ہن بھاویں مارو کُٹو ایہ پچھے ہٹن والے نہیں

اسدمفتی

یورپی یونین دے شماریاتی ونگ یورو سٹیٹ نے اعدادوشمار جاری کیتے نیں جہدے وچ دسیا گیا اے کہ برطانیہ نوں یورپ دا سب توں ودھ ’’اوپن ملک‘‘ بنان لئی ہر پنج منٹ وچ دو عدد دی حیران کن شرح نال امیگرنٹس نوں پاسپورٹس جاری کر دتے گئے نیں۔ ریسرچ دے مطابق 2019ء وچ ناقابل یقین حد تک دو لکھ چار ہزار غیرملکیاں نوں برطانوی شہریت دتی گئی ایہ شرح پورے براعظم بھر وچ سب توں ودھ منی جاندی اے۔ اودھر یورپی یونین ملکاں دی اکثریت نے اپنی سرحداں تے نگرانی دے عمل نوں سخت بنان دے حق وچ ووٹ دتا اے۔ شمالی افریقہ وچ بدامنی دے شکار ملکاں توں ہزاراں مہاجرین دی اٹلی آمد دے بعد ایہ فیصلہ کیتا گیا اے ایہدے باوجود برطانیہ دے بعد دوجی وڈی گنتی وچ شہریت دین والے ملکاں وچ فرانس دا نمبر آندا اے جتھے اک لکھ چھتی ہزار غیرملکی بندیاں نوں شہریت دتی گئی اے۔ ایہ گنتی تریجے نمبر تے آن والے ملک جرمنی توں تقریباً دونی اے جتھے 96 ہزار غیرملکی‘ جرمنی دی شہریت حاصل کرن وچ کامیاب ہوئے۔ ایس حساب نال ویکھیا جاوے تے ماہرین دی ایہ پیش گوئی صحیح لگدی اے کہ 2050ء وچ برطانیہ یورپ دا سب توں ودھ گنجان آباد ملک بن جاوے گا۔ اعدادوشمار جاری ہون دے بعد وڈی گنتی وچ امیگرنٹس نوں شہریت دتے جان تے تنقید کیتی جا رہی اے تے وزیراعظم بورس جانسن توں کیتا گیا مطالبہ زور پھڑ گیا اے کہ اوہناں نوں وڈی گنتی وچ امیگرنٹس روکن لئی انقلابی پالیسیاں متعارف کران تے سسٹم تے گرفت مضبوط کرنی ہووے گی۔ حال ای وچ جو سخت امیگریشن پالیسی لاگو کیتی گئی اے اوہدے نال ہزاراں پاکستانی متاثر ہون گے۔ ایہناں متاثرین وچ خانداناں وچ میل ملاپ‘ شمولیت تے فیملی وزٹ ویزا دی درخواست دین والے قابل ذکر نیں۔ برطانیہ دے وزیر امیگریشن نے اپنے حالیہ دتے گئے اک انٹرویو وچ دسیا اے کہ نویاں تجویزاں منصفانہ تے خرچیاں وچ کمی لئی ضروری نیں جہناں دا مقدمہ جعلی تے فرضی و کاغذی شادیاں دی حوصلہ شکنی اے۔ جعلی پاسپورٹاں توں برطانیہ وچ داخل ہون والیاں دی سختی نال پڑتال کیتی جاوے گی۔ اودھر پاکستان وچ نقلی برطانوی پاسپورٹ دی تیاری اک عام جہی گل ہو گئی اے۔ امریکی تے برطانوی حکومتاں نے اجہے پاسپورٹاں دے راہیں دہشت گرداں دے بیرونی دوریاں دے خاتمے دا وی مطالبہ کیتا اے انٹرپول دے اک عہدیدار نے حیرت ناک انکشاف کیتا اے کہ چالھی ہزار توں ودھ بندے جعلی پاسپورٹ دا استعمال کرکے وکھووکھ ملکاں دا دورہ کردے نیں یاں غایب ہو جاندے نیں ایہ اک خطرناک رجحان اے پاکستان وچ جعلی برطانوی پاسپورٹ دا استعمال سب توں ودھ اے۔
77صفحیاں تے مشتمل فیملی مائیگریشن اے کنسلٹیشن‘‘ نامی کتابچے وچ ایہ گل لکھی اے کہ نویں قنوناں دے تحت برطانیہ وچ شوہر‘ بیوی یاں پارٹنر ولوں مستقل قیام لئی درخواست دی عبوری مدت دو ورھے توں ودھا کے پنج ورھے کر دتی گئی اے جد کہ یورپی یونین توں باہر دے ملکاں توں برطانیہ وچ رہائش پذیر اپنے پیاریاں دے نال شامل ہون والے ویلفیئر مراعات دے مستحق نہیں ہون گے۔ ایہو وجہ اے کہ پاکستان‘ بنگلہ دیش‘ افریقی تے کیریبین ملکاں نال تعلق رکھن والے معمولی آمدنی والے بندے ڈاڈھے متاثر ہون گے۔ ایتھے ایہ گل وی یاد رکھن دے قابل اے کہ برطانیہ وچ بیروزگار بندیاں دی گنتی پینتی لکھ دے نیڑے ہو گئی اے۔
