ٹی 20 توں بعد ویسٹ انڈیز خلاف ٹیسٹ سیریز اج توں شروع

محمد علی

پاکستان نے ویسٹ انڈیز دے خلاف 4 میچاں دی ٹی 20 سیریز 1-0 توں جت لئی۔ سیریز دے 3 میچ بارش دی نذر ہوئے تے صرف 1 میچ ای مکمل ہو سکیا ۔ پاکستانی ٹیم نے ہن ویسٹ انڈیز دے خلاف ٹیسٹ سیریز اج توں شروع ہو رہی اے۔ سکواڈ دی گیانا وچ بیٹنگ، بولنگ تے فیلڈنگ دیاں مشقاں جاری نیں۔ گیانا وچ کھیڈے جا رہے ٹی 20 سیریز دے آخری میچ وچ قومی ٹیم دے کپتان بابر اعظم نے ٹاس جت کے میزبان ٹیم نوں بیٹنگ دی دعوت دتی سی۔ ویسٹ انڈیز ولوں کریس گیل تے آندرے فلیچر نے بغیر کسے نقصان دے میچ روکے جان توں پہلاں مجموعی طور اُتے 3 اووراں وچ 30 سکور بنائے۔ایس دوران کرس گیل نے 6 گینداں اُتے 12 سکور جد کہ آندرے نے 12 گینداں اُتے 17 سکور بنائے۔ابتدائی اووراں وچ پاکستان ولوں محمد حفیظ، حسن علی تے محمد وسیم نے بائولنگ کروائی تاں حریف ٹیم دا کوئی کھلاڑی آئوٹ نہ ہو سکیا۔ میچ دے آغاز اُتے قومی ٹیم دے کپتان بابر اعظم نے کہیا سی کہ ایس میچ وچ ساڈے اُتے کوئی دبا نہیں تے موسم پاروں پہلے فیڈنگ کرنا زیادہ بہتر اے تے اسیں میچ جتن لئی چنگا کھیڈن دی کوشش کراں گے۔دونواں ٹیماں دے وچکار سیریز دا پہلا میچ وی بارش دی نذر ہو گیا سی تے بغیر کسے نتیجے دے ختم ہو گیا سی۔ پاکستان نے دوجے میچ وچ 7 سکور توں کامیابی حاصل کر کے سیریز وچ 1-0 دی برتری حاصل کر لئی سی ۔ پاکستان نے تیجے میچ لئی ٹیم وچ اک تبدیلی کردے ہوئے فاسٹ بائولر شاہین آفریدی دی تھاں حارث رئوف تے ویسٹ انڈیز نے آندرے رسل نوں موقع دتا سی تاں بارش دی وجہ نال میچ بے نتیجہ ختم ہویا سی۔ بابر اعظم نے ٹی 20 سیریز وچ تجربات دا موقع ہتھ توں نکل جان اُتے مایوسی دا اظہار کیتا۔ کپتان نے کہیا کہ ویسٹ انڈیز دے خلاف سیریز وچ چنگی کرکٹ نال اسیں اپنے اعتماد وچ وادھا کرنا چاہندے سی، ایہہ پلان وی سی کہ مختلف کمبی نیشن ازماندے ہوئے ورلڈ کپ دی تیاریاں نوں حتمی شکل دیاں گے۔ ساڈی سوچ سی کہ ایتھے کیتے جان والے تجربیاں توں آئندہ دے پلان بنان وچ مدد ملے گی۔ بیٹنگ آرڈر وچ وی کھلاڑیاں نوں آزماواں گے پر بدقسمتی نال اینا موقع ای نہیں مل سکیا۔ اوہناں نے کہیا کہ پچھلے ٹور وچ پاکستان نے کیریبئنز نوں شکست دتی سی، ایس وار وی سیریز دی جت خوش آئند اے اسیں اپنی کارکردگی دے بل بوتے ایس توں بہتر نتائج دے خواہاں سی، موسم دی مداخلت نہ ہوندی تے مضبوط میزبان ٹیم دے خلاف زیادہ صلاحیتاں دے اظہار دا موقع ملدا پر بارش تے ایس جہے دیگر عوامل کسے دے کنٹرول وچ نہیں ہوندے۔ کپتان نے کہیا کہ کھلاڑیاں نے اپنی فارم تے فٹنس اُتے کم کیتا اے۔ کرونا دی وجہ نال پیدا ہون والی مشکلاں وچ لمبے عرصے تیکر فیملیز توں دور رہندے ہوئے بائیو بیل دی سختیاں جھیلنا کسے لئی وی آسان نہیں ہوندا۔ ایس دے باوجود کھلاڑیاں دا ذہنی تے جسمانی طور اُتے مستعد رہنا خوش آئند اے۔ ایس دا کریڈٹ خود پلیئراں تے مینجمنٹ سب نوں جاندا اے۔ بابر اعظم نے کہیا کہ ٹی ٹوئنٹی سیریز وچ کامیابی دے بعد ہن اکھاں ٹیسٹ میچاں اُتے مرکوز ہون گیاں جس جوش تے جذبے دے نال اسیں وائٹ بال کرکٹ لئی میدان وچ اترے اوہ ای لمبی فارمیٹ دے مقابلیاں وچ برقرار رکھاں گے ۔تربیتی کیمپ وچ جیہڑی محنت کیتی اوہ رنگ لیائے گی ایہناں دا کہنا سی کہ ٹیسٹ سیریز توں پہلاں کراچی دا کیمپ سود مند رہیا کوچنگ سٹاف دی وجہ نال بوہت کجھ سکھیا۔امید اے کہ ٹریننگ کیمپ وچ جیہڑی محنت کیتی اوہ رنگ وکھائے گی۔ عابد علی دا کہنا سی کہ بوہت چنگا کیمپ رہیا بوہت کجھ سکھن نوں ملیا، بیٹنگ کوچ محمد یوسف نے بوہت چنگے مشورے دتے۔ فاسٹ بائولر شاہنواز دھانی نے کہیا کہ کیمپ وچ چنگی ٹریننگ ہوئی۔ گرمی زیادہ سی انج دی ای کنڈیشنز ویسٹ انڈیز وچ وی ہوئے گی۔ ویسٹ انڈیز دے خلاف ٹی 20 سیریز دا حصہ عماد وسیم، محمد حفیظ، شاداب خان تے شرجیل خان، عثمان قادر، محمد حسنین، محمد وسیم جونیئر تے ارشد اقبال، فخر زمان، اعظم خان تے صہیب مقصود سیریز مکمل ہون اُتے وطن واپس آئے ۔