ایران اسرائیل کشیدگی، عالمی امن خطے وچ پا سکدی اے

امریکہ تے برطانیہ واقعات دی آڑ وچ ایران نوں دبائو وچ رکھنا چاہندے نیں،
اختلافات انقلاب ایران دے بعد توں چل رہے نیں

ابو محمد حارث شاہ

اسرائیل نے عمان دے ساحل وچ تیل لے جان والے بحری جہاز اُتے حملے دے بعد ایران اُتے حملے دی دھمکی دے دتی۔ غیر ملکی میڈیا دے مطابق اسرائیلی وزیر دفاع بینی گینٹز نے ایران نوں خبردار کیتا کہ اسرائیل ایران اُتے حملے لئی تیار اے۔
اسرائیل وزیر دفاع ولوں ایہہ بیان عمان دے ساحل وچ اسرائیلی آئل ٹینکر اُتے ہون والے ڈرون حملے دے بعد ساہمنے آیا اے جس دے نتیجے وچ اک برطانوی تے اک رومانیہ دا شہری ہلاک ہویا۔ امریکا تے برطانیہ نے بحری جہاز اُتے حملے دا الزام ایران اُتے عائد کر دتا امریکا تے برطانیہ پہلے ای ایس حملے دا الزام ایران اُتے لا چکے نیں تاں ایران ولوں ایس دی سختی نال تردید کیتی گئی اے۔ میڈیا رپورٹ دے مطابق اک انٹرویو وچ اسرائیلی وزیر دفاع توں سوال کیتا گیا کہ آئل ٹینکر اُتے حملے دے بعد کیہ اسرائیل ایران اُتے حملے لئی تیار اے؟ ایس اُتے اسرائیل وزیر دفاع نے ہاں وچ جواب دتا۔
ایران دا رد عمل
دوجے پاسے ایرانی وزارت خارجہ دے ترجمان نے اسرائیلی وزیر دفاع دی دھمکی نوں بین الاقوامی قوانین دی کھلی خلاف ورزی قرار دتا اے۔ ٹوئٹر اُتے جاری بیان وچ ایرانی وزارت خارجہ دے ترجمان سعید خطیب زادی نے کہیا کہ اسرائیل دی دھمکی انتہائی بدتر رویہ اے جنہوں مغرب دی انھی حمایت حاصل اے۔ ترجمان نے اسرائیل نوں وی خبردار کیتا کہ اسیں واضح طور اُتے کہنے آں کہ ایران دے خلاف کوئی وی احمقانہ کارروائی دا بھرپور جواب دتا جائے گا۔ ترجمان دا کہنا سی کہ سانوں نہ آزمائو۔
ایس واقعے دی تفصیل
عمان دے ساحل توں کجھ فاصلے اُتے جمعرات 29 جولائی نوں ڈرون دا نشانہ بنن والا آئل ٹینکر جاپان دی ملکیت دسیا جاندا اے۔ ایس واقعے دی تفصیل دنیا دے سارے اخباراں وچ شائع ہوئی اے۔ تفصیل دے مطابق درمیانے سائز دا آئل ٹینکر ایم وی مرسر ٹریٹ کارگو دے بغیر تنزانیہ وچ دارالسلام توں متحدہ عرب امارات دی بندرگاہ فجیرہ جا رہیا سی۔ بین الاقوامی میڈیا دے مطابق ایس جہاز اُتے لائبیریا دا جھنڈا اے تے ایہہ ٹینکر اگرچے اک جاپانی کمپنی دی ملکیت اے پر ایہنوں زوڈینک میری ٹائم نامی اسرائیلی کمپنی چلاندی اے۔
ایہہ ٹینکر جس ویلے اومان دے ساحل دے نیڑے توں لنگھ رہیا سی ایس توں دھماکہ خیز مواد نال لدیا اک ڈرون ٹکرایا جیہڑا ایس دے برج دے نیڑے پھٹیا۔ ایس نال جہاز دے رہائشی کمریاں نوں نقصان اپڑیا۔ اک رومانیہ برطانیہ نال تعلق رکھن والے سکیورٹی گارڈ ایس حملے وچ ہلاک ہو گئے سن۔ ایس حملے دے فوراً بعد امریکی بحریہ دے دو جنگی جہاز ایس دی مدد نوں اپڑ گئے تے ایس بحری جہاز نوںبندرگاہ تیکر لے گئے۔ یاد رہوے اسرائیل نال تعلق رکھن والے کئی جہازاں اُتے حملے ہوئے جنہاں دا الزام ایران اُتے لایا گیا جد کہ ایران ایہناں سارے الزامات توں انکار کردا چلا گیا اے دونواں ملکاں دے وچکار کشیدگی چلی آ رہی اے۔ اسرائیل اُتے ایران ولوں وی الزام لایا جا رہیا اے کہ اوہ اپریل وچ بحریہ احمر وچ اک ایرانی فوجی رسد دے بحری جہاز دے ہل دے نیڑے پر اسرار دھماکے دے پچھے اے۔ ایہہ سب ایران تے اسرائیل دے وچکار جاری سرد جنگ دا حصہ اے۔ ایہہ اک انج دا خطرناک کھیڈ کھیڈیا جا رہیا اے جس دے تحت اک وجے دے اہم بندیاں نوں قتل کرن دی کوشش کیتی جا رہی اے۔ ایرانی سائنسدان ہون یا ایرانی فوجی جرنیل ایہناں سب دے قتل کرن دے پچھے اسرائیل دا ہتھ دسیا جا رہیا اے۔
کیہ ایہہ ایران دی غلطی سی؟
ایہہ بوہت اہم سوال اے کہ کیہ ایہہ راکٹ ایران وچ جان بجھ کے فائر کیتا یا غلط معلومات دی بنیاد اُتے ایہہ حملہ کیتا گیا۔ ایران ولوں مسلسل کیتی جان والی تردید دے بعد تے ایہہ کہیا جا سکدا اے کہ ایہہ حملہ غلطی دی بنیاد اُتے ہویا پر ایس غلطی نوں نہ تے ایران تسلیم کرن لئی تیار اے تے نہ ای بین الاقوامی برادری ایہہ گل منن اُتے آمادہ نظر آندی اے۔ امریکہ پوری دنیا نوں ایہہ گل باور کروان اُتے کامیاب ہو چکیا اے ایس جہاز اُتے حملہ ایران نے کیتا تے جان بوجھ کے کیتا۔ ایس وچ برطانوی شہری دی ہلاکت نے ایس دی سنگینی نوں دو چند کر دتا ایہو وجہ اے کہ ایران دے خلاف امریکہ برطانیہ تے اسرائیل نے مشترکہ رد عمل دتا اے جے برطانیہ، اسرائیل تے امریکہ دے دعویاں نوں ٹھیک تسلیم کر لیا جائے کہ ایران نے اسرائیلی جہاز اُتے نہ صرف حملہ کروایا اے بلکہ حملے دی سازش کیتی اے تے ایہہ ایرانی انٹیلی جنس دی اک فاش غلطی سی۔ ایس دا جھکڑا بنیادی طور اُتے اسرائیل دے نال اے چنانچہ اک برطانوی شہری نوں ہلاک کر کے اقوام متحدہ دی سلامتی کونسل دے اک مستقل رکن نوں ایس معاملے وچ کھچ لیان نال سفارتی طور اُتے مسئلے پیدا ہوئے نیں۔ بورس جانسن نے کہیا اے کہ ایران نوں اپنے اقدامات دے نتائج دا ساہمنا کرنا ہوئے گا۔
اوہناں نے ایہنوں، تجارتی جہاز رانی اُتے ناقابل قبول تے اشتعال انگیز حملہ، قرار دتا ۔ اطلاعات دے مطابق برطانیہ وچ ایران دے سفیر محسن بہروند نوں دفتر خارجہ طلب کیتا گیا تے ایہناں نوں کہیا گیا کہ ایہناں دے ملک نوں بین الاقوامی جہاز رانی نوں خطے وچ پان والے اقدامات فوری طور اُتے روکنے ہون گے۔ ایران نے ایس الزام دی پرزور تردید کیتی اے تے حملے وچ اپنے ملوث ہون دے ثبوت وکھان دا مطالبہ کیتا اے۔
دوجے پاسے اسرائیل نے ایران نوں دھمکی دتی کہ ایران نوں انج دا پیغام گھلے گا جیہڑا ایہنوں سمجھ آئے گا، تے ایہہ برطانیہ تے امریکہ دی دھمکی دے مقابلے وچ زیادہ خطرناک ثابت ہو سکدا اے۔