دارالعوام دی امور داخلہ سلیکٹ کمیٹی دے چیئرمین نے اک واری فیر کہیا اے کہ اوہناں دے ترکی تے یونان دے دورے توں ایہ ثابت ہو گیا اے کہ دوہاں ملکاں دیاں حکومتاں دی کوشش دے باوجود ایس خطے توں غیرقنونی تارکین وطن دے یورپی یونین وچ داخلے نوں ختم کرن لئی زیادہ موثر اقدامات دی ضرورت اے خاص طور تے یورپی یونین‘ ترکی‘ یورپی تے بین الاقوامی قنون دے نفاذ کرن والی ایجنسیاں دے وچکار مجرماں خلاف مسلسل انٹیلی جنس دے تبادلے دی ضرورت اے نہیں تے ترکی نوں جے یورپی یونین دا ممبر بنن دی اجازت دے دتی گئی تے برطانیہ وچ غیرقنونی تارکین وطن دا سیلاب آ جاوے گا ایس لئی ترکی نوں ممبر بنن دی اجازت دین توں پہلاں اوہدی سرحداں تے برسلز دے قواعد دے مطابق سخت کنٹرول لاگو کیتا جاوے۔ ممبران پارلیمنٹ نے چتاونی دتی اے کہ اوہناں نوں ڈر اے کہ ترکی برطانیہ وچ داخلے لئی اک گیٹ وے دے طورتے استعمال ہوے گا ترکی کی ممبر شپ نال یورپی یونین دیاں سرحداں ایران‘ عراق تے شام تک کھلیاں ہو جان گئیاں جد کہ یونان تے ترکی دے وچکار وی غیرقنونی تارکین وطن دے داخلے دیاں تھاواں موجود نیں ہزاراں تارکین وطن ترکی دے راہیں ہر مہینے یورپی یونین وچ داخل ہو رہے نیں تے اوہناں وچوں اکثر برطانیہ تک اپڑ جاندے نیں۔ مجرم گروہاں دے خلاف اقدامات سخت کرن دی ضرورت اے جو ہزاراں تارکین وطن دی یورپی یونین وچ منتقلی تے انسانی سمگلنگ وچ ملوث نیں۔ ایتھے ایہ گل دسنا وی ضروری اے کہ افغانستان توں مغربی ملکاں ول سمگل ہون والی 80 فیصد ہیروئن ترکی راہیں آندی اے۔ اک معلوماتی تے اہم گل ایہہ وے کہ 2030ء تک یورپی یونین وچ تارکین وطن دی آمد دا تخمینہ چھ لکھ دے نیڑے ہو سکدا اے۔
امریکی حکومت نے یورپی یونین اگے درخواست کیتی اے کہ جعلی یورپی پاسپورٹ خاص کر برطانوی پاسپورٹ راہیں دہشت گردی دے سمندر پار دوریاں نوں روکیا جاوے۔ امریکی حکومت نے پاکستان تے دوجے تن ملکاں نوں اپنی جی اے او ٹیماں نوں وی روانہ کیتا اے تاں جے اوہ جعلی پاسپورٹاں دے نیٹ ورکس تے پابندیاں نوں چھیتی توں چھیتی لاگو کروا سکن۔ اوہنے جعلی پاسپورٹاں دے چار شعبیا ںدی نشاندہی کیتی اے جہدے وچ دہشت گرداں دے بارے جانکاری دے تبادلے‘ سفری جعلی دستاویزات‘ پاسپورٹ دی غیرقنونی اجرائی تے پاسپورٹ اجرائی وچ سکیورٹی دی خامیاں دا پتہ لایا اے۔ برسلز وچ ہون والے یورپی یونین دے وزرائے داخلہ دے حالیہ اجلاس وچ ایہ وی کہیا گیا اے کہ شینگن زون وچ آزادانہ سفر دی سہولت نوں محدود نہیں کیتا جاوے گا۔ ایس تں پہلاں شینگن زون وچ آزادانہ سفر نوں گھٹ کرکے زون وچ شامل ملکاں نوں عارضی طور تے بارڈر کنٹرول ’’بحال‘‘ کرن دی گل کیتی گئی سی جہدے تے یورپی یونین ملکاں دے کافی نمائندیاں نے ایس رائے دا اظہار کیتا سی کہ یونین دی حدود دے اندر لوکاں دی آزادانہ نقل و حرکت یونین دی اک کلیدی کامیابی اے تے اسیں ایس بنیادی کامیابی دی حفاظت کراں گے تے ایہنوں برقرار رکھاں گے پر یورپی کمیشن وی کسے حد تک شینگن معاہدے وچ اصلاحات دا حمایتی اے اوہدے خیال وچ انج کرنا اوس ویلے ضروری ہو سکدا اے جدوں بیرونی سرحداں دے کسے حصے نوں غیرمتوقع دبائو دا سامنا ہووے تارکین وطن دے حالیہ (یاد رہوے کہ شمالی افریقہ وچ بدامنی دے شکار ملکاں توں ہزاراں دی گنتی وچ مہاجرین دی اٹلی آمد دے بعد یورپی یونین انج سوچن تے مجبور ہو گئی اے) مسئلے تے قابو پان لئی اجہے ضروری حالات وچ اندرونی سرحداں دی فیر توں بحالی ای ہو سکدا اے۔ سارے خدشات تے اندیشے دور دراز اپنی تھاں تے صحیح ہو سکدے نیں پر شینگن معاہدے وچ شامل سارے ملکاں دی رضامندی دے بناں کوئی معاہدہ ممکن نہیں تے تارکین وطن دے سیلاب یاں سونامی نوں روکیا نہیں جا سکدا تے ایہ جانن لئی کسے یونیورسٹی دی ڈگری دی لوڑ بالکل وی نہیں کہ کوئی وی منفی فیصلہ تقریباً چار سو ملین یورپی باشندیاں تے اوہناں دے کلچر نوں متاثر کرے گا۔ میں کدھرے پڑھیا اے کہ اقلیت اوہ ہوندی اے جہدے مذہب تے کلچر دی بنیاد کسے دوجے ملک وچ ہوندی اے۔٭٭