مسلمان قوم دی اجتماعی رائے دا پھل۔۔۔۔سوہنا دیس پاکستان

سب توں پہلاں تے میں معافی دا طلبگار آں کہ مینوں کالم دے شروع وچ ای کجھ تلخ لفظ استعمال کرنے پے گئے نیں۔ کجھ ”دانشوراں” دا جدوں میں ایہہ لغو تے بے ہودہ موقف پڑھنا واں کہ پاکستان انگریزاں نے بنایا سی تے سچی گل اے مینوں اپنے جذبیاں اتے قابو نہیں رہندا۔ انج دے تریخ داناں دی ذہنی پستی تے گمراہی اتے ماتم کرن نوں دل چاہندا اے جہڑے تریخ دا ریکارڈ درست کرن دے نام اتے ایہہ لکھدے نیں کہ پاکستان دے بانی قائداعظم نہیں سن۔ پاکستان بنان والے تے اصل انگریز سن۔ میں ایہہ تے نہیں کہندا کہ ایسے نام نہاد تریخ داناں نے تریخ دا مطالعہ نہیں کیتا ہووے گالیکن اک گل ضرور اے کہ تحریک پاکستان وچ قائداعظم دے کرار نوں مشکوک بنان دی مذموم کوششاں کسے ملک دشمن ایجنڈے دا حصہ معلوم ہوندیاں نیں۔ کیہ کابینہ مشن پلان برطانوی حکومت نے پیش نہیں کیتا سی؟ کیہ کابینہ مشن قیام پاکستان نوں روکن تے اکھنڈ بھارت دے قیام لئی ہندوستان نہیں پہنچیا؟ لیکن آل انڈیا مسلم لیگ نے کابینہ مشن دے فارمولے نوں ایس لئی تسلیم کر لیا کیوں جے ایہدا مقصد پاکستان نوں اک وکھری فیڈریشن تے ہندوستان نوں اک وکھری فیڈریشن بنانا سی تے فیر ایہناں دونواں دے وچ اک کنفیڈریشن قائم ہونا سی۔ آل انڈیا مسلم لیگ ولوں ایس فارمولے نوں قبول کر لین دی وجہ ایہہ سی کہ مسلم لیگ دا خیال سی کہ آخر کار ایہدے قیام پاکستان دا رستہ نکل آوے گا۔ بہرحال ایہہ حقیقت وی تسلیم کرنا ہووے گی کہ برطانیہ کسے وی حالت وچ ہندوستان دی تقسیم تے مسلماناں لئی وکھری آزاد تے خودمختار ریاست دے قیام لئی آمادہ نہیں سی۔ ایسے لئی کیبنٹ مشن نے جہڑا پلان پیش کیتا سی۔ ایہدے مطابق ہندوستان نے اک متحدہ ملک دے طور تے آزاد ہونا سی۔ مرزک دے کول دفاع’ امور خارجہ تے رسل تے رسائل دے محکمے ہونے سن تے باقی امور وچ صوبیاں نوں مکمل خودمختاری حاصل ہونا سی۔ ہندوستان دی تقسیم دے گاندھی تے نہرو توں وی ودھ کے مخالف مولانا ابوالکلام نے وی اپنی کتاب”India Wins Freedom”وچ ایہہ تحریر کیتا اے کہ کیبنٹ مشن پلان ایس امر دا واضح تے غیر مبہم اعلان سی کہ ہندوستان تقسیم نہیں ہووے گا۔ ابوالکلام آزاد نے ایہہ وی دعویٰ کیتا اے کہ کیبنٹ مشن پلان ایہناں دی سوچ دی مکمل طور تے عکاسی کردا سی۔ مطلب ایہہ ہویا کہ تقسیم ہند دی مخالفت وچ انگریزاں تے کانگرس دی سوچ وچ مکمل ہم آہنگی سی۔ فیر ایہہ سوال کتھوں پیدا ہو گیا کہ پاکستان انگریز نے بنایا سی۔ مولانا ابوالکلام آزاد نے بڑے واضح طور تے اپنی کتاب وچ لکھیا اے کہ مسلم لیگ دا مطالبہ’ ہندوستان دی تقسیم تے مسلم اکثریت دے علاقیاں اتے مشتمل آزاد ریاست دا سی لیکن کیبنٹ مشن ایس مطالبے دے حق وچ نہیں سی۔ نوجوان نسل دی معلومات لئی ایہہ دسنا ضروری اے کہ جدوں کیبنٹ مشن کانگرس تے آل انڈیا مسلم لیگ دی قیادت نال مذاکرات لئی ہندوستان پہنچیاتے اوس ویلے کانگریس دے صدر ابوالکلام آزاد سن۔ کانگرس ولوں کیبنٹ مشن نال جس وفد نے مذاکرات کیتے اوہدی قیادت وی ابوالکلام آزاد نے کیتی سی۔ سردار پٹیل تے جواہر لال نہرو وی اوس وفد دے ارکان سن جہناں نے کیبنٹ مشن نال کئی ملاقاتاں کیتیاں تے کانگرس دا نقطہ نظر مشن دے سامنے پیش کیتا۔
مسلم لیگ تے کانگرس دونواں نے کیبنٹ مشن پلان نوں منظور کر لیا لیکن کانگرس ایس پلان اتے بوہتا ای خوش سی تے اوہنوں کانگرس دی فتح قرار دتا جا رہیا سی ۔ کیوں جے ایس پلان وچ ہندوستان دی تقسیم نہیں سی۔کیبنٹ مشن دے ارکان وی بہت مطمئن تے خوش سن کہ ہندوستان تقسیم نہیں ہو رہیا۔ میں ایہہ گل کالم وچ بار بار ایس لئی دہرا رہیا واں کہ عقل دے جہناں دشمناں نے ایہہ پراپیگنڈا اپنا فرض سمجھ لیا اے کہ پاکستان انگریزاں نے بنایا اے۔ اوہ وی ایہہ جان لین کہ کانگرس دے صدر ابوالکلام آزاد نے اپنی کتاب وچ کیہ لکھیا اے۔ قیام پاکستان تے قائداعظم دے موقف دے سخت مخالف نے وی ایہہ شہادت دتی اے کہ انگریزاں لئی ہندوستان دی تقسیم کسے طور وی قابل قبول نہیں سی۔ ہن اوس دور دے وزیراعظم برطانیہ مسٹر ایٹلی دی اک تقریر ملاحظہ کرو جہڑی اوہنے برطانیہ دی پارلیمنٹ وچ 15 مارچ 1946 نوں کیتی سی۔ اوس تقریر دا خلاصہ ایہہ سی کہ برطانیہ مسلماناں نوں مسلمان قومیت دی بنیاد اتے اپنی وکھری ریاست دے قیام دی اجازت نہیں دیوے گا۔ برطانوی وزیراعظم دے الفاظ تقریباً ایہہ سن کہ ”مسلمان اقلیت نوں ہندواکثریت دے مفادات دے خلاف ویٹو دا حق نہیں دِتا جا سکدا”۔
برطانوی استعمار دے عزائم تے ساریاں اتے ای آشکار سن کہ اوہ تحریک پاکستان دے کسے وی مرحلے وچ قیام پاکستان دے حق وچ نہیں سی۔ قیام پاکستان دی راہ روکن دی اک کوشش کیبنٹ مشن پلان وی سی۔ قائداعظم کیبنٹ مشن پلان توں قطعی طور تے خوش نہیں سن تے ایہہ گل ابوالکلام آزاد نے وی تسلیم کیتی اے کہ مسلم لیگ نے دبائو وچ آ کے ایس پلان نال اتفاق کیتا سی۔ دوجی وجہ مسلم لیگ ولوں کیبنٹ مشن پلان وی سی۔قائداعظم کیبنٹ مشن پلان توں قطعی طور تے خوش نہیں سن تے ایہہ گل ابوالکلام آزاد نے وی تسلیم کیتی اے کہ مسلم لیگ نے دبائو وچ آ کے اوس پلان توں اتفاق کیتا سی۔ دوجی وجہ مسلم لیگ ولوں کیبنٹ مشن پلان نوں منظور کرن دی ایہہ سی کہ آخر کار ایہدے توں قیام پاکستان دا رستہ نکل ای آوے گا مگر جدوں کانگرس دے صدر منتخب ہون دے فوراً مگروں جواہر لال نہرو نے ایہہ اعلان کیتا کہ کانگرس دستور ساز اسمبلی دے ذریعے کیبنٹ مشن پلان وچ تبدیلی تے کمی و بیشی دا حق رکھدی اے تے قائداعظم نے کانگرس دی بدنیتی ظاہر ہون مگروں کابینہ مشن پلان نوں رد کردتا۔ ابوالکلام نے قائداعظم تے مسلم لیگ ولوں کابینہ مشن پلان نوں رد کرن دے فیصلے دا ذمہ دار جواہر لال نہرو نوں ٹھہرایا اے۔ قائداعظم نے اعلان کردتا کہ کانگرس چونکہ معقولیت دے سارے رستے تے اصول فراموش کر چکی اے ایس لئی ساڈے لئی ہن
واحد رستہ ایہہ ہے کہ اسیں مسلمان عوام دی عدالت وچ جائیے۔ ہن کانگرس نال مفاہمت دی کوئی گنجائش باقی نہیں رہی تے ساڈے لئی واحد نصب العین ہن قیام پاکستان دا حصول اے۔ قائداعظم نے پختہ عزم تے اٹل ارادیاں دے نال ایہہ اعلان فرما دتا کہ ہن اسیں قیام پاکستان توں گھٹ کسے وی گل اتے سمجھوتہ نہیں کر سکدے۔ کیوں جے کانگرس دی مسلسل فریب کاریاں مگروں ہن ساڈے کول کوئی دوجا رستہ باقی رہیا ای نہیں۔ قائداعظم نے 16 اگست 1946 نوں راست اقدام دے آغاز دا دن قرار دے دتا۔ قائداعظم نے اپنا مقدمہ مسلمان قوم دے سامنے رکھ دتا۔ ایہہ وی فیصلہ کیتا گیا کہ برطانیہ دی مسلمان دشمن پالیسیاں دے خلاف احتجاج دے طور تے ساری ممتاز مسلمان شخصیات برطانوی سامراج ولوں عطا کیتے گئے خطابات تے اعزازات واپس کر دین۔ قائداعظم ولوں راست اقدام دا اعلان کلکتہ توں لے کے پشاور تک پورے ہندوستان وچ پاکستان دے مطالبے دی حمایت وچ اک ریفرنڈم ثابت ہویا۔ مسلمان قوم دے اتحاد’ نظم و ضبط تے ایقان وایمان دے سامنے برطانوی حکومت نہ ٹھہر سکی تے مطالبہ پاکستان منظور کرلیا گیا۔ جے مسلمان قوم موثرجمہوری تے عوامی تحریک دی صورت وچ قائداعظم دی راست اقدام دی اپیل نوں کامیاب نہیں کروا سکدی تے پاکستان دا قیام ممکن نہیں ہوندا۔ مسلمان قوم دی جمہوری تحریک دے موثر تے بھرواں ہون دا ثبوت ایس توں وَڈا ہور کیہ ہو سکدا اے کہ مرکزی تے صوبائی اسمبلیاں دے انتخابات وچ مسلم لیگ نے 524 سیٹاں وچوں 453 سیٹاں اتے کامیابی حاصل کیتی سی۔ انتخابات وچ قائداعظم تے مسلم لیگ اتے مسلماناں دی عظیم تے غالب اکثریت دے اعتماد مگروں ای پاکستان دا قیام ممکن ہویا۔ قیام پاکستان مسلمان قوم دی اجتماعی رائے دا ثمر اے۔ ایسے دروغ گو ”دانشوراں” اتے اللہ دی لعنت ہووے جو ایہہ پروپیگنڈا کردے نیں کہ پاکستان دے بانی قائداعظم نہیں سن بلکہ پاکستان انگریز نے بنایا سی۔ مسلمان قوم دے 87 فیصد ووٹاں نے مطالبہ پاکستان دی حمایت کیتی تے پاکستان قائم ہویا سی۔