قصہ گرفتاری تے رہائی دا

طلعت عباس خان

اسیں 9 مئی دوپہر دو وجے اپنے ساتھی وکیلاں دے نال سپریم کورٹ نمبر2 وچ تن رکنی بینچ وچ پیش سی۔ ایسے دوران خبر ملی کہ عمران خان نوں اسلام آباد ہائیکورٹ توں پھڑ لیا اے۔ ساڈا ایہ کیس نارمل حالات وچ چلدا رہیا۔ بنچ نے سپریم کورٹ بار تے سپریم کورٹ بار کونس لدے وچکار صلاح کرا دتی۔ ایہدے بعد سپریم کورٹ صدر تے بار سیکرٹری نے ساتھی وکیلاں دے اعزاز وچ لنچ دتا۔ ایس طرح اسیں تن وجے رخصت ہوئے۔ خبر گرم سی کہ اسلام آباد ہائیکورٹ دے چیف جسٹس نے گرفتاری تے ایکشن لیا۔ پندراں منٹ وچ آئی جی پولیس تے سیکرٹری نوں سد لیا۔ کاش ایہ حکم فرماندے کہ کوئی کسے شاہراہ نوں بند نہیں کیتا جاوے پر اوہناں دے خدشات گرفتاری تک محدود رہے دو درجن توں ودھ کیساں وچ ہر واری ضمانت دیندے رہے۔ اوہناں نوں کیساں وچ ریلیف ملدا رہیا عدالتی احاطے توں گرفتار کرکے عمران نوں لے جایا گیا۔ چیف صاحب نے ایہدے تے عدالت لائی۔ فریقین نوں سنیا گیا سی فیر رات گئے فیصلہ سنا دتا کہ گرفتاری قنون دے مطابق کیتی گئی پر غلط تھاں توں کیتی گئی جد کہ ماضی وچ اجہیاں مثالاں موجود نیں۔ کہیا جاندا اے کہ ایہ ایکشن ایس لئی لیا گیا کہ سابق چیف جسٹس آف پاکستان ثاقب نثار عمران خان دے قریبی ساتھی نیں۔ اوہناں نوں اقتدار وچ لیان لئی سپریم کورٹ دے اچھوٹے فیصلے کیہ کردے سن۔ کہیا جاندا اے بابا رحمت دی بھانجی دے شوہر اسلام آباد ہائیکورٹ دے چیف جسٹس نیں جہدی وجہ نال ریلیف ملدا گیا۔ گرفتاری دے بعد جو کجھ ہویا ماضی وچ ایہدی مثال نہیں ملدی۔ سارے مین روڈ سنے ایکسپریس وے نوں مٹھی بھر انتشار پسنداں نے بند کر رکھیا سی پر کسے نے اوہناں نوں انج کرن توں منع نہیں سی کیتا۔
سوال اے کہ ایتھے سکیورٹی اداریاں نے شہریاں دی مدد کیوں نہیں کیتی لہور تے راولپنڈی دے اہم سرکاری اداریاں دی ٹٹ بھن جہڑے کر رہے سن اوہناں نوں وی روک نہ سکے۔ جدوں اوہناں دے اپنے ادارے محفوظ نہیں سن تے عام شہری دی حفاظت دا کیہ شکوہ کرنا۔ سوال ایہ وی اے کہ ایہدے تے کسے نے سوموٹو کیوں نہیں لیا۔ اسلام آباد سکیورٹی اداریاں نے نویں ٹیکنالوجی توں فائدہ نہیں اٹھایا سگوں ریڈزون دے وڈے داخلی راہواں تے لوہے دے گیٹ لا کے اوکڑاں پیدا کر رکھیاں نیں۔ حکومتی ادارے بے بس وکھائی دے رہے نیں گرفتاری دے بعد اپنی املاک نوں بچا ایس لئی نہیں سکے جے ری ایکشن کردے تے خون خرابہ ہوندا جہدے نال بہت نقصان ہوندا۔ دلیر بندہ ای درگزر کردا اے۔ اوہناں نوں صبر دا پھل ضرور ملے گا عدلیہ دیاں کہانیاں بہت نیں ایس لئی احتیاط دی اوہناں نوں لوڑ سی پر انج نہیں کیتا گیا۔ ایس توں پہلاں سپریم کورٹ نے الیکشن دا کیس جدوں لہور ہائیکورٹ وچ چل رہیا سی تے چیف صاحب نے ایہدے تے وی سوموٹو لے لیا سی فیر واپس لینا پیا۔ ہن جد کہ اوہناں دی مدر ان لاء دی ٹیپ چل چکی اے تے ہور احتیاط دی لوڑ سی پر اینے جذباتی ہوئے کہ بلا کے کہیا کہ ویکھ کے خوشی ہوئی۔ اوہ کجھ فرماندے رہے جو عام طور تے ججز اجہے فقرے ملزم نوں نہیں بولدے۔ گرفتاری غیرقنونی قرار دتی پر ملزم نوں بری کرن دے باوجود گھر جان نہیں دتا۔ عدلیہ دا مہمان بنا کے رکھیا۔ جتھے صدر عارف علوی نے اوہناں نال ملاقات کیتی۔ ایس کیس وچ گرفتاری دے دوران پولیس نے ڈنڈے مارے جہدے نال ویل چیئر دی لوڑ نہ رہی۔ ایہدے بعدوں آپ چل کے پیش ہوندے رہے۔ اوہناں نوں ڈنڈے مارن والیاں دا شکریہ ادا کرنا چاہیدا اے جہناں پاروں فیر توں چلنا نصیب ہویا۔
ایس کیس وچ جو کجھ ہویا اوہنے ساریاں نوں ننگا کر دتا۔ فیر اوہ رولا پیا جنہے عدلیہ دے فیصلیاں تے انگلیاں اٹھا دتیاں۔ ماضی دے زخم زندہ کر دتے۔ ہن لوک کہہ رہے نیں عدالتاں وچ فیصلے قنونی نہیں اپنی پسند تے ناپسند دے ہوندے نیں تے ہو رہے نیں۔ پی ٹی آئی دی ہر کہانی انٹرول دے بعد شروع ہوندی اے۔ ایہ اج کل اسٹیبلشمنٹ دے خلاف خوب گالھاں کڈھ کر رہے نیں ایہ جان بوجھ کے بھل جاندے نیں کہ اسٹیبلشمنٹ نے اوہناں نوں اسٹیبلش کیتا سی نہیں تے 20 ورھے تک ایہ اک سیٹ والی پارٹی ای رہندی۔ ہر قسم دا الزام جو اوہ اج اسٹیبلشمنٹ تے لا رہے نیں اوہناں توں ڈھیر ودھ ناانصافیاں اوہناں نے اسٹیبلشمنٹ دی جھولی وچ بہہ کے اپوزیشن خلاف کیتیاں سن۔ کہیا جاندا اے اسٹیبلشمنٹ جوڈیشری تے پی ٹی آئی دا مُک مکا 2013ء دے الیکشن توں پہلے ہو چکیا سی۔ عمران خان دے باجوہ صاحب بارے قصیدے سینکڑوں دے حساب نال نیٹ تے موجود نیں۔ اسٹیبلشمنٹ دے خلاف اوس ویلے شکایتاں سن پر اوس ویلے اوہناں دے خلاف شکایت کرن والیاں نوں ای ایسے گروپ وچ لعن طعن نال نوازیا گیا تے اسٹیبلشمنٹ دے بینیفشری نے وفاداری دا حق عدل دے تقاضیاں توں ودھ کے ادا کیتا۔ اک سابق صدر تے سابق وزیراعظم تے ان گنت وزیراں نوں کئی کئی مہینے تک جیل وچ رکھیا گیا تے اوہناں تے ظلم و تشدد دی ویڈیوز بنا کے اپنی اناء نوں تسکین پہنچائی تے حد ایہہ وے کہ حکومت جان دے بعد بناں کسے دے سوال پچھے آپ ای اپنے گناہ دا اقرار کیتا کہ زیادتیاں کیتیاں سن۔
فلم وقفے توں پہلاں ویکھو تے جہڑے حالات توں ملک گزریا تے گزر رہیا اے۔ ہن سارے چہرے ننگے ہو چکے نیں۔ ایہدی ابتدا پی ٹی آئی اسٹیبلشمنٹ تے جوڈیشری گٹھ جوڑ توں ہوئی تے ایہ تنے ایس موجودہ حالات دے ذمہ دار نیں۔ سچ تے ایہہ وے اسیں ساریاں دے قصور دی سزا اوس ٹریکا راہیں ساریاں نوں مل رہی اے جو اوہنوں جس مقصد لئی لیائے سن اج اوہناں دے اوہ مقصد پورے ہوندے وکھائی دے رہے نیں۔ ساڈے ادارے لیان والیاں دے سہولت کار سن۔ اوہ ہر دور وچ اپنی مرضی دے حکمران مسلط کردے رہے۔ اج اوہناں نوں اجہے بندے دی لوڑ سی جو سارے اداریاں دا بیڑا غرق کردا اوہ کم ایس توں لیا جا رہیا اے۔٭