پائم دے پربندھ ہیٹھ شہید حکیم محمد سعید سیمینار

پاکستان ایسوسی ایشن فار ایسٹرن میڈیسن (پائم) تے ہمدرد فائونڈیشن پاکستان دے پربندھ ہیٹھ شہید حکیم محمد سعید دی 25ویں برسی دے موقعے تے 21اکتوبر جمعہ دی دوپہر الحمرا ہال لہور وچ اک پروقار تقریب دا پربندھ کیتا گیا جہدی صدارت محترمہ سعدیہ راشد دختر شہید حکیم محمد سعید نے کیتی۔ تلاوت قرآن حکیم مگروں قاری اوصاف ہمدانی نے نعت رسولۖ مقبول پڑھی تے پروفیسر حکیم ڈاکٹر عبدالحنان پچھلے وائس چانسلر جامعہ ہمدرد نے خطبہ استقبالیہ وچ پروہنیاں دا خیر مقدم کیتا تے آکھیا کہ حکیم محمد سعید ہمہ جہت شخصیت دے مالک سن مگر طب اوہناں دی حیاتی دا بنیادی میدان عمل سی تے اوہدے وچ تعمیر پاکستان لئی اپنا حصہ پایا۔ ہمدرد دے ذریعے طبی دوا سازی دی صنعت دا آغاز کیتا تے اج پاکستان وچ سینکڑاں طبی دوا ساز ادارے قائم ہو کے اک مستحکم صنعت دا درجہ رکھدے نیں جدوں ہمدرد منافع بخش کاروبار بن گیا تے اوہنوں اسلام تے پاکستان لئی قومی وقف دا درجہ دے دتا تے خود ہمدرد دے مقاصد لئی وقف ہو گئے۔ طب دا مسئلہ پاکستان وچ تسلیم کران مگروں پوری دنیا وچ لے گئے ‘اج عالمی ادارہ صحت طب نوں تسلیم کر چکیا۔ دنیا بھر دی جامعات وچ طب اتے ڈائیلاگ ہو رہے نیں تے پاکستان وچ طب دی تعلیم عالمی معیارات دے مطابق ہو چکی تے ایم فل پی ایچ ڈی طبیب خدمت خلق لئی میدان عمل وچ نیں۔ اپنی خدمات طب دے کارن اوہ مجدد طب نیں مگر اوہناں نے تعمیر پاکستان لافانی خدمات سرانجام دے کے اوہدی تریخ دا عنوان جلی قرار پاوے۔ مقررین وچ حکیم راحت نسیم سوہدروی حکیم محمد سجاد زخمی حکیم حامد نظامی’ حکیم بشیر بھیروی’ حکیم حامد نظامی’ حکیم عبدالرحیم ہاشمی’ حکیم امین امجد حساروی قیوم نظامی’ پروفیسر میاں اکرم’ڈاکٹر وقار احمد’ مہانز رفیع’ ڈاکٹر اظہار احمد فرخ’ ہاشم رضا ریاض بریگیڈیئر حامد سعید تے دوجیاں نے خطاب کیتا۔
مقررین نے اپنے خطاب وچ آکھیا کہ شہید حکیم محمد سعید نے عملی زندگی دے بے شمار میداناں وچ بے مثال خدمات سرانجام دتیاں مگر اوہناں دی زندگی دا بنیادی تشخص فن طب سی۔ اوہناں نے جیویں طب مشرقی دے معالج دی حیثیت نال مریضاں دی خدمت کیتی۔ طب نوں فروغ دتا تے دنیا بھر وچ طب مشرقی دا بول بالا کیتا۔ ایہدے تے اوہ بجا طور تے مجدد طب قرار پاوے ۔اوہناں دی جدوجہد دا نتیجہ اے کہ اج ساری دنیا اک طب محفوظ دی تشکیل لئی سرگرم اے۔ طب دے نال نال اوہناں نے تعلیم تے تعمیر پاکستان لئی وی بے مثال کم کیتا۔