تے انج ہو جانا سی انج کیہ ساریاں نوں پتہ اے کہ میاں نوازشریف دا بیانیہ کیہ اے؟ معلومات دی درستگی لئی اک واری فیر دہرا دینی آں کہ میاں نوازشریف دا بیانیہ ایہہ وے کہ سارے اپنے اپنے حلف دی پاسداری کرن۔ سارے اپنی اپنی حدود وچ رہندے ہوئے اختیارات استعمال کرن جے ایہ غلط اے تے میں ایس غلط دے نال کھڑی آں۔ جہڑے لوکاں نے آزادکشمیر وچ اینی وڈی گنتی وچ میاں نوازشریف نوں ووٹ دتے نیں تے ایہ میاں نوازشریف دے بیانیے دی جت اے۔ یاد رہوے ہن میاں نوازشریف صرف اک سیاستدان دا ناں نہیںرہیا۔ میاں نوازشریف اک اجہے رہنما بن چکے نیں جو ایس ملک دے تاجراں‘ معیشت داناں‘ پالیسی سازاں لئی اعتماد دا ناں اے۔ میاں نوازشریف لوکاں لئی ریلیف دا ناں اے میاں نوازشریف نے لوکاں نال کیتے وعدے پورے کرن دی پوری کوشش کیتی سب توں وڈی گل میاں نوازشریف اوس خاندانی شخص دا ناں اے جنہے اپنیڈکشنری چوں لفظ کم ظرف ہمیشہ لئی مٹا دتا اے۔٭٭