بے بے جیراں

لکھت: ابرار ندیم

اللہ جانے ایہدے وچ کنی سچائی پر ایہ گل پنڈاں وچ عام اے کہ بے بے جیراں اپنی حیاتی وچ اک واری فوت ہو چکی اے۔ دروغ برگردن راوی سنیا اے مرن دے بعد بے بے جیراں بالکل اوس ویلے اٹھ کے بہہ گئی جدوں رات دے ویلے بتیاں دے چانن وچ اوہنوں قبر وچ لاہن لئی اوہدے کفن تے آخری واری کافور چھڑکیا جا رہیا سی۔ کہیا جاندا اے کہ ایہ منظر ویکھ کے بے بے جیراں دی ناگہانی موت تے ڈھائیں مار مار کے روندے ہوئے اوہدے سر دے سائیں بابے جورے تے مولوی صاحب سنے اوتھے موجود سارے لوکاں دیاں دوڑاں لگ گئیاں سن۔ جہدے بعد رات دے ڈرائونے انھیرے وچ اکلی بے بے جیراں اپنے نک تے کناں وچ پھسی ہوئی روئی دے پھائے کڈھ کے بابے جورے تے لوکاں نوں برا بھلا کہندی کفن سنے پنڈ دیاں گلیاں چوں گزردی ہوئی اپنے گھر اپڑ گئی۔ ایہدے تے ایس اچانک خوشی نال گھر وچ موجود دوجے بندیاں تے کیہ گزری ایہدے حوالے نال کوئی مستند روایت موجود نہیں ایس لئی کہ اوس ویلے اوتھے موجود موقع دے سارے گواہ اک اک کر کے عرصہ ہویا دنیا توں رخصت ہو چکے نیں۔ ایہدے بعد بے بے جیراں تے جیویں مرنا ای بھل گئی ہووے سٹھ توں ستر اسی‘ نوے تے فیر پتہ نہیں کدوں دی اپنی عمر دی شاندار سنچری مکمل کرکے بے بے اجے تک نہ صرف ناٹ آئوٹ اے سگوں دھواں دار انداز وچ زندگی دی وکٹ تے اپنی عمر دی اننگ کھیڈ رہی اے۔
دوستو! اکثر چنگے چنگے کرکٹر وی اپنی سنچری دے نیڑے جا کے نروس نائن ٹیز دا شکار ہو جاندے نیں پر مجال اے جو بے بے جیراں نے ایس مرحلے تے وی کوئی دبائو لیا ہووے۔ کہن والے تے ایتھوں تک کہندے نیں کہ ہر ذی روح نوں اک واری موت دا ذائقہ لازمی چکھنا ہوندا اے تے کیوں جے بے بے جیراں نے فوت ہو کے اپنے حصے دی موت دا ذائقہ چکھ لیا اے ایس لئی ہن موت دا فرشتہ بے بے جیراں دی روح قبض دے حوالے نال شاید کسے الجھن دا شکار ہو گیا اے جہدابے بے نجائز فائدہ چک کے ہن فوت ای نہیں ہو رہی۔ بے بے جیراں دی عمر دے حوالے نال پنڈ وچ متضاد روایات موجود نیں ایس لئی کہ جس زمانے وچ بے بے جیراں پیدا ہوئی اوہناں وقتاں وچ پنڈاں وچ بندیاں دی پیدائش دے اندراج نہیں سن ہوندے۔ ایس سلسلے وچ جے بے بے جیراں توں پچھیے تے اپنے بزرگاں دی دسی گئی جانکاری دے مطابق اوہنوں صرف ایناں یاد اے کہ اوس ورھے آندھی‘ جھکھڑ‘ مینہہ تے بہت وڈا طوفان آیا سی۔ ہن ایہ نہیں پتہ کہ ایہ آندھی‘ جھکھڑ‘ مینہ یاں طوفان بے بے جیراں دی پیدائش دا نتیجہ سی یاں بے بے جیراں دی پیدائش اوس آندھی‘ مینہہ‘ جھکھڑ تے طوفان دا نتیجہ سی۔ بہرحال وجہ جو وی سی اوہ ایہناں دو وجوہات وچوں اک سی جہدے شدید اثرات اج وی اوہدے کڑک تے رعب دار مزاج وچ ویکھے جا سکدے نیں۔ بے بے جیراں اک بھرے پرے گھر دی سربراہ اے جہدے وچ اوہدی بہو دی بہو‘ پوتے‘ پوتیاں تے پڑپوتے‘ پڑپوتیاں وی شامل نیں پر مجال اے جو ایہناں وچوں کوئی اوہدے سامنے تھوڑا جیہا وی کسک سکے۔ عام معنیاں وچ بے بے جیراں نہ تے کوئی سیاستدان اے تے نہ ای اوہدا کسے قسم دی سیاست نال کوئی تعلق اے پر اوہ بڑی کھوچل تے پوری سیاستدان اے اوہ ایس طرح کہ ایس عمر وچ وی روپیے پیسے سنے گھر دے سارے اندرونی تے بیرونی معاملیاں تے اوہدا مکمل کنٹرول اے۔
بے بے جیراں دے بے جا دبائو تے ناروا پابندیاں توں تنگ اوہناں دیاں کجھ نونہواں دا آف دی ریکارڈ ایہ کہنا اے کہ بے بے جیراں دا جسم تے اک عورت دا اے پر اوہدے اندر روح ہٹلر دی اے۔ گلی محلے تے گھر دے نکے نکے بچیاں وچ تے ایتھوں تک مشہور اے کہ جس طرح کوئی اچھا دھاری ناگ یاں ناگن سو ورھے عمر پوری ہون تے اپنی مرضی نال انسان دا روپ دھار سکدے نیں اوسے طرح بے بے جیراں نے وی جدوں تک اپنی عمر دے سو ورھے مکمل کیتے نیں اودوں توں اوہ رات نوں سون توں پہلاں روز اچھا دھاری ناگن دا روپ دھار لیندی اے بچیاں دی ایس سوچ تے خیالات دا بے بے جیراں نوں وی چنگی طرح پتہ اے پر اوہ ایس الزام نوں اپنے خلاف اپنیاں نونہاں دا گھراہ کن پراپیگنڈا قرار دے کے اُکا ای رد کر دیندی اے۔
ایس واری عید تے میرا پنڈ جان ہویا تے اک عرصے بعد میری بے بے جیراں نال وی ملاقات ہو گئی۔ میں اگے ودھ کے بڑے ادب نال اوہنوں سلام کیتا جہدے جواب وچ بے بے جیراں نے وعلیکم سلام کہہ کے میرے سر تے پیار نال ہتھ پھیردے ہوئے کہیا پتر! میں سنیا اے توں شہر جا کے کسے اخبار وچ بھرتی ہو گیا ایں۔ میں کہیا بے بے اخبار وچ بھرتی نہیں ہویا بس کالم لکھنا واں۔ کہن لگی اوہ کیہ ہوندا اے۔ میں بے بے نوں سوکھے لفظاں وچ گل سمجھان لئی دسیا بے بے میں اخبار وچ حکومت نوں مشورے دینا واں۔ ایہ سن کے اوہ حیرانی نال پچھن لگی ہائے ہائے! کیہ توں ایناں سیانا ہو گیا ایں ایہ دس کیہ حکومت والے تیرے مشوریاں نوں من وی لیندے نیں۔ میں شرارت دے موڈ وچ گل ختم کرن لئی کہیا بے بے منن گے کیوں نہیں آخر اوہناں نے حکومت وی تے چلانی اے تے جتھوں تک سیانے ہون دا تعلق اے تے حکومتاں نوں مشورے دین لئی ضروری نہیں کہ بندہ سیانا وی ہووے۔ ایہ سن کے بے بے کہن لگی پتر! فیر تے ایہ بڑا سوکھا کم اے میں کہیا بے بے ایہ بالکل وی سوکھا کم نہیں ایہدے لئی بندے نوں اپنا ضمیر مار کے غلط نوں ٹھیک تے ٹھیک نوں غلط کہنا پیندا اے یعنی حکومت دا موڈ ویکھ کے اوہنوں اوہدی مرضی دا مشورہ دین دا ہنر آنا ضروری اے تے کسے وی باضمیر بندے لئی ایہ بڑا اوکھا کم اے ایسے لئی تے حکومتاں ایس مشکل کم لئی چن چن کے قابل تے ذہین لوکاں دا انتخاب کردیاں نیں۔٭٭