چڑھدے پنجاب دی اداکارہ گرپریت کور بھنگو

مشہور پنجابی اداکارہ گرپریت کور بھنگو بارے لہندے پنجاب دے لوکاں دا کہنااے ایہناں دے کردار ویکھ گرپریت بھنگو سانوں ساڈی جئی لگدی اے۔گرپریت کور بھنگو سکول ٹیچر سن تے تھیٹر وی کردے سن،تھیٹر کردے کردے اوہناں نے فلم انڈسٹری وچ کریکٹر ایکٹر دے طور تے پیر رکھیاپر اوہناں دی اداکاری اینی جاندار اے کہ اوہ مزاحیہ کردار نبھان تے ویکھن والے ہسن تے مجبور ہوجاندے نیںجے سنجیدہ کردار نبھان تے ویکھن والے پریشان ہوجاندے نیں۔اوہناں دے خاوند پترکار تے لکھاری نیں اور پتر گلوکار اے۔ وکھ وکھ شعبیاں نال جڑے ہوون توں باوجود ودھیا حیاتی گزار رہے نیں۔ گرپریت کور بھنگو نیں بالی وڈ فلماں وچ وی کم کیتا اے۔پنجابی فلم انڈسٹری بارے گل بات کردے آکھیا کہ پنجابی سینما ایس ویلے اپنے عروج تے ایں جنہدی کامیابی دا صحرا درشکاں دے سر سجدا اے تے اوس توں بعد سابق پردھان منتری من موہن سنگھ دی محنت نال پنجابی انڈسٹری اپنے پیراں تے کھڑی ہوئی تے پوری دنیا تے چھاگئی۔ کرداراں بارے گل بات کردے ہوئی آکھیا کہ جس طرح ماں نوں اپنی ساری اولاد پیاری ہندی اے ایسے طرح اک فنکار نوں اپنے سارے کردار پیارے لگدے نیں او جیوے دا وی ہووے۔ گرپریت کور بھنگو نے ان گنت فلماں وچ کم کیتا تے حالے وی کررہے نیں، اوہناں نے گل بات کردے ہوئے دسیا کہ فلم مٹی دا ڈائیلاگ دل دے بہت نیٹرے ایں ایس فلم وچ ماں دا کردار کیتا جہندا پتر ویلاں تے لگ جاندا اے۔جیہڑے کریکٹرنوں عوام پیاری دیندی اے اوہ فنکار دے اندر وس جاندا اے۔
گرپریت کور بھنگو نوں لہندے پنجاب دے لوگ بوہت پیار کردے نیں۔اوہناں دا کہنا سی کہ فن تے فنکار دی کوئی سرحد نئیں ہندی فنکار ساریاں دا سانجھا ہندا اے اوہ جتھوں دا وی ہووے۔فلم چل میرے پت بارے آکھیا کہ ایہہ فلم پل بن گئی اے جنہے دواں پنجاباں نوں اک کردتا۔اگے وی لہندے چڑھدے پنجاب دے فنکار مل کے کم کرن گے تے سانوں بوہت خشی ہووے گی دواں ملکاں دے لوگ اک دوجے نوں پیار کردے نیں۔ پیار تے امن دا پرچار کرنا ہر فنکار دی خواہش اے۔ گرپریت کور بھنگو لہندے پنجاب دے فنکاراں نال وی فلماں کرچکے نیں تے کجھ دن پہلے دلجیت دوسانجھ تے سرگن مہتا دی فلم جیہڑی پاکستانی سینما وچ وی ریلیز ہوئی،بابے بھنگڑا پاندے نیں وچ وی کم کیتا اے۔ اوہناں دسیا کہ سہیل احمد اک بوہت ودھیا اداکار تے چنگے انسان نیں،سہیل احمد نال کم کرکے بوہت مان محسوس ہویا۔ آس کرنے لہندے چڑھدے پنجاب دی سانجھ تے پیار سدا آباد رہوے تے اسی مل کے فلماں دے نال نال اپنی ماں بولی دا مان ودھاندے رہیے۔