پنجابی دے مہمان لکھاری

ایہدے بعد ایف اے 2جنوری 1948ء وچ گورنمنٹ انٹرمیڈیٹ کالج جھنگ توں پاس کیتا پنجاب یونیورسٹی دے ایس امتحان وچ فرسٹ ڈویژن حاصل کیتی۔ بی اے 19دسمبر 1949ء وچ گورنمنٹ کالج جھنگ توں پاس کیتا۔ آپ ہاکی دے بڑے چنگے کھڈاری سن ایسے کالج دیاں سرگرمیاں دی وجہ نال 1949ء وچ آپ نوں کافی ایوارڈ ملے ایہدے بعد پنجاب یونیورسٹی توں انگریزی ادب وچ ایم اے تے 3جون 1954ء نوں سول سروس دا امتحان پاس کیتا۔ 1986ء وچ ایہناں دی پہلی نثری کتاب ”کرن کرن سورج” چھپی مضموناں دا مجموعہ ”دل دریا سمندر” دے ناں توں 1987ء وچ چھپیا۔ فیر قطرہ قطرہ قلزم 1989ء مضموناں دی کتاب ”حرف حرف حققت” پنجابی کلام ”بھرے بھڑولے” تے اردو کلام ”شب راز 1995ء وچ فرمودات تے مبنی کتاب ”بات سے بات” تے 1996ء وچ آپ دی محفلاں دے سوالات تے جوابات تے مبنی کتاب ”گفتگو” چھپی۔
تریخ وصال 18 جنوری 1993ء اے آپ دا مزار مبارک قبرستان میانی صاحب بہاولپور روڈ برلب سڑک واقع اے ہر سال ایہناں دا دو روزہ عرس مبارک منایا جاندا اے۔
اصغر بٹ (ادیب)
ممتاز صحافی’ ناول نگار’ ڈرامہ نویس تے ادیب اصغربٹ نے اپنی عملی زندگی دا آغاز نیف ڈیک توں کیتا۔ اوہ سیکرٹری کلچرل وی رہے۔ ایہناں نے فلمی صنعت دیاں اوکڑاں دور کرن وچ بڑی مدد کیتی۔ اوہ علمی و ادبی ذوق اپروں فنون لطیفہ دی راہ وچ موجود اوکڑاں نوں چنگی طرح سمجھدے سن۔ ایہناں دا ”دی نیشن” وچ چھپن والا کالم ایہدا آئینہ دار سی۔ اوہ ست ورھے توں فالج پاروں صاحب فراش سن پر اوہناں دا حوصلہ’ وضع داری اوسے طرح قائم رہی۔ بھاویں لفظ اوہناں دے ہونٹاں توں ٹٹ جاندے پر اوہناں دا حوصلہ اوسے طرح بلند رہندا۔ اوہ صاحب طرز ادب’ ناول نگار تے سوانح نگار نثاربٹ دے شوہر سن۔
جہناں نال ایہناں دی پہلی ملاقات 26جنوری 1952ء نوں ریڈیو سٹیشن پشاور تے ہوئی سی۔ جتھے اوہ اسسٹنٹ ڈائریکٹر سن۔ نثارعزیز بٹ اوتھے کمپیئر تے سکرپٹ ایڈیٹر سن تے ایس طرح ادب دے ایہ دو تارے 1954ء وچ رشتہ ازدواج وچ بجھ کے اک چشمے دی صورت اختیار کر گئے جنہے سرزمین ادب نوں سیراب کیتا۔ (جاری اے)