دہشت گردی توں قیام امن تک دا اوکھا سفر!

لکھت:شاہد ندیم احمد

ملک وچ تن ورھے پہلاں امن و امان دی صورتحال جس قدر بھیڑی سی، قوم دے حافظے توں ایہناں مناظر دا محو ہو جانا ممکن نہیں اے، پر موجودہ آرمی چیف نے منصب سنبھالدیاں ای اوس ویلے دی وفاقی حکومت دی مشاورت نال ملک نوں بدامنی توں نجات دوان لئی فیصلہ کن کاروائی دا عزم کیتا تے انج آپریشن ردالفساد دا آغاز کیتا گیا۔ پوری قوم نے نفاذ قنون دے ذمہ دار سارے اداریاں دی رلت نال شروع ہون والی کاروائی دی پوری حمایت کیتی تے الحمد للہ ملک دے محافظاں نے اپنی جاناں دی بھاری قربانیاں دے کے 3ورھے وچ تقریباً ڈیڑھ لکھ آپریشن کرکے ملک نوں دہشت گردی دے چنگل کڈھ لیائے آں۔ افواج پاکستان تے دوجے متعلقہ اداریاں دی ایس شاندار کارکردگی تے جہنوں پوری عالمی برادری قابل تقلید مثال تسلیم کردی اے، پاکستانی عوام دا سرفخر نال اُچا اے، شہیداں تے غازیاں لئی اوہناں دے دل تشکر دے جذبات نال لبریز نیں، جد کہ آپریشن ردالفساد دے تن ورھے پورے ہون تے آرمی چیف جنرل قمر جاوید باجوہ دا بیان حقائق دی درست ترجمانی اے کہ دہشت گردی دے خلاف جنگ دے نتائج خطے وچ امن دی صورت وچ نکلن گے، افواج پاکستان دے چوکس و بیدار ہون دی جہڑی یقین دہانی آرمی چیف نے کرائی اے، اوہ پوری قوم لئی باعث اطمینان اے۔ایہ امر واضح اے پاک فوج نے دہشت گردی دے خلاف اک وڈی تے صبر آزما جنگ لڑی، دہشت گرداں نوں شکست دین تے ملک وچ قیام امن دے استحکام تے سلامتی لئی لازوال قربانیاں دی نہ صرف روشن مثال قائم کیتی سگوں دنیا بھر وچ پاکستان دا وقار اُچا کیتا، اج ایہدا ماحصل اے کہ پاکستان دے پرامن ماحول وچ بین الاقوامی کبڈی تے کرکٹ میچ ہو رہے نیں جو پوری دنیا نوں واضح پیغام اے کہ پاکستان نے دہشت گردی توں سیاحت تک دا اوکھا سفر کامیابی نال طے کر لیا تے ایہ ہن کھیڈ و سیاحت لئی اک پرامن ملک بن چکیا اے۔ اک اوہ ویلا سی کہ پاکستان وچ ٹڈی دل دی طرح دہشت گرد تے انتہا پسند انتہائی طاقتور ہو گئے سن تے اوہناں نے خفیہ طور تے پورے ملک وچ اپنا جال وچھا لیا سی، قنون ناں دی کوئی شے باقی نہیں رہی سی، ایس صورتحال وچ پوری قوم وچ تشویش دا ابھرنا قدرتی گل سی تے ہر ویلے ایہو دھڑکا لگیا رہندا کسے وی ویلے انتہا پسنداں دا گروہ اگے ودھ کے عنان اقتدار اپنے ہتھ وچ لے کے اپنے نظریاتی مخالفاں دا قتل عام شروع کر سکدا اے۔ سول حکومت تے ایہدے ماتحت سول سکیورٹی اداریاں دی کارکردگی تے مشکل صورتحال نال نبڑن دی صلاحیت تے سوالیہ نشان اٹھ رہے سن۔ مایوسی دی فضا وچ پاک فوج نے اگے ودھ کے قوم نوں حوصلہ دتا تے دہشت گرداں دے خلاف آپریشن ضرب عضب دا آغاز کر دتا گیا۔ شمالی وزیرستان دے دشوار گزار تے محفوظ پناہ گاہواں وچ لُکے جدید ہتھیاراں نال لیس دہشت گرداں نوں گمان وی نہیں سی کہ کوئی اوہناں نوںشکست نہیں دے سکدا اے، پر آفرین اے پاک فوج تے جہنے ملک نوں دہشت گردی توں پاک کرن لئی اپنی جاناں دی پروا نہ کردیاں ہوئیاں وطن دشمناں نال ٹکرا گئی تے دہشت گرداں دے ناقابل تسخیر محفوظ ٹھکانیاں تے قبضہ کرکے امن و امان نوں یقینی بنا دتا، ایس جنگ وچ پاک فوج دے پرعزم، بہادر افسراں تے جواناں نے چوکھی تعداد وچ قربانیاں دین دے باوجود پائے استقلال وچ لغزش نہیں آئی، سگوں ہر شہادت دے بعد اپنے ایس عزم نوں دہرایا کہ دہشت گرداں دے مکمل خاتمے تک اپنی کاروائیاں جاری رکھن گے۔ ایس ویلے وی کجھ دہشت گرداں دے بچے کھچے گروہواں دے پچھے غیر ملکی قوتاں کارفرما نیں جہڑیاں پاکستان دی سلامتی نوں نقصان اپڑان دے در اُتے نیں، ایس ناسور دے مکمل خاتمے لئی نیشنل ایکشن پلان تے عملدرآمد ویلے دی اہم لوڑ اے۔پاکستان دے گوانڈھ وچ موجود افغانستان اپنی ناکافی انتظامی و دفاعی صلاحیت پاروں دہشت گردی دے ٹھکانیاں نوں ختم کرن وچ نکام رہیا، جتھے دہشت گرد اپنے آپ نوں منظم کردے نیں۔ داخلی انتشار دی وجہ توں بھارت جہے ملکاں نوں موقع ملیا کہ اوہ افغانستان وچ خفیہ اڈے بنا کے پاکستان دے مفادات نوں نشانہ بنائے۔ پاکستان نے صرف اپنی سرزمین توں دہشت گرداں دا خاتمہ نہیں کیتا، سگوں افغانستان توں آن والے اجہے عناصر دے گرد گھیرا تنگ کرکے اوہناں نوں لُکن دا موقع نہیں دتا، پاکستان نے دہشت گردی دے خلاف پورے خطے وچ سرگرم عسکریت پسند گروہ ختم کرن وچ کامیابی حاصل کیتی اے۔ ایس امن دی بحالی دے فوائد جتھے پاکستان نوں ملن گے، اوتھے ایہدے توں افغانستان، ایران، مشرق وسطیٰ، چین، روس تے حتیٰ کہ بھارت وی فائدہ چکے گا۔ مسلح افواج نے ثابت کیتا اے کہ اوہ پاک افغان سرحد تے دہشت گرداں دی نقل و حرکت تے خطے دے استحکام دے حوالے نال اہم معاملات نوں انجام دین دی صلاحیت رکھدیاں نیں۔ایہ تحریک انصاف حکومت دی خوش نصیبی اے کہ ایہنوں پچھلی حکومتاں دے مقابلے وچ اجیہا پاکستان ملیا کہ جہنوں بدامنی توں پاک کر دتا گیا اے، اوہ ممالک جہناں نے اپنے شہریاں نوں سکیورٹی خدشات دے پیش نظر ایتھوں دا سفر کرن توں روک رکھیا سی، ایہناں وچوں کئی ہن ایہ پابندی ختم کر چکے نیں۔ ایہ آپریشن ردالفساد دا ای ثمر اے کہ پہلی واری پاکستان سپر لیگ دا انعقاد پاکستان وچ ہو رہیا اے، دہشت گردی توں سیاحت تک دا ایہ سفر وطن عزیز لئی خوش آئند امکانات دے لامحدود راستے کھول سکدا اے۔ ایس مثبت پیشرفت دے سبب آرمی چیف دی ایہ توقع بالکل بجا اے کہ دہشت گردی دے خاتمے نال پاکستان تے خطے وچ امن و استحکام آوے گا، اوہناں نے انسداد دہشت گردی دی دو دہائیاں دی کامیابیاں نوں مستحکم کرن دی لوڑ دا اظہار کیتا اے، جہنوں پورا کرنا بنیادی طور تے سارے ریاستی اداریاں دی مکمل حمایت یافتہ موجودہ حکومت دی ذمہ داری اے۔ حکومت تے پاک آرمی دی باہمی حکمت عملی دی وجہ توں پاکستان دے نال نال افغناستان وچ وی پائیدار امن دے امکانات روشن ہو رہے نیں، طالبان تے امریکہ وچکار امن معاہدہ ایسے ہفتے متوقع اے جہدے بعد امریکی افواج دی واپسی عمل وچ آوے گی تے برادر ملک وچ اک مستحکم سیاسی نظام دے قیام دی راہ پکی ہووے گی۔ خطے وچ پائیدار امن و استحکام دے ایہناں روشن امکانات توں خاطر خواہ استفادہ کرنا تے پاکستان دی ترقی و خوشحالی نوں یقینی بنانا موجودہ حکمراناں دی صلاحیتاں دا امتحان اے۔ ایس مقصد لئی قومی سطح تے موجودہ افتراق و انتشار دا خاتمہ تے اتحاد و یگانگت دا فروغ ضروری اے، ایس لئی موثر اقدامات وچ تاخیر قومی مفاد دے منافی ہووے گی۔