قائد دے گھر اُتے حملہ

صوفیہ بیدار

سارے پاکستان نوں سائبان میسر کروان والے قائداعظم دا گھر ساڑ دتا گیا یقینا اجیہا ادقام دشمن ملک توں وی توقع کردے ہوئے اوہناں دے اخلاقی زوال نوں ویکھنا پیندا اے کہ ہن تک ممبئی وچ قائداعظم دا گھر انج دا انج ای پیا اے قائد دی عظیم شخصیت نوں دھیان وچ رکھدے ہوئے یاں عالمی اخلاقی اصولاں دی پاسداری وچ انج نہیں ہویا کہ اوہناں دے گھر تے حملہ یاں قبضہ ہو جاندا ایہ وی ہو سکدا اے کہ دنیا دی نفرت اجے ایس مقام تے نہیں اپڑی کہ قائدین دے گھر ساڑے جان۔ پر ایہ سانحہ 9 مئی 2023ء اک مقامی سیاستدان دی محبت وچ سرزد ہو گیا موصوف نوں قید کیتا پورا ملک اسیر کر دتا گیا حالاں کہ آپ ای منصف آپ ای گواہ آپ ای مسیحا آپ ای مریض فیر انج کیوں ہویا؟۔
اک زمانے وچ شاہی مہمان ہوندے سن ہن وی جتھے بادشاہت اے اوتھے شاہی مہمان ہوندے نیں پر جمہوریت (جیویں دی وی ہووے) وچ ہر بندہ اپنی سیٹ توں متجاوز نہیں ہو سکدا اوہنوں اپنی کرسی بارے قنوناں دے اندر ای کم کرنا ہوندا اے جے کوئی ڈاکٹر ہے تے اوہنوں پہلے مریض دی کیس ہسٹری پتہ کرنا اے اپریشن دی ضرورت ہے تے انستھیز یاں کناں کدوں دنیا اوہدے ماہر توں پچھنا اے کوئی بن دہ اکا اپریشن کرن دا اختیار نہیں رکھدا۔ جے جج ہے تے اوہنوں ملزم دی وی سننی اے ملزم دی وی مجرم دی وی تے وکٹم دی وی مقبول دے وارثاں دی وی تے قاتل دی مجبوری دی وی ایہ نہیں ہو سکدا کہ قاضی شہر سارے ناکردہ جرائم تے اوہناں دے نتیجے وچ ہون والیاں سزاواں تے ویلے توں پہلاں حکم صادر کر دیوے رہائی سزا توں پہلاں ہو جاوے طلاق نکاح توں پہلاں ہووے ایہ نہیں ہو سکدا۔ طلاق لئی پہلے نکاح کرنا پیندا اے پر حاضر سروس اجیہا فیصلہ کرن تے لگدا اے کہ ضد تے غصے وچ کیہ اے جہدا نہ صرف ایہ سسٹم متحمل نہیں ہو سکدا سگوں عدل دے ایواناں وچ دراڑاں دے نال نال عدل دیاں کتاباں وچ بے ترتیبی دے کنے ای باب کھل جان گے تے طلباء نسل در نسل ایہ گل پڑھدے ہوئے انصاف دے ترازو دا وزن برابر نہیں کر پان گے۔ جتھے اک بندہ پوری نسل نو دی اخلاقی تربیت دا جنازہ کڈھ رہیا اے اوتھے اوہدے فعل نوں ناپسند کرن دی تھاں پسندیدگی دی سند دینا انج ای اے جیویں بندر دے ہتھ تیلی پھڑانا باندر ایناں وی بھیڑا لقب نہیں کہ ایہدے توں اجتناب کیتا جاوے تے موجودہ حالات وچ جس عزت دے نال باندر دے ہتھ وچ تیلی دے نال پٹرول وی تھمایا جا رہیا اے ایہدے وچ ساڑن والے ہتھاں دے قصور وچ تیلی پھڑان والے ہتھ وی شامل نیں۔
