دیسی لوک ولائتی شیواں

ترقی دا جہڑا سفر اسیں تے ساڈے جئے لوکاں نے ویکھیا اوہ شاید ای ساڈی پچھلی نسلاں نے ویکھیا ہووے ۔ ساڈے پیو دادا تے اسیں تقریباً اک جئے سکولاں توں پڑھ کے نکلے۔ اکو جیا ماحول سی تے فیر اسیں اپنی زندگی وچ ترقی دا طوفان ویکھیا۔ پہلاں اک شہر دا دوجے شہر والیاں نال کوئی رابطہ نہیں سی۔ حال احوال دا اوحد ذریعہ خطو کتابت سی تے ہن دنیا سمٹ کے گلوبل ویلج بن چکی اے۔ بالاں دا انداز تعلیم بدل گیا انٹرنیٹ نے انقلاب برپا کردتا۔ قدراں بدل دتیاں تے ساڈی کھان پین دی عادتاں بدل دتیاں تے سانوں اک دوجے توں بیگانہ کر دتا۔ بچپن دا زمانہ یاد کرو تے رشتیاں دا احساس سی والد دا پورا پنڈ دادا’ دادی’ تایا’ چاچا تے پھپھو نال بھریا ہوندا سی۔ ایسے طرحاں ماں دا پنڈ نانا’ نانی’ خالہ تے مامیاں نال بھریا ہوندا سی۔ پنڈ دے کسی وی گھر وچ داخل ہو و اپنیاں توں ودھ کے پیار’ محبت تے خلوص ملدا سی۔ رشتے تے شیواں ملاوٹ توں پاک سن۔ دیسی لوک سن تے
دیسی شیواں استعمال کردے سن۔ قیام پاکستان توں پہلاں برصغیر دے لوک صدیاں توں انگریز راج آن تک ملاوٹ دے مفہوم توں ناآشنا سن۔ گھراں وچ دیسی گھیو’ گڑ’ شکر’ لسی’ ددھ’ مکھن’ دیسی مرغیاں’ دیسی انڈے’ بکرے’ دنبے وغیرہ اد گوشت استعمال کیتا جاندا سی۔ نہان لئی کالا صابن ہوندا سی۔ برتن دھون لئی مٹی’ ریت تے کالا صابن استعمال ہوندا سی۔ شوگر’ بلڈ پریشر تے کینسر جئی موذی مرض دا نام نشان نہیں ہوندا سی۔ ہر گھر خوشیاں نال بھریا ہوندا سی اک دوجے دے دکھ تے سکھ دے سارے سنگی ہوندے سن۔ پنڈ دے کسے اک گھر وچ ویاہ ہووے تے پورا پنڈ سامان اکٹھا کرن تے لگ جاندا۔ جے کوئی غمی اے فیر وی پوراپنڈ اک دوجے توں ودھ کے دکھی خاندان دے نال کھڑا ہوندا سی۔ اسیں اخلاق تے اخلاص نال بھرپورشا ہانہ زندگی گزار رہے ساں کہ فیر برصغیر اتے انگریز قابض ہویا تے مصنوعات دا رواج چل نکلیا۔ مصنوعات کیہ سن ”مصنوعی” شیواں انسانی تخلیق جہدا مقصد صرف پیسہ کمانا سی تے جو اج پوری دنیا نوں اخلاقیات دا سبق دیندے نیں۔ اوہناں عالمی جعل سازاں نے ”ولایتی” تصور متعارف کرایا۔ دیسی گھیو دے مقابلے وچ ولایتی گھی آ گیا جو کہ اپنی اصل وچ صابن اے کولیسٹرول’بلڈ پریشر تے ہارٹ اٹیک دا تحفہ ایہناں ای دی کرم نوازی اے۔ دیسی مشروبات (ستو’ لسی’ ددھ) وغیرہ دے
مقابلے وچ ولایتی کیمیکل ملے مشروبات کولڈڈرنکس وغیرہ وی ایہناں دا ای تحفہ اے۔ برصغیر وچ چاہ وی انگریز نے متعارف کروائی۔ ایہہ ہن ساڈے لئی اک نشہ بن چکی اے کہ جہدے بغیر زندگی گزارنی اوکھی ہو گئی اے۔ گڑ تے شکر دے مقابلے وچ گنے دے رس وچ مضر صحت کیمیکل دی ملاوٹ نال چینی بنا کے عوام نوں ایس پاسے لا دتا گیا جہدے مگروں تقریباً ہر گھر وچ کوئی نہ کوئی شوگر دا مریض بن گیا ۔ ددھ خالص ہوندا سی تے ددھ نال بنی ساری شیواںوی مگر فیر ویلے دے نال نال ملٹی نیشنل کمپنیاں نے جعلی ددھ متعارف کرایا۔ کیمیکل ملیا ددھ ساری دنیا نوں ویچن دا سہرا ایہناں کمپنی دے سر اے۔ ایسے طرحاں تے بہت ساری کمپنیان دی پروڈکٹ جہناں نوں ددھ آکھیا جاندا اے اوہناں وچ ددھ نام دی سرے توں کوئی چیز نہیں ہوندی۔ شکر اے عدالت نے پابندی لائی تے ہن ٹی وائٹنر وغیرہ لکھن لگے نیں پہلاں بیماریاں گھٹ ہوندیاں سن جے کوئی بیماری ہووے تے اوہدا علاج معالجہ طبیب ای کردے سن جہدے توں انسان واقعی درست وی ہو
