زندگی دی جھولی وچ

مظہر برلاس

چوکی سماہنی دے اشرف جنجوعہ اسلام آباد وچ مناں مٹی تھلے جا اپڑے۔ ہسدا مسکراندا اشرف جنجوعہ بھاویں آزادکشمیر دا رہن والا سی پر اوہدا مسکن اسلام آباد سی۔ اوہ کاروبار کردا‘ سیاست وچ حصہ لیندا‘ ادب اوہدا چسکا سی ایس لئی اوہدیاں دوستاں سارے شعبیاں وچ سن۔ اک زمانے وچ اشرف جنجوعہ آزاد مسلم کانفرنس دا حصہ سن فیر اوہ لبریشن لیگ وچ چلے گئے ایہدے بعد اوہ پیپلزپارٹی آزاد کشمیر دا حصہ بنے۔ اوہناں دا ایہ تعلق ورھیاں تے محیط رہیا۔ بھاویں اوہناں دی دوستی چوہدری یاسین نال وی سی پر اوہناں دی قربت زیادہ تر آزادکشمیر دے سابق صدر صاحبزادہ اسحاق ظفر تے موجودہ صدر بیرسٹر سلطان محمود نال رہی سگوں جدوں بیرسٹر سلطان محمود پیپلزپارٹی چھڈ کے پی ٹی آئی دا حصہ بنے تے اشرف جنجوعہ دا رخ وی پی ٹی آئی ول ہو گیا۔ ساڈی سیاست وچ اجہے بہت سارے کردار سامنے آندے نیں جو بظاہر وڈے عہدیاں تے نہیں اپڑدے پر اوہ آپ بہت وڈے ہوندے نیں۔ اشرف جنجوعہ وی اجہے کرداراں وچوں اک سن۔ اشرف جنجوعہ اسلام آباد دی سیاسی‘ سماجی تے ادبی تقریباں دی رونق سی اوہدیاں دوستیاں دا سلسلہ کاروباری بندیاں توں شروع ہوندا ہویا اہل سیاست تک پھیلدا‘ فیر اہل صحافت نوں چھوہندا ہویا ادبی دنیا وچ خوشیاں ونڈدا‘ ہن اسیں اوہناں لئی دعا ای کر سکنے آں۔
زندگی دی جھولی بڑی عجیب اے۔ ایہدے وچوں لوک تلکدے جاندے نیں۔ اجے کجھ ہفتے پہلاں نواب ڈاکٹر امبر شہزادہ چلے گئے سن۔ ساڈی سیاست تے سماج دا اوہ وی زندہ کردار سن۔ اوہناں نے اپنیاں تقریراں‘ لکھتاں تے شاعری راہیں سماج وچ ہون والی ناانصافیاں نوں طنز دے تیر نال بیان کیتا۔ گورنمنٹ کالج لہور وچ اک زمانہ ڈاکٹر امبر شہزادے دا معترف سی۔ گورنمنٹ کالج لہور توں یاد آیا کہ پچھلے دیہاڑیاں اوتھے اک مذاکرہ ہویا‘ اوس مذاکرے وچ سوال و جواب دا سلسلہ وی ہویا ایتھے پاکستان دے سابق وزیراعظم شاہد خاقان عباسی توں پولیس دے اک سابق آئی جی مہر ظفرعباس لک نے پچھیا کہ تسیں الیکشن وچ تاخیر دی ساری ذمہ داری عدلیہ تے پائی۔ تسیں ایہ کدھرے نہیں کہیا کہ نگران حکومت 90 دیہاڑیاں لئی ہوندی اے تے 90 دیہاڑیاں دے اندر ای الیکشن ہونے ہوندے نیں۔ تسیں وفاقی حکومت تے وی کوئی گل نہیں کیتی جو الیکشن توں نس رہی اے سگوں تسیں سب کجھ عدلیہ تے پا دتا۔ تسیں آئین دی گل ای نہیں کیتی الیکشن کمیشن دی گریز پائی دی گل نہیں کیتی تے نہ ای وفاقی حکومت دی بزدلی دا تذکرہ کیتا۔ 13 پارٹیاں جو اکٹھیاں نیں اوہ اک جونیئر سیاستدان توں نس رہیاں نیں۔ جنہے تہاڈے توں بعد وچ سیاست شروع کیتی تسیں وڈیاں وڈیاں گلاں کر رہے او پر تہاڈے وچ سچ بولن دی اینی ہمت نہیں کہ تسیں ایہ کہو کہ اسیں ڈر گئے آں‘ اسیں ڈر کے نس رہے آں۔ تسیں الیکشن لڑو‘ ایہ کتھے لکھیا اے کہ تسیں جتو گے تے فیر لڑو گے؟ ایہدے جواب وچ شاہد خاقان عباسی صرف ایہ کہہ سکے جو حکومت کر رہی اوہ وی غلط اے تے جو عدلیہ کر رہی اے اوہ وی غلط اے۔ پتہ نہیں ٹھیک کیہ اے؟ عجیب لوک نیں جہناں نوں ایہ وی پتہ نہیں کہ ٹھیک کیہ اے تے غلط کیہ۔ جہناں نو ںایہ وی نہیں پتہ کہ آئین کیہ کہندا اے۔ شاید ساڈی سیاست جھوٹ دی پروردہ اے۔
زندگی دی جھولی وچ دکھاں توں اڈ کیہ اے؟ کجھ دیہاڑ پہلاں میں اپنے دوست ہارون دے نال مکھڈ شریف گیا جتھے شکیل ہاشمی نال اوہناں دی والدہ دے انتقال تے تعزیت کرنی سی۔ ایس موقعے تے سیداظہر‘ خالد لودھی‘ پروفیسر محمدسہیل بدر تے صاحبزادہ ڈاکٹر ساجد محمود نظامی نال ملاقات ہوئی۔ مکھڈ اک تریخی قصبہ اے ایتھے قدیم ترین لائبریری اے جتھے حضرت علیؓ ہوراں سنے دوجے اکابرین دے ہتھ نال لکھے ہوئے قلمی نسخے موجود نیں۔ بلاشبہ ایس لائبریری وچ اجہے اجہے نادر و نایاب نسخے موجود نیں جو تہران تے انقرہ وچ وی نہیں۔ ضلع اٹک دی تحصیل جنڈ وچ دریائے سندھ دے کنڈھے واقع مکھڈ شریف بڑا پرانا قصبہ اے۔ تریخی حوالیاں توں پتہ چلدا اے کہ جدوں 326 قبل از مسیح سکندراعظم تے راجہ پورس دے وچکار جنگ ہوئی سی تے لشکر دے کجھ لوک نس کے مکھڈ آ گئے سن۔ ایہ تریخی قصبہ نوشیروان عادل دی سلطنت فارس دا حصہ سی۔ سومنات تے حملے کرن والا محمود غزنوی مکھڈ توں لنگھ کے گیا۔ 1192 عیسوی وچ شہاب الدین غوری دے بعد مکھڈ حاکم لہور قطب الدین ایبک دے زیرانتظام آ گیا۔ 1520 وچ جدوں ابراہیم لودھی حکمران بنیا تے مکھڈ حاکم ملتان دے زیرنگیں آ گیا۔ اکبر دے دور وچ مکھڈ دے حاجی احمد پراچہ نویں ایجاد کردہ دین الٰہی دے خلاف جدوجہد کرن والیاں وچ اگے اگے سن۔ ایتھے خواجہ زین الدین تے مولانا محمدعلی مکھڈوی دے مزارات نیں۔ ایتھے نظامیہ‘ چشتیہ تے قادریہ سلسلہ دے بزرگاں دے مزارات نیں۔ بھٹو دے قریبی ساتھی پیر صفی الدین دا تعلق مکھڈ نال سی۔ موجودہ وزیراعظم دے پرنسپل سیکرٹری ڈاکٹر توقیر شاہ دے سسرالی پیر گھرانے دا تعلق وی مکھڈ نال اے۔ زلفی بخاری دا آبائی علاقہ زیارت بیلہ وی مکھڈ دے نیڑے اے۔ مکھڈ وچ یاراں پتن نیں جہناں نوں گھاٹ کہیا جاندا اے۔ کالاباغ ایتھوں کوئی زیادہ دور نہیں۔ زندگی دی جھولی چوں خوشیاں لبھو وی تے نوشی گیلانی دا شعر یادآ جاندا اے کہ:
وہ خود تو تتلیوں کو لئے گھومتا رہا
اور مجھ کو خط میں لکھتا رہا انتظار کر