کشمیر دا فیصلہ جلدی ہوئے گا

رابعہ رحمٰن

وزیراعظم پاکستان عمران خان دے دور حکومت وچ ایہناں دی بہترین حکمت عملی پاروں جے کشمیر
دا مسئلہ حل ہو جاندا اے تے تاریخ وچ عمران خان دا ناں سنہرے حرفاں وچ لکھیا جائے گا

سلام کشمیریاں دے جذبہ حریت تے شہادت نوں جس نگری وچ انساناں نوں بستیاں سنے ساڑیا جاندا ہوئے علم حاصل کرن والیاں نوں سکول تے یونیورسٹیاں، نمازیاں نوں مسجداں، خواتین نوں شیر خوار بالاں دے نال بربریت دا نشانہ بنایا جاندا ہوئے، زندہ ساڑنا، کٹ کے ٹوٹے ٹوٹے کر دینا، عزتاں لُٹنا، معصوم بالاں دے اعضائواں دا کاروبار گرم کرنا، منصف نوں انصاف نہ کرن دینا، انصاف منگن والے نوں ٹارگٹ کلنگ وچ مار دینا، اواز چکن والے دے گلے وچ طول پانا، انساناں نوں زندان خانے وچ پا کے تیل چھڑکن والیاں دی ایس دنیا وچ کون جینا چاہے گا؟ کون عزت و غیرت دے سودے اُتے راضی ہوئے گا؟ مسلماناں دی تاریخ اینے عبرتناک مظالم نال بھری پئی اے کہ امن پسند کمیٹیاں توبہ توبہ کردیاں نیں پر ایہہ امن پسند کمیٹیاں ایہہ نام نہاد حقوق انسان دے علمبردار اآخر کسے پاتال وچ جا بیٹھے نیں۔ حقوق نسواں دی عالمی تنظیم ایمنسٹی انٹرنیشنل دے توجہ دلوان اُتے وی مسلماناں دا قتل عام نہ رکنا، حکومت دا ناقابل معافی جرم اے۔ مسلماناںدی نسل کشی ایہناں لوکاں دا مطمع نظر اے۔ ہیومن رائٹس لئی UNO دے کول احتجاج اپڑدا وی اے تے ایہناں ی سرد مہری وچ کمی واقع نہیں ہوندی۔ آنگ سان سوچی جس نوں امن دا نوبل ایوارڈ ملیا اوہ وی نجانے کن وجوہات دی بنا اُتے مسلمان عورتاں، بالاں مرداں اُتے ہون والے قتل و غارت تے ایہناں نوں وراثت دین والی بھُکھ افلاس بیماری تے ناخواندگی اُتے کیوں چپ اے؟ جے کدھرے کوئی احتجاج کردا وی اے تے ایس نوں زندان وچ پا کے زنگ آلود تالے لا دتے جاندے نیں۔کیہ کیہے کہ جیہڑی تنظیماں تے شخصیات انسانی حقوق دی پاسداری دا ICON سمجھی جاندیاں نیں کیہ اسیں ایہناں دے بارے وچ وی ایہہ سوچ لئے کہ اوہ انسانیت اُتے کیتے جان والے مظالم نوں عالمی دنیا دی مارکیٹ وچ تجارت لئی استعمال کردیاں نیں۔ نہ بھارت دے کول گولیاں ختم ہو رہیاں نیں نہ ایہہ کشمیری نوجواناں دیاں گولیاں کھان والے سینے۔ ہن تے معصوم بچے سوچدے نیں کہ ساڈے بابا سانوں دشمناں توں بچا لین گے پر نیزے بندوق دے ساہمنے اک باپ وی بے بس ہو جاندا اے ایس دے اگے ایس دے پتر نوں زخمی کر کے گھسیٹیا جاندا اے ماں اپنے ننھے بالاں نوں لے کے ٹُٹے پھوٹے مکان دی کسے اوٹ وچ لُک جاندی اے ایہناں معصوماں دے منہ اُتے ہتھ رکھ دیندی اے۔فیر جگنو جہی اکھاں کومل سوچ دے ذہن اپنے اگے اپنے بھرا یا باپ نوں ٹھوکراں دی زد وچ ویکھدے نیں ایہناں دیاں لاشاں دی بے حرمتی ، ایہناں دے کٹے جان والے اعضائواں اُتے کپڑا بنھ کے ایہناں دی مشعل بنان اُتے ہر کارے نچدے نیں۔ اوہ تن ارب مسلمان جنہاں لئی مشہور اے کہ اوہ سب بابا آدم تے مائی حوا دی اولاد نیں اک دوجے دے درد و الم اُتے بلبلا اٹھدے نیں نجانے کس پاتال وچ جا لُکے نیں؟ کہ ایہناں نوں خون آلود اسمان وی منظر نہیں آندا تے اک ای گڑھے وچ سینکڑاں مسلماناں دیاں لاشاں وی بے چین نہیں کردیاں۔ جے کوئی شہ رگ کٹ رہیا ہوئے تے کیہ ساڈے اُتے جنگ واجب نہیں ہو جاندی ۔ عالم اسلام لئی کنہے لمحہ فکریہ نیں کشمیر دے نہتے مسلماناں دی عظمت تے قربانی نوں سلام پیش کردے ہوئے اسیں پاکستان وچ ہون والے دہشت گردی نوں یاد کرنے آں۔مختلف تھاواں وچ دہشت گردی دی نذر ہون والے اپنی قربانی نوں ضائع جاندے ویکھدے نیں تے سوال کردے نیں پر اسیں جواب دین دی ہمت نہیں رکھدے، بھارت ولوں مقبوضہ کشمیر دی خصوصی حیثیت دے خاتمے تے مقبوضہ وادی چنار دے فوجی محاصرے نوں دو سال مکمل ہون اُتے مظلوم کشمیریاں نال اظہار یکجہتی لئی پوری قوم نے یوم استحصال منایا یوم استحصال کشمیر اُتے پورے ملک وچ اک منٹ دی خاموشی اختیار کیتی گئی سی تے سڑکاں اُتے ٹریفک رک گئی سی۔ ریڈیو پاکستان تے ٹیلی ویژن اُتے اک منٹ دی خاموشی دے فوراً بعد پاکستان تے آزاد جموں و کشمیر دے قومی ترانے وجائے گئے سن بھارت دی مودی حکومت نے 5 اگست 2019 نوں مقبوضہ کشمیر نوں آئین وچ حاصل خصوصی حیثیت ختم کر دتی سی۔ مقبوضہ جموں و کشمیر وچ بھارتی فوج دے مظالم تے کشمیری عوام دے خلاف بھارت دے یکطرفہ غیر قانونی اقدامات دی مذمت لئی متعدد تقریباں منعقد کیتیاں گائیاں سن۔ صدر مملکت ڈاکٹر عارف علوی نے اسلام آباد وچ واک دی قیادت کیتی سی۔ واک دے شرکا نے کالی پٹیاں بنھ رکھیاں سن پاکستان تے آزاد کشمیر دے جھنڈے لہرائے گئے سن۔ شرکاء نال خطاب وچ صدر مملکت عارف علوی نے کہیا سی کہ بھارت کشمیریاں اُتے مظالم نوں بند کرے۔ 5 اگست دے اقدامات واپس لین تیکر بھارت نال مذاکرات نہیں ہون گے۔ اسلام آباد وچ وزیر خارجہ شاہ محمود قریشی دی قیادت وچ دفتر خارجہ توں پارلیمنٹ تیکر ریلی کڈی گئی سی جس وچ شہریاں دی وڈی تعداد وچ شرکت کیتی۔ دوجے پاسے آرمی چیف جنرل قمر جاوید باجوہ نے کہیا کہ مقبوضہ کشمیر دی مخدوش صورتحال نے علاقائی سلامتی نوں داء اُتے لا دتا اے۔ یوم استحصال کشمیر اُتے اپنے پیغام وچ اوہناں نے کہیا کہ مقبوضہ کشمیر وچ بدترین ریاستی جبر جاری اے مسئلہ کشمیر کشمیریاں دیاں امنگاں دے مطابق حل کیتے بغیر امن ممکن نہیں، بین الاقوامی قانون دی خلاف ورزیاں توں مقبوضہ کشمیر وچ سکیورٹی بحران پیدا ہو سکدا اے۔ ظالمانہ بھارتی فسطائی ہتھکنڈیاں دے خلاف جس طرح پوری دنیا وچ یوم استحصال منایا گیا تے جس طرح حکومت پاکستان نے اواز چکی ایہہ خوش آئند قدم اے۔ وزیراعظم پاکستان عمران خان دے دور حکومت وچ ایہناں دی بہترین حکمت عملی پاروں جے کشمیر دا مسئلہ حل ہو جاندا اے تے تاریخ وچ عمران خان دا ناں سنہرے حرفاں وچ لکھیا جائے گا۔