مشتری ہوشیار باش!…نوسر بازاں کولوں بچو

سوشل میڈیا اک ایسا ذریعہ اے جتھے اسیں بہت ساری معلومات توں استفادہ وی حاصل کر سکنے آں۔ ایہہ اک ایسا ذریعہ اے جتھے تہانوں بہت سارے فیدیاں نال ہمکنار ہونا پیندا اے اوتھے تسیں سنگین نقصان نال دوچار وی ہو سکدے او۔سوشل میڈیا جہدے وچ پرنٹ تے الیکٹرانک میڈیا۔ فیس بک’ انسٹا گرام’ وٹس ایپ’ ٹویٹر’ ٹک ٹاک’ لنکڈان’ گوگل’ مسینجر سنے دوجے ذرائع ابلاغ موجود نیں۔
ایتھے ایہہ امر قابل ذکر اے کہ جتھے لوک ایہناں ذرائع نوں اپنے جائز مقاصد دے حصول لئی استعمال وچ لیاندے نیں اوتھے اوہناں ذرائع نوں کجھ شرپسند عناصر اپنے گھنائونے مقصد لئی استعمال کردے نیں۔ اوہ ایہناں ذرائع توں عوام نوں بے دریغ لٹ رہے ہوندے نیں لیکن اوہناں دے خلاف کوئی ملکی ادارہ یا محکمہ کسی وی قسم دی کارروائی کرن توں گریزاں نظر آندا اے۔ اخیر وطن عزیز دے ادارے تے محکمے ایہناں ضمیر فروشاں’ فراڈیاں’ دھوکے بازاں دے خلاف کیوں کارروائی نہیں کردے۔ کیوں ایسے عوام نوں لٹن والے فسطانیت نال بھرپور لٹیریاں دے خلاف حکومتی شکنجہ تیار نہیں کیتا جاندا۔ ایہناں جعل سازاں دے خلاف آہنی ہتھاں نال کیوں نہیں نبٹیا جاندا۔حال ای وچ ہون والے فراڈ دا بد ترین وقوعہ حکومتی اداریاں دی نااہلی دا منہ بولدا ثبوت اے۔
راقم الحروف نے سوشل میڈیا اتے اشتہار ویکھیا جہڑا کہ ٹک ٹاک اتے jazara.pk دے نام توں چل رہیا سی۔ جہدے اتے M.10 Earbads v5.1 ڈسکائونٹ ریٹ 2500 دے بجائے 1500 تے مل رہے سن۔ راقم نے وی ایس اشتہار نوں ویکھیا تے آرڈر آن لائن بک کراو دتا۔ مگروں مینوں آرڈر دے کنفرمیشن دا میسج موصول ہویا۔ اگلے دن مینوں Tcs کراچی آفس دے ذریعے آرڈر دے ڈسپیج ہون دی اطلاع موصول ہوئی جو کہ Better server.pk Plot no 45 street no 6. Gulshan eahabr Marhba street Karachi دے ایڈریس توں بھجوائی گئی سی۔ پچھلے دناں پارسل نمبر ID 772660636721بذریعہ Tcs موصول ہویا۔ راقم نے ٹی سی رارئیڈر نوں آکھیا کہ مینوں اپنا سامان چیک کرن دیو لیکن اوہنے انج کرن توں منع کردتا تے اپنی مطلوبہ رقم 1700 روپے وصول کر کے چلدا بنیا۔ راقم نے اوس پارسل نوں کھولیا تے چودہ طبق روشن ہو گئے کہ میرے نال آن لائن فراڈ ہو گیا اے۔ اوہدے وچوں میرے بھجوائے گئے آرڈر دے بجائے اک بجلی دا سوئچ پیک کیتا گیا اوہ وی خراب ٹٹیا ہویا سی۔ جدوں راقم نے ٹی سی ایس دے چوبرجی آفس نال رابطہ کیتا تے اوتھے موجود اہلکار نے کسی وی قسم دے تعاون توں معذرت کر لیتی جو کہ راقم لئی قابل حیرت گل سی۔ مگروں ٹی سی ایس ہیلپ لائن اتے رابطہ کیتا تے اوہناں نے صرف اینا تعاون کیتا کہ مینوں جہڑے فون نمبر دے ذریعے پارسل بک ہویا اوہناں دا نمبر 0321-8592926 دے دتا لیکن رابطہ کرن تے نمبر مسلسل بند جا رہیا اے۔ یقینا ایہہ وی ویب سائٹ ایڈریس وانگوں بوگس نمبر ہووے گا۔
میری وزیراعظم پاکستان’ چیف جسٹس آف پاکستان’ گورنر سندھ’ وزیراعلیٰ سندھ’ وزیرداخلہ سندھ’ ایف آئی اے کرائم سرکل تے سائبر کرائم ونگ ‘ ارباب اختیار ‘متعلقہ اداریاں نوں اپیل اے کہ انج دے فراڈیے’ دھوکے باز تے بوگس ویب سائٹاں دے ذریعے عوام نوں لٹن والیاں دے خلاف سخت توں سخت کارروائی کیتی جاوے تے ایہناں ملک دشمن’ سماج دشمن عناصر دے نال آہنی ہتھاں نال نبٹیا جاوے تاں جے معاشرہ ایہناں لٹیریاں’ دھوکے بازاں کولوں بچ سکے۔