انگلستان وچ ودھدی مہنگائی

روز روز مہنگائی دا معاملہ ہن صرف پاکستان تک ای محدود نہیں رہیا بلکہ امریکہ تے یورپی ملکاں سنے برطانیہ وچ وی ایہدے شدید منفی اثرات مرتب ہون لگے نیں۔ برطانوی مالیاتی اداریاں تے معاشی ماہرین نے تے ایتھوں تک پیشین گوئی کردتی اے کہ چالو سال دے اخیر تک مہنگائی وچ 11فیصد وادھا ہو جاوے گا جد کہ موجودہ مہنگائی 40سال دی بلند ترین سطح اتے پہنچ چکی اے جہدے توں گھریلو صارفین شدید مالی تے ذہنی دبائو دا شکار نیں۔ انج ایتھے پہلی واری ہویا اے کہ پٹرول ٹینکی بھرن دا خرچہ 100پائونڈ توں تجاوز کر گیا اے جہڑا برطانوی معیشت دے سکڑن دا واضح ثبوت اے۔ میری گوری کولیگ دس رہی سی کہ غیر شادی شدہ ہون دے باوجود اوہنے کھانا گھٹ پکانا شروع کردتا اے کہ اوہ ہن محسوس کردی اے کہ معقول معاوضے دے باوجود وی اوہ اپنے خوبصورت فلیٹ ودھدے انرجی بلز ہفتہ وار شاپنگ تے اپنی مقامی کلب وچ مے کشی دے ودھدے اخراجات آسانی نال پورے نہیں کر پا رہی۔ تسیں ویاہ کیوں نہیں کر لیندے؟ میں اگلے دن اوہنوں ازراہ تفنن پچھ لیتا۔ جاندی سی تسیں ایہو صائب مشورہ دیو گے۔ اوہ بولی۔ تسیں ایہہ وی جاندے اوکہ ساڈی سوسائٹی وچ ویاہ کدوں تے کیویں ہوندا اے۔ بوائے فرینڈز دے ناز نخریاں توں وی تسیں چنگی طرح آگاہ ہو تے ویسے وی اوہ شوازریگل پہلے جہڑی معقول قیمت اتے خریدی جا سکدی سی پٹرول وانگوں مہنگی ہو گئی اے۔ایہو معاملہ سالانہ ہالیڈیز دا وی اے۔ مہنگائی دا ایہہ رونا جدوں وی اپنے بے روزگار بوائے فرینڈ نوں رونی آں تے اوہدا اک ای جواب ہوندا اے کہ تعلقات نوں سانوں بھرویں طریقے نال انجوائے کرنا چاہیدا اے ویاہ وچ کیہ رکھیا اے۔
ایسے طرح پرانی وضع قطع دی میری اک ہور ہمسائی جہدا اک برطانوی حساس ادارے نال جڑیا شوہر کئی ورھیاں پہلا اوہنوں داغ مفارقت دے چکیا اے۔ ویاہ دے فلسفے دے حق وچ تے ہے مگر حالیہ مہنگائی توں اوہ وی سخت پریشان اے۔ہفتہ وار شاپنگ دی رضاکارانہ ذمہ داریاں نبھان لئی مینوں اوہنے کئی ورھیاں توں منتخب کر رکھیا اے۔ پچھلے کجھ مہینیاں توں میں محسوس کیتا کہ اوہدی شاپنگ دی رسید جیویں ای اوہنوں پھڑانا واں شیواں دی قیمتاں ویکھدیاں ای اوہ پہلا فقرہ جہڑا ادا کردی اے اوہ Jesus Crist ہوندا اے۔ لندن وچ پرانے مسیحی کداوند یسو مسیح دانام اوس ویلے پکاردے نیں جدوں اوہناں نوں یکدم حیرانگی دا سامنا ہووے۔ اوہدا آکھنا اے کہ برطانیہ جیہی فلاحی مملکت وچ روزمرہ خوردنی اشیا گیس ‘ بجلی تے پٹرول دے ودھدے نرخاں نے ایس پیرانہ سالی وچ مینوں ایس قدر پریشان کر دتا اے کہ ریاست ولوں ملن والی پنشن وی ہن ناکافی لگن لگی اے۔ ایہہ آکھن مگروں اوہ خموش ہو گئی۔ فیر قدرے توقف مگروں بولی تہانوں ایہہ وی دس ای دیواں کہ گیس تے بجلی دے ودھدے نرخاں نے مینوں ہفتہ وچ ہن صرف اک واری باتھ لین تے مجبور کر دتا اے کہ سنٹرل ہیٹنگ تے گیس توں گرم پانی دا ہور خرچہ برداشت کرنا میرے لئی ممکن نہیں رہیا۔ پرانے ویلیاں دی 14جماعتاں پاس ماتاں ڈیزی نے گل تے صحیح آکھی سی کہ شدت اختیار کردی کمر توڑ مہنگائی نے اوہنوں ای متاثر نہیں کیتا ایتھے دا ہر ملازم پیشہ برطانوی شہری ودھدی قیمتاں دی دہائیاں دیندا نظر آ رہیا اے۔ مشرقی یورپ توں آئی بے گھر اوہ گداگر زنانیاں نیں انگریزی زبان اتے قطعی عبور حاصل نہیں۔ لندن دی بیشتر شاہراہواں اتے ہتھ پھیلا کے تہاڈا پچھا کردی ہوئی ایہہ آکھن اتے مجبور نیں کہ خیرات وچ دتی گئی رقم نال ہن اوہناں دا گزارا ممکن نہیں ایس لئی خیراتی رقم نوں ودھان وچ تعاون کرو۔ ایہہ حالات اوس برطانیہ عظمیٰ دے نیں جہناں نے دنیا اتے 300ورھیاں تک بادشاہت کیتی مگر اسلام دے نام اتے حاصل کیتی 75 سالہ مملکت پاکستان وچ ودھدی مہنگائی غیر یقینی صورتحال ‘ عدم سیاسی تے جمہوری استحکام دے تناظر وچ جے ویکھیا جاوے تے ایہہ گل قطعی لکی چھپی نہیں کہ ترقی یافتہ ملکاں دے مقابلے وچ مہنگائی دے خلاف آواز چکن دا جہڑا انداز تے طریقہ کار ساڈے وطن عزیز وچ اے اوہ مغربی ملکاں وچ نہیں۔ ساڈے ایتھے مہنگائی دی وجوہات ہور وی نیں مگر سب توں وڈی وجہ اوہ ذخیرہ اندوزی اے جہدے اتے قابو پان دا حکومتی سطح اتے کوئی تاہنوز فارمولہ طے نہیں ہو سکیا۔ چینی’ گندم’ پیاز’ ٹماٹر’ پھل’ گوشت تے گھیو دی وافر مقدار ہون دے باوجود ساڈے ایتھے چیک اینڈ بلینس دا چونکہ کوئی تصور ای موجود نہیں ایس لئی ہول سیلرز عام دکانداراں نوں مال اوس قیمت اتے فروخت کردے نیں جہدا اک گاہک اندازہ نہیں کر سکدا۔ انسان اخیر انسان اے۔ اپنی قوت برداشت نوں قابو وچ رکھن لئی اوہنوں کئی واری اپنا آپ تبدیل کرنا پیندا اے تے ایہو اوہ غیر ارادی عمل اے جہڑا ساڈے معاشی حالات اتے بری طرح اثرانداز اے۔
اخیر وچ تہانوں ایس خبر توں آگاہ کرنا ضروری اے کہ ڈھائی سال پہلاں پھیلی کووڈ19وائرس دی اک نویں لہر Variant نے مغربی دنیا وچ فیر سر چک لیتا اے۔ New Sub Variant دے نام نال BA-4 تے BA-5 اومی کرون شدت اختیار کرن لگی اے۔ا مپریل کالج لندن دے پروفیسر ڈینی دس رہے سن کہ کووڈ دی نویں لہر گو اک تشویشناک خبر اے مگر گھبران توں ودھ لوڑ ایس موذی تے جان لیوا مرض دی اوہ احتیاطی تدبیراں نیں جہناں اتے ہر برطانوی شہری نوں عمل پیرا ہونا ضروری اے۔ تازہ ترین اعدادوشمار دے مطابق برطانیہ وچ نویں لہر دے کیساں دی شرح وچ 32فیصد وادھا ریکارڈ کیتا گیا اے۔ تازہ ترین اطلاعواں دے مطابق پاکستان وچ وی اومی کرائون کیساں وچ وادھا ہون لگیا اے۔ چنانچہ لوڑ ایس امر دی اے کہ کووڈ 19دی ایس نویں لہر توں بچائو لئی اپنا Boostar لگوانا ہرگز نہ بھلو۔