جاندا سی جہدے مگروں عالمی جعلسازاں نے انگریزی کیمیکل ملی دوائیاں متعارف کروائیاں جہناں توں انسان روز بروز نویں بیماریاں دا شکار ہو رہیا اے جدوں توں انگریزی دوائیاں دا دور دورہ ہویا اے شاید ای کوئی انسان روئے کائنات اتے صحت مند بچیا ہووے۔ مقصد کیہ سی صرف تے صرف پیسہ کمانا اج بیماریاں دا ایہہ عالم اے کہ ہر گھر وچ ہزاراں دی دوائیاں جا رہیاں نیں تے صحت مند فیر وی کوئی نہیں ہو رہیا۔ اج مضر صحت کیمیکلز نال کیہ کیہ بنا کے ویچیا جا رہیا اے تے اسیں بڑے شوق نال کھا رہے آں۔ ددھ’ مکھن’ گھی’ آئس کریم’ خشک ددھ’ کیچپ’ چینی’ رنگ برنگی’ فوڈ آئٹمز’ مشروبات’ ڈبے والے جوس’ کاسمیٹکس’ میڈیسن’ پھلاں نوں پکان لئی رنگ برنگے کیمیکل تے جانے کیہ کیہ اسیں مصنوعی شیواں استعمال کر رہے آں ۔ہور تے ہور اوہناں نے سانوں مصنوعات دی آڑ وچ خوب لوٹنا وی شروع کردتا تے جو سب توں خطرناک گل ساڈے لئی اے اوہ ایہہ کہ اوہناں نے وحدت امت مسلمہ نوں وطنیت دے زہر توں بدل کے اوہدی جنس ای بدل دتی ساڈی اصل تعلیم دے بجائے لارڈمیکالے دا طریقہ تعلیم نافذ کر کے سانوں تن وچ نہ تیرہ وچ کردتا۔ اسیں ایس ویلے ادھے تیتر نیں تے ادھے بٹیر انگریزی بولن والیاں نوں اپنی مادری زبان نہیں آندی تے مادری زبان بولن والیاں نوں انگریزی نہیں آندی۔
قومی زبان اردو اے مگر سرکاری خط و کتابت انگریزی وچ عدالتاں وچ انپڑھ دا کیس انگلش بول کے لڑیا جاندا اے تے فریقین بغیر کجھ سمجھے سر ہلان وچ مصروف ہوندے نیں۔ اسیں دیسی لوک دیسی چیزاں استعمال کرن والیاں نوں عالمی قوتاں نے بڑی خوبصورتی نال سانوں دو رنگی وچ جھونک کے ساڈے اتے ای ملاوٹ دا الزام وی لا دتا تے جو سرمائے دی آڑ وچ روزمرہ استعمال دی ہر شے وچ مضر صحت کیمیکلز دا دھڑا دھڑ استعمال کر کے ساڈی صحت نال کھیڈ رہے نیں ۔ اسیں ایہناں مصنوعی شیواں دے اینے عادی ہو چکے نیں کہ ہن کوئی خالص دیسی شے کھان نوں ملے وی تے اوہنوں ساڈا معدہ قبول نہیں کردا شہری لوک پنڈ وچ جا کے خالص ددھ یا گڑ شکر استعمال کر لین تے ڈھڈ خراب ہو جاندا اے۔ ایہناں مصنوعات نے جتھے ساڈی صحت نوں متاثر کیتا اوتھے ساڈے رشتیاں وچ جو خالص تے سچا پیار ہویا کردا سی۔ اوہنوں وی متاثر کردتا۔ چھوٹے وڈے دی تمیز ختم کرن دے نال نال ساڈی اخلاقیات نوں وی ختم کردتا اک دوجے توں اگے نکلن دی کوشش وچ سانوں دوجیاں دی گردن اتے وی پیر رکھ کے نکلنا پووے تے دریغ نہیں کردے ساڈے بزرگ دیسی لوک سن۔ دیسی چیزاں استعمال کر کے بیماریاں توں دور تے اپنیاں دے کول ہوندے سن تے جدوں توں اسیں دیسی لوکاں نے ولایتی چیزاں دا استعمال شروع کیتا اوہدوں دے اسیں مفاد پرست بن چکے آں۔