وزیراعلیٰ پنجاب محسن نقوی نے وزیراعظم دے احکامات دے مطابق سارے تخریب کاراں نوں پھڑن تے انجام تک اپڑان دا سلسلہ شروع کر رکھیا اے حلیم الطبع محسن نقوی صاحب نے منصب دی لوڑ دے مطابق کہیا کہ احتجاج کرن والے جدوں کینٹ وچ اپڑ کے کورکمانڈر دی موجودہ رہائش گاہ تے قائداعظم دے ازلی گھر نوں ساڑدے نیں تے اوہ احتجاجی لوک دہشت گرد سمجھے جاندے نیں اوہ منظر کیسا ہوندا اے جدوں ہتھاں وچ سوٹے‘ اگ‘ پٹرول پھڑی جھینگا لا لا ہو ہو کردے گھراں وچ وڑ جان جتھے کھانا پک رہیا ہووے پرندے پھر رہے ہون عورتاں بچے سہم جان گھر دا سربراہ ایہناں بلوائیاں تے طاقت ہون دے باوجود گولی نہ چلائے حالاں کہ ایہ حق اک عام شہری نوں وی اے کہ جے کوئی ٹریس پاس کرے تے اپنی حفاظت ایس طرح وی کیتی جا سکدی اے۔ خدارا ایہناں بلوائیاں دی حمایت کرن توںپہلاں اپنے گھر وچ وچھیاں بزرگاں دیاں منجیاں‘ جوان دھیاں تے گھر دی عزت تے چاردیواری نوں ضرور یاد کر لوو تے صدیاں پرانے ڈاکے چوری تے بھتہ خوری وچ جیندے مردے سڑدے پنڈ وی یاد کر لوو جتھے جوان دھیاں والیاں دی ہر رات خوف وچ گزردی جتھے عورتاں دے گلیاں چوں زیور لاہ لئے جاندے جتھے ماں دی پلو وچ بنھے صدقے دے پیسے وی لٹا دتے جاندے نیں۔
اوہ وارداتاں جہناں نوں آپ اوہناں دے پس پشت ہتھ چٹے دن دے چانن وچ اون نہیں کر رہے خدارا حوصلہ افزائی نہ کرو جو ہویا تریخ دا بدترین باب سی ساڈی نسل خراب کیتی گئی اے اجہے کماں نوں پروٹیکشن دینا وی جرم اے جرم و سزا دے معاملے ضروری نہیں ایواناں‘ ٹرکاں‘ یاں عدالتاں وچ طے ہون کجھ چیزاں دا فیصلہ وقت وی کردا اے جو ثقافت تے ادب دے مستقل باب بن جاندے نیں کیہ چنگا اے کیہ برا اے ایہ وڈے ہو کے سانوں عدالتاں توں نہیں پتہ چلیا ساڈی کم عمر معصوم ماں نے گھراں وچ رہ کے وی سانوں دس دتا سی۔ اپنے شہیداں دیاں قبراں ڈھان والے اپنے قائد دی احسان فراموشی کرن والے کسے دے وفادار نہیں ہو سکدے صرف گائیڈڈ بھٹکے ہوئے ذہن نیں۔ تریخ دسدی اے کہ کئی کاروان بھٹکان تے رستے توں ہٹان والے آئے تے چلے گئے سچ تے جھوٹ دے آہنی اصول اپنی تھاں نصب نیں۔
جے ایس ویس ویلے نگران حکومت صحیح کم کر رہی اے تے صرف ایس لئی کہ نگران اے رد نہیں کیتا جا سکدا جس جانفشانی نال عامرمیر وزیر اطلاعات و ثقافت اپنیاں ذمہ داریاں نبھاندے ہوئے فنکاراں دی بھلائی تے وی دھیان دے رہے نیں سلاہن جوگ اے۔ ساڈے ایتھے رواج بن گیا اے کہ صرف خلاف لکھنا ای پسندیدہ اے حالاں کہ اچھے کم دی توصیف نہ کرنا وی بددیانتی اے تے قلم دی ایہو آزمائش اے کہ سچ نوں سچ تے جھوٹ نوں جھوٹ لکھے وزیراعلیٰ پنجاب نے وزیراعظم دیاں ہدایتاں تے سارے مجرماں نوں جہناں نوں تحریک پاکستان دا مجرم کہنا مناسب اے قرار واقعی سزا دین دا اعادہ کیتا اے۔٭