تریخی شکست دی وجہ مہنگائی یا عمران خان؟

اک کہاوت اے کہ اک شخص خچر اتے سوار جا رہیا سی کہ اک جگہ توں لنگھیا تے کجھ لوکاں نے اوہدا مذاق اڈایا تے آکھیا کہ بھراکجھ تے خیال کرو کیوں نحیف و نزار خچر اتے بیٹھے ہوئے موٹے بندے نے پرواہ نہیں کیتی تے اگے چل دتا۔ رستے وچ اوہنوں خیال آیا کہ ایہہ تے طلسم اے خچر دی حالت زار اتے اوہنوں رحم آ گیا اوہنے خچر نوں موہنڈھیاں اتے چکیاتے چلن لگیا۔ اجے کجھ دیر ای چلیا سی کہ پچھوں ہسن دی آوازاں آئیاں۔ کڈا بیوقوف اے خچر اتے سوار ہون دے بجائے خچر اوہدے اتے سوار اے کجھ دور جا کے اوہنے خچر نوں تھلے لایا تے اوہدی رسی پھڑ کے پیدل چلن لگیا۔ اجے کجھ دیر ای چلیا سی کہ کسی نے آکھیا کہ یار عجیب بیوقوف اے خچر دے ہوندے ہوئے پیدل چل رہیا۔ اوہ شخص مخمصے وچ پھس گیا کہ ایس مسئلہ نوں کیویں حل کرے۔ بہت سوچ تے بچار مگروں اوہنے خچر نوں کھوں وچ سٹ دتا۔
حکومت دا سب توں وڈا مسئلہ عمران خان اے یا مہنگائی۔ ویکھیا جاوے تے دونویں مسئلے ای سوہان روح بنے ہوئے نیں تے دونویں مسئلیاں نوں کھوہ کھاتے کرن لئی حکومت دے کول فی الحال کوئی حکمت عملی نہیں اے۔ ضمنی الیکشن وچ عمران خان دی چھ سیٹاں اتے کامیابی مگروں جتھے عمران دا رویہ ہور جارحانہ ہویااے تے اوہ دھرنے دی کال دا عندیہ دے رہے نیں اوتھے حکومت نے ایس تریخی شکست دی وجہ بجلی دے بلاں وچ وادھا قرار دتا اے۔ ایس ویلے صورتحال ایہہ ہے کہ جہدی 20ہزار تنخواہ اے اوہنوں 22ہزار دے بل آ رہے نیں۔ جہنے غریب دی چیخاں کڈوا دتیاں نیں تے اوہنوں سکھ تے چین نال سونا وی نصیب نہیں اے۔
اتحادیاں دی شکست نے اک پاسے تے ایہہ ثابت کیتا اے کہ عمران خان عوام وچ مقبول نیں۔ دوجے پاسے سوال ایہہ اے کہ حکومت دے کول اگے چل کے کیہ آپشناں نیں کہ اوہ اپنی ساکھ بچا سکے۔ اوس ویلے موجودہ صورت حال ایہہ ہے کہ گیس تے بجلی دی لوڈشیڈنگ تے
مہنگائی نے عوام دا جینا دوبھر کر دتا اے۔ ایہناں حالات وچ صدر امریکہ دا بیان وی ساڈے لئی لمحہ فکریہ اے۔ معیشت داناں دا خیال اے کہ پاکستان دیوالیہ پن ول ودھ رہیا اے۔ سانوں قومی سالمیت لئی ایسے فیصلے درکار نیں جہناں توں ملک مضبوط ہووے۔ ضمنی الیکشناں وچ عمران خان دے چھکے تے جت نے اگلے الیکشناں دا وی فیصلہ کردتا اے۔ تیرہ جماعتاں دی شکست دی وجہ مہنگائی دے نال نال عوام دی ناراضی وی اے۔ عوام نوں غربت تے مہنگائی نے شکنجے وچ جکڑ رکھیا اے جتھے اوہناں لئی امن دا ساہ لینا وی اوکھا ہو چکیا اے۔
ضمنی الیکشناں دے نتائج نے بہت سارے سوالاں نوں چکیا اے۔ کیہ لاڈلے دے بیانیے نوں تقویت ملی؟ کیہ موجودہ صورتحال وچ حکومت اتحادیاں نوں متحد رکھ سکے گی؟ کیہ ایہناں الیکشناں دا عام الیکشناں اتے اثر پووے گا؟ تے کیہ لانگ مارچ دے ذریعے عمران خان چھیتی الیکشن کروا سکن گے؟ ایہہ تے آن والا ویلا ای دسے گا لیکن اینا ضروری اے کہ عوام ہر حالت وچ لک توڑ مہنگائی توں نجات چاہندے نیں۔ تحریک عدم اعتماد مگروں عوام ایہہ توقع لائے بیٹھے سن کہ ہن سیاسی استحکام دی بیل منڈھے چڑھے گی لیکن صورتحال اوہدے الٹ رہی۔ اج ساڈے حکمراناں نے قرضیاں دا اینا بوجھ چڑھا دتا اے کہ اسیں کاسہ گدائی چکے دربدر دستک دے رہے آں جہدا فطری نتیجہ اے کہ قرض دین والے سانوں ڈکٹیٹ کردے نیں تے ہتک آمیز حد تک ساڈے معاملات وچ مداخلت کردے نیں۔ مغربی سامراج توں آزاد ہون مگروں ساڈی پہلی ترجیح مالی اقتصادی تے اخلاقی استحکام ہونا چاہیدا سی لیکن ساڈی آغاز توں ای ایس پاسے توجہ نہیں رہی۔ بقول شاعر
اپنی نبیڑ تینوں ہوراں نال کیہ
گھٹڑی سنبھال تینوں چوراں نال کیہ
ضمنی الیکشناں نوں سیاستدان نوشتہ تقدیر سمجھ کے اک مربوط سیاسی نظام اتے متفق ہون۔معاشرہ اخوت تے مساوات دی صورت وچ اہرام دی شکل وچ بلند ہووے’ معیشت تھلے توں اتے پروان چڑھے لیکن داڈا عمل اتوں دی تھلے ول لڑھکدا اے جہدے توں نہ سوچ وچ توازن رہندا اے نہ سیاست تے معیشت دا پہیہ درست سمت گھومدا اے۔ ایہناں نامساعد حالات وچ ایہناں فیصلیاں دی لوڑ اے جو ملک نوں استحکام ول لے جان۔