جامعہ ہمدرد ایہدے پربندھ ہیٹھ تعلیمی ادارے’ تعمیر اذہان ملت’ نونہالاں دی تعلیم تے تربیت’ 27 رمضان المبارک یوم پاکستان’ نونہال اسمبلی’ آواز اخلاق’ شام ہمدرد’ لائبریریاں دا فروغ تے ہجرہ صدی تقریبات نونہال ادب تے ہمدرد نونہال دا اجرا تے دوجی بے شمار تحریکاں دے نال شہر علم و ثقافت مدینہ الحکمہ دا قیام دے ذریعے اپنے علم وفضل تے عزم و عمل دے انمٹ نقوش چھڈے جہناں دی بنا تے اوہ ہمیشہ زندہ رہن گے۔ صحت دی تعلیم دا پہلا میگزین ہمدرد صحت دا اجرا کیتا جہنوں اج 72سال توں ودھ ہو چکے نیں۔ ریسرچ لئی ہمدرد میڈیکس جد کہ تریخ لئی ہمدرد ہسٹاریکل تے اسلامی تحقیق لئی ہمدرد اسلامیکس جاری کیتے جہڑے اج وی جاری نیں اپنی ایہناں خدمات دے کارن سرسید وقت کہلاوے اوہدے علاوہ تعمیر اذہان ملت نونہالوں دی تعلیم و تربیت علم و عالم دی قدر دانی قرآن و سیرت کانگریساں دا آغاز مسلم سائنسداناں دی کتاباں دے ترجمے کرا کے شائع کرائے۔ حجرہ صدی دی تقریباں دا آغاز کیتا الغرض کہ ملک و ملت لئی اپنے وسائل توں بے شمار کم کیتے تے سرسید احمد خان علامہ اقبال تے قائداعظم مگروں قوم لئی رول ماڈل قرار پائے۔ اوہ وزیر رہے’ گورنر بنے مگر مطب نہیں چھڈیا تے کدی فیس نہیں لیتی۔ اوہناں نوں اسلامی سربراہ تنظیم او آئی سی دی کمیٹی عالمی ایوارڈ دتا ۔ سویڈن نے ڈاکٹر آف سائنس دی اعزازی ڈگری دتی ماسکو توں ابن سینا ایوارڈ ملیا ۔ اوہ دنیا بھر وچ پاکستان دے سفید پوش سفیر سن۔ علم و ادب طب تے صحت اتے کوئی دوست کتاباں لکھن تے بالاں دے سفر نامیاں دا سلسلہ شروع کیتا تے کوئی اک سو توں ودھ ملکاں وچ کانفرنساں وچ پاکستان دی نمائندگی دی ملک و ملت دا درد اوہناں وچ کٹ کٹ کے بھریا ہویا سی۔ دانشوراں دا تھنک ٹینک شوری ہمدرد بنایا جہدے ماہانہ اجتماعات اج وی چاراں صوبائی دارالحکومتاں وچ ہر مہینے ہوندے نیں۔ دراصل انحطاط پذیر معاشرہ دی قدراں دی بحالی دے خواہاں سن۔ اک ناشتہ اک کھانا دی مہم چلائی تے خود زندگی وی اوسے اصول اتے عمل کیتا۔ اوہناںنے جہڑے کم کیتے اوہ اک فرد دے نہیں حکومتاں دے کرن دے سن۔ اوہناں دا مزاج علمی تے عالمی سن تے طب نوں دائرہ عطائیت توں پاک کرن دے علمبردار سن۔ اوہناں نے زندگی بھر چٹا لباس پایا تے کدی چاہ دا استعمال نہیں کیتا۔ حقیقت ایہہ اے کہ اپنے دور دے ابن سینا سن۔ نظامت نو یرا بابر تے فرید مصطفائی نے کیتی جد کہ حکیم راحت نسیم سوہدروی حکیم حامد نظامی ‘ حکیم عبدالرحیم ہاشمی’ حکیم امین امجد’ حکیم سلیم کھوکھر’ حکیم اقبال بلوچ تے حکیم محمد نوید’حکیم سید علی بخاری دے علاوہ کئی اطبا تے شخصیات نوں خدمات تے وثیقہ اعتراف پیش کیتے گئے جہڑے محترم سعدیہ راشد نے دتے۔