بحران دے ذمہ واراں تے سمجھوتہ نہیں!

لکھت:شاہد ندیم احمد

عوام نوں اپنے روٹی، روزگار، غربت مہنائی دے مسئلیاں وچ بہر صورت فوری ریلیف دی لوڑ اے جہدے لئی وزیراعظم تے جذبے نال معمور نیں تے ریلیف لئی اپنی معاشی ٹیم نوں متحرک وی کردے نیں، پر ذخیرہ اندوز تے بجلی، گیس چور مافیا نے اپنی من مانیاں دی وجہ توں عوام لئی فوری ریلیف ہنوز دلی دوراست دے مصداق بنا دتا اے۔ جنوری دے مہینے وچ دیس بھر وچ کنک دے اک سنگین بحران نے جنم لیا، ویکھدیاں ای ویکھدیاں مارکیٹ توں آٹا غائب ہویا، کئی دکانداراں تے فلور ملز مالکاں نے موقع توں بھرپور فائدہ چکیا، مہنگائی دی چکی وچ پسدے مجبور عوام نوں دوہاں ہتھاں نال لٹیا تے ایہدے نتیجے وچ غریب لئی دو ویلے دی روٹی دا حصول وی محال ہو گیا اے۔ وزیراعظم عمران خان نے صورتحال دا ویلے سر نوٹس لیندیاں ہوئیاں تحقیقات دا حکم دتا جہدے تحت وفاقی تحقیقاتی ادارے (ایف آئی اے) دی تحقیقاتی رپورٹ منظرعام تے آئی اے۔ ایہدے وچ متذکرہ بحران نوں مصنوعی قرار دیندیاں بدانتظامی نوں ایہدی بنیادی وجہ دسیا گیا اے۔ ایس رپورٹ وچ دسیا گیا اے دیس وچ کنک دا کوئی بحران نہیں سی، مصنوعی طور تے ایہدی قلت پیدا کیتی گئی تے ایس ویلے وی 21لکھ ٹن کنک موجود اے۔ وزیراعظم نے یقین دوایا کہ آٹے، چینی دے بحران وچ جہڑی وی قصور وار نکلیا، بھاویں کناں ای طاقتور کیوں نہ ہووے، اوہنوں نہیں چھڈیا جاوے گا، ایس لئی رپورٹ دی روشنی وچ ذمہ دار بندیاں نوں بے نقاب کردیاں ہوئیاں فوری طور تے قنون دے کٹہرے وچ لیایا جانا چاہیدا اے۔ جے ایس واری وی کسے مصلحت دے پیش نظر کوتاہی کیتی گئی تے سماج دشمن عناصر نوں کھلی چھوٹ مل جاوے گی تے آئے دن اشیائے خورونوش دا مصنوعی بحران پیدا کرن دی ہور حوصلہ افزائی ہووے گی۔ایہدے وچ شک نہیں کہ دیس بھر وچ کنک تے آٹے دا بحران شدت اختیار کر گیا سی تے چکی تے آٹے دی قیمت 70روپے فی کلو تک جا اپڑی سی، 20کلو تھیلے دی قیمت 805روپے ہو گئی، ایس بحرانی صورتحال تے وفاقی، صوبائی تے ضلعی انتظامیہ فوری طور تے قابو پان وچ نکام نظر آئے، صورتحال اینی وگڑی کہ دیس دے کجھ علاقیاں وچ نان بائیاں نے آٹا مہنگا ہون دے بعد ازخود روٹی تے نان دی قیمتاں وچ وادھا کر دتا، احتجاج تے ہڑتالاں دا سلسلہ شروع ہویا تے وفاقی حکومت ولوں ایہ دعویٰ کیتا جان لگا کہ دیس بھر وچ کنک دا وافر سٹاک موجود اے تے موجودہ کنک دا بحران مصنوعی اے جہدی بنیادی وجہ سپلائی چین وچ رکاوٹاں دے نال وکھو وکھ مسئلیاں دا پیدا ہونا اے۔ ایس صورتحال وچ آٹے تے کنک دے بحران تے قابو پان لئی وفاقی حکومت نے 3لکھ ٹن کنک درآمد کرن دی منظوری وی دے دتی سی۔ایہ حقیقت وی اظہر من الشمس اے کہ دیس وچ کوئی وی بحران یکدم پیدا نہیں ہوندا ایہدے پس منظر وچ حکومتی مشینری دی نااہلی، کرپشن، بدانتظامی یاں غلط فیصلیاں دا کدھرے نہ کدھرے عمل دخل لازمی ہوندا اے، ماضی وچ آٹا بحران پیدا ہون دی اک وجہ افغانستان سمگلنگ دا عنسڑ وی شامل سی۔ پچھلے دناں جدوں آٹا، بحران پیدا ہویا تے اوس ویلے وفاقی تے سندھ حکومت وچکار الزامات دا اک نواں سلسلہ شروع ہو گیا تے دوواں اک دوجے نوں ایس بحران دا ذمے دار گرداندے رہے نیں۔ ایس آٹا بحران دے نال نال چینی دی قیمتاں وچ وی خاطر خواہ وادھا ہون تے حکومت شدید دباء وچ آ گئی تے اوہنے سارے معاملات دی تحقیقات شروع کروا دتیاں۔ ایف آئی اے نے آٹا بحران بارے پوری تحقیقاتی رپورٹ پیش کردتی اے جہدے وچ ایس بحران دے ذمے داراں دا تعین وی کیتا گیا اے۔ ہن ویکھنا ایہ اے کہ کرپٹ لوکاں نوں سزا دین تے کرپشن دے مکمل خاتمے دی دعویدار سرکار آٹا بحران دے ذمے واراں دے خلاف کیہ کاروائی کردی اے۔ ایس ویلے ہونا تے ایہ چاہیدا اے کہ ایس بحران دے ذمے واراں دے خلاف بلاامتیاز فوری قنونی کاروائی عمل وچ لیائی جاوے تاں جے آئندہ کسے نوں اجیہا گھناؤنا کھیڈ کھیڈن دی جرأت نہ ہووے، پاکستان وچ کرپشن دا عنصر سارے اداریاں وچ بدرجہ اتم موجود اے تے سرکار سارے دعویاں دے باوجود کسے اک وی محکمے توں وی کرپشن دا خاتمہ نہیں کر سکی اے۔ سرکار نے اپنی آئینی مدت دا ادھا وی طے نہیں کیتا کہ اجہی بدانتظامی ساہمنے آئی جہدے توں سرکار نوں شرمندگی تے عوام نوں مشکلاں دا ساہمنا کرنا پیا، ایس بحران توں کجھ لوکاں نے سیاسی تے مالی فائدہ چکیا اے۔ اپوزیشن نے تے سیاسی فائدہ چکنا ای سی، مالی فائدہ جہنے وی چکیا تے اوہ جناں وی بااثر اے، اوہدے نال کوئی نرمی تے رورعایت نہیں ہونی چاہیدی نہیں تاں سرکار نوں اپنے باقی دو ر وچ اجہے کئی بحراناں تے سبکی دا ساہمنا کرنا پیندا رہوے گا۔وزیراعظم اکثر و بیشتر ملکی اداریاں وچ رائج کرپشن دا ذکر بڑے درد بھرے انداز وچ کردے رہندے نیں تے ایہدے خاتمے دا عزم وی دہراندے نیں، پر اجے تک سرکاری اداریاں وچ کرپشن دے خاتمے لئی کوئی ٹھوس حکومتی حکمت عملی ساہمنے نہیں آئی اے، تحریک انصاف حکومت نوں اپنے کرپشن دے خاتمے دے دعویاں نوں یقینی بنان لئی موثر اقدامات کرنے ہون گے۔ عوام سمجھدے نیں کہ شوگر، کنک مافیاز بھانویں سرکار یاں حزب اختلاف دی صفاں وچ ہون، اوہ مفادات دے پجاری ہوندے نیں، اوہناں نے عوام دا خون چوس کے کنک تے شوگر بحران وچ راتوں رات ارباں روپے نجائز کمائے نیں، ایس منظم مافیا دی جڑاں حزب اقتدارتے حزب اختلاف وچ گہری پھیلی ہون پاروں ایہناں دے خلاف کاروائی مشکل نظر آندی اے۔ ماضی وچ وی ایس طرح دی کوششاں لاحاصل ثابت ہوئیاں نیں، پر ایس واری وزیراعظم نے جہڑے عزم دے نال اشارہ دتااے تے آس کیتی جاندی اے کہ بحران دے ذمہ واراں تے سمجھوتہ کرن دی بجائے، اوہناں نوں نہ صرف بے نقاب کیتا جاوے گا، سگوں سزا و جزا نوں یقینی بناندیاں ہوئیاں نشان عبرت وی بنایا جاوے گا۔