مذکورہ تنے ملک ایس حملے دی آڑ وچ اپنے اپنے مقصد حاصل کرنا چاہندے نیں۔ ایہناں تناں ملکاں نے رد عمل دی دھمکی وی دتی اے۔پر جتھے عوامی طور اُتے ایہناں دا مشترکہ موقف اے، اوتھے ایہناں دے مختلف مقاصد نیں۔ برطانیہ تے امریکہ ایران دے نال 2015 دے جوہری معاہدے دی اپنی مرضی دی بحالی چاہندے نیں۔ ایس معاہدے دے تحت ایران دے سول جوہری پروگرام اُتے سخت حدود و قیود نافذ کر کے ایس اُتے کجھ اقتصادی پابندیاں ہٹا دتیاں گئیاں سن پر ایہہ جوہری معاہدہ ہن امریکی صدر ڈونلڈ ٹرمپ ولوں امریکہ نوں 2018 وچ یکطرفہ طور اُتے ایس معاہد ے توں کڈ لین دی وجہ نال موثر نہیں۔ ایس حوالے نال ویانا گفت و شنید جاری اے پر اسرائیل ایس جوہری معاہدے نوں پسند نہیں کردا۔ اوہ ایہنوں ایران دی مبینہ جوہری تحقیق لئی اک پردہ تصور کردا اے۔
اسرائیل دی جٹیلی جنس سروس، موساد ایران دی سکیورٹی اسٹیبلشمنٹ دی معلومات چران تے ایہناں دے حصول وچ حیران کن حد تیکر کامیاب رہی اے۔اسرائیل دے الزام دے جواب وچ ایران دا کہنا اے: جے تہاڈے کول ساڈے ملوث ہون دے ثبوت موجود نیں تے آئو، ویکھدے او، پر جیہڑا وی خفیہ معلومات اکٹھی کیتی گئی اے ایس وچ یقینی طور اُتے خفیہ ذرائع تے ممکنہ طور اُتے کمیونیکشن دی ریکارڈنگ ہو سکدی اے جس دے متعلق امریکی تے برطانوی جاسوس نہیں چاہن گے کہ ایہناں نوں ایران دے علم وچ لیایا جائے۔ مذکورہ معلومات جنہاں وچ ایران ولوں اشارہ کیتا گیا اے جے اوہ ساہمنے نہیں آندیاں تے ایس دا مطلب ایہہ ہوئے گا کہ ایہہ سب ایران نوں اک ناکردہ جرم دی سزا دین لئی گھڑیا گیا بہانہ اے۔ اسرائیل تے ایران دیوچکار آئل ٹینکر اُتے حملے دے بعد دونویں طاقتور حریف ملکاں دے وچکار جنگ دا خطرہ پیدا ہو گیا اے ایس ویلے جو کجھ ہو رہیا اے ایس دا اک خاص پس منظر اے۔
ایران تے اسرائیل دشمن کیوں نیں؟
ایران تے اسرائیل دے وچکار کشیدگی اج دی گل نہیں بلکہ ایس دی اپنی وکھری تاریخ اے انقلاب ایران توں پہلے تعلقات دی نوعیت ایہہ نہیں سی بلکہ شاہ ایران تے امریکہ دے مقربین خاص وچ شمار ہوندے سن۔ تاں 1979 وچ امام خمینی دی قیادت وچ ایرانی انقلاب دے بعد توں برسر اقتدار ایرانی قیادت اسرائیل دے خاتمے دا مطالبہ کر رہی اے۔ ایران اسرائیل دے وجود نوں مسترد کردا اے تے ایہنوں مسلماناں دی زمین دا غیر قانونی قابض سمجھدا اے۔ ایس دے جواب وچ اسرائیل ایران نوں اپنے لئی خطرہ سمجھدا اے تے ایس نے ہمیشہ کہیا اے کہ ایران نوں جوہری ہتھیار نہیں بنان دیاں گے۔ اسرائیل رہنما مشرق وسطیی وچ ایران دے ودھدے اثر و رسوخ توں خوفزدہ نیں۔ اسرائیل نوں اک ڈر ایہہ وی اے کہ ایران خفیہ طور اُتے لبنان وچ جیہڑا کہ اسرائیل دا گوانڈھی ملک اے ایس دے جنگجوائواں نوں ہتھیار دے رہیا